Eliab ge Isabelsa xu ra ǁhâ
1 Gao-aob Axab ge ǁîb taras Isabelsa Eliab ge dī xūn hoan tsî mâtib ge Baali kēbo-aoga ǃgams tsîna ge mîba. 2 Os ge ǁîsa sîsabegu ǀkha Eliaba ge haisiba: “ǁAri ta ga nē ǁaeb ai sats go kēbo-aogu ǀkha dīs ǁkhās khami sats ǀkha dī tama io, a gu eloga ǃgam te.” 3 Ob ge Eliaba ǃao tsî ûib âb ǃaroma ǃkhoeni tsî Judab ǃnâ ǂnôa ǃās Bersebas tawa ge sī.
ǃGāb âba ǁnāpa ǁnāxū 4 tsîb ge Eliaba hoaraga tsēsa ǃgarob ǃnâ ge ǃgû. ǁÎb ge hais ǃnaka sī ǂnû tsî ǁōb ka ǃkhaisa ǁkhore tsî ge mî: “ǁKhā ǁoa ta go ǃKhūtse, ti aboxagu ǃgâ-ai ta ama-ai tama, xuige ti ûiba ū.”
5 Tsîb ge hais ǃnaka ǁgoe tsî ge ǁom. Ob ge ǀhomǃgāba ǃnapetamase tsâǀkhā bi tsî “Khâima, î ǂû” ti ge mî. 6 Tsî kō tsîb ge pere-i tsî ǁgam-i hâǃnâ xapab tsîna ǁîb danas ǀgūse a mû, ob ge ǂû tsî ā tsî ǁkhawa ge ǁgoe. 7 Ob ge ǃKhūb di ǀhomǃgāba ǁkhawa ǀgamǁî ǃnāsa hā ǂkhaiǂkhai bi tsî ge mî: “Khâima î ǂû, ǁnā tamas ka iob daoba kaise nî ǃgomba tsi xuige.” 8 Ob ge Eliaba khâi tsî ǂû tsî ge ā, tsî i ge ǂû-e ǀgaiba ge mā bi tsîb ge hakadisi tsēde Elob ǃhommi, Sinaib kōse ge ǃgû. 9 ǁNāpab ge ǁhoab ǃnâ ǂgâ tsî ǁnā tsuxuba ge hâ.
Ob ge ǃKhūba ǃnapetamase ǁîb ǃoa “Eliatse, tare-ets nēpa ra dī?” ti ge mî.
10 Ob ge Eliaba ge ǃeream: “Hoaǀgaixa ǃKhū Elotse, tita ge sats ǀguitsa hoaǁae gere ǃoaba. Xawe Israelǁîn ge sats ǀkhan ge dī hâ i ǃgaeǀhaosa khôa, sa altarde khôaǁnâ tsî sa kēbo-aogu hoaga ge ǃgam. Tita ǀguita ge ǃgau hâ tsîn ge nēsi tita tsîna ra ǃgam ǂgao.”
11 Ob ge ǃKhūba “ǂOa, îts ti aiǃâ ǃhommi ǂaob ai sī mâ” ti ge mî. Tsî ǃKhūb ge ǁnāpa-u a ǃkharu, ob ge ǀgaisa ǂoab, ǃhomga ǂari kai tsî ge ǃgareǀuiga khôaǃāba ge ǃgom, xaweb ge ǃKhūba ǁîb ǃnâ ge ǀkhai i. ǂOab ge ǃgomǀû ob ge ǃhūǂgubiba ge hā, xaweb ge ǃKhūba ǁîb ǃnâ ge ǀkhai i. 12 ǃHūǂgubib khaoǃgâs ge ǀaesa ge hā, xaweb ge ǃKhūba ǁîs tsîn ǃnâ ge ǀkhai i. ǀAes khaoǃgâb ge tsaura domroba ge hā.
13 Ob ge Eliaba ǁîbab ge ǁnâuo, sarab âb ǀkha ǃgūsen tsî ǂoa tsî ǁhoab di dao-ams tawa sī ge mâ. O-i ge dom-e ǁîb ǃoa “Eliatse tare-ets nēpa ra dī?” ti ge mî.
14 Ob ge Eliaba ge ǃeream: “Hoaǀgaixa ǃKhū Elotse, tita ge sats ǀguitsa hoaǁae gere ǃoaba. Xawe Israelǁîn ge sats ǀkhan ge dī hâ i ǃgaeǀhaosa khôa, sa altarde khôaǁnâ tsî sa kēbo-aogu hoaga ge ǃgam. Tita ǀguita ge ǃgau hâ tsîn ge nēsi tita tsîna ra ǃgam ǂgao.”
15 Ob ge ǃKhūba ge mî: “Damaskus ǃgaroǃhūb ǁga oa, îts ǃās ǃnâts ga sīo, Hasaela Siriab gao-aose ǀnau, 16 Nimsib ôab Jehuba Israeli gao-aose ǀnau tsî Safati, ǃās Abel-Meholas dib di ôab Elisaba sa saoǃgonao kaib nîga kēbo-aose ǀnau. 17 O-i ge Hasaeli xa ǃgamhesa xu ga ûiǂoa-e Jehub xa nî ǃgamhe tsî Jehuba xu ga ûiǂoa-i ge Elisab xa nî ǃgamhe. 18 Xawe ta ge tita hûǀoadisi khoen, Baali ība ge ǀgoreǀî tama hâ ina Israeli ǃnâ nî ǃgau.”
Elisab di ǂgaihes
19 Eliab ge ǁnāpa xub ge ǃgûo, Elisaba ǀgamdisihakaǀa gomagu ǀkhab ra ǃhūǃgao hîa ge ǀhao-ū; ǀgamdisiǀgamǀagu ge ǁîb ais ai ge hâ i tsî kha ge ǀgamkha ǁîb tawa ge hâ i. Tsîb ge Eliaba anaǂamsarab âba ūǁnâ tsî Elisab ai ge ǁgui. 20 Ob ge Elisaba gomagu âba ǁnāxū tsî Eliaba ǃkhoesao tsî ǁîb ǃoa ge mî: “Mā-am te, î ta ti îb tsî ti îs tsîra sī tawede, o ta ge nî sao tsi.”
Ob ge Eliaba “ǂHanu a xuige oa re, tita ge ǁnāsa ǂkhā tsi tama hâ” ti ge ǃeream.
21 Ob ge Elisaba ǁîb gomagu ǁga oa, ǀgamkha ǂā, jokhoedi ǀkha ǀaesa khau tsî ǁgan-e ge sâi. Tsîb ge ǁgan-e khoena ge mā tsîn ge ge ǂû tsîb ge ǁnās khaoǃgâ Eliabab nî sîsenhuise ǁîba ge sao.
© Khoekhoegowab Elobmîs © Bible Society in Namibia, 2020.
