ǂHâb ǃnâ hâ ǂgomsaben ǃaroma hâ huib
1 Nē ǀkhaeb hîa Jerusalems di khoen Elob din ǃaroma ra ǀhaoǀhaoheb xa ta nî xoaba du ǃkhais di ǂhâbasasi-e ta ge mû tama hâ. 2 Sadu di māsenxasib, sadu ǃaroma ta Masedoniaǁîn tawa ra koaba ta a ǂan xui-ao. Sadu Axajab di Korinteǁîdu ge nau kuriba xu ǂhomisen hâ tsîb ge sadu di ôasasib nēs ǃnâ huis diba ǂguina ge ǂgaoǂgaoǃnâ. 3 O ta ge ǃgâsaga sige koas sadu xa ge ra koas, nēs ǃnâ ǁau tidese ge sî, mî ta go khami du ǂhomisen hâse nî hâse. 4 Masedoniaǁîn tita ǀkhan ga sī, o ǂhomisen tama du hâse hō du tidese. Mâtikō taosib ase i nî sige ība, sadu di taosib xasa ta mî ǁoa, sadu xa ta gere koasen xui-ao. 5 O i ge tita go ǂhâbasaba i nē ǃgâsaga ǂgansa, aibe gu nî sadu tawa sī tsî sadu ge mîmâi ǀkhaeba ǂhomise. Ab māǂgaoxasib ǀkha māhe hâ ǀkhaeb ase ī tsî ǁgariǁnâhe hâ xū-i ase tā ī.
6 Tsî nēsa ǂâis ǃnâ ūhâ re: ǀOrose ra tsoro-i ge ǁkhāti ǀorose nî ǃgao tsî ǀoasase ra tsoro-i ge ǁkhāti ǀoasase nî ǃgao. 7 A i mâ-i hoa-e ǂgaob ǃnâ i go ǀnai mîǀgui hâ i khami dī, māsenoǃnâsib tamas ka io ǁgarihes ǀkhas ose, Elob ǃgâiaǂgaoxa mā-aona a ǀnam amaga. 8 Tsî Elob ge a ǁkhā, sado ǂhâba du hâs xa ǃnāsase māsa. Hoaǁaeb ai du ǂâusase nî ūhâ tsî hoa ǃgâidīb ǃnâ ǃnāse. 9 Xoamâihe hâ khami:
“ǁÎb ge ǀgora tsî ǀgâsana ge mā;
ǁîb di ǂhanu-aisib ge ǀamose ra hâ.”
10 ǁNāb tsoro-aoba ǃkhomna ra māb ge ǁkhāti pere-e ǂûse ra mā tsîb ge sadu ǃkhomna nî ǀaro tsî ǁnās ǃaromab ge Eloba sadu ǂhanu-aisib di ǃgaosa nî ǂguiǂgui. 11 Hoan ǃnâ du nî ǃkhūǃkhūhe tsî hoaǁae māǂgaoxase nî mā tsî ǁnās ge Eloba gangansa ra mā, sada ra dīn ǂama. 12 Nē ǃoabasa mās Elob khoen di ǂhâsib ǀguiba ǀoaǀoa tama, xawen ǂguina Eloba ǁîs ǃaroma ǃnāǂamsase ra gangan xui-ao. 13 Sadu māǂgaoxasib ǃoabas, ǁîn tsî mâ-i hoa-i ǃoa hâs ge Elob ǀonsa ra ǂkhaiǂkhai. Nēs ge sadu ra ǂgoms hîa du Xristub* di ǃGâiǂhôas ǃnâ ūhâsa ǁnâuǀnam ǃkhais di ǁgauǁgau. 14 Sado ǀgoreba tsîn ge ǁkhorexase sadu xa nî ǂâi, buruxa ǀkhommi Elob ge mā dub ǃaroma. 15 Ab Eloba ǁîb di mîǂuiheǁoasa mās ǃaroma ganganhe re.
© Khoekhoegowab Elobmîs © Bible Society in Namibia, 2020.
