Israels ge a ǁaedi di ǃnâ
1 Sadu ǃnāǃnuidi dido, tita ǃgâ re
tsî sadu ǃnūse hâdo ǁnâu re!
ǃKhūb ge ǃnae ta nîs aiǃâ ge ǂgai te,
ganupe ta ti îs ǃnāb ǃnâ hâ hîab ge ge ǀonǂgai te.
2 Ti amsab ge ǀā gôab khami ge dī,
ǁîb ǃommi sommi ǃnâb ge ge gaugau te.
ǂKhanuǂkhanuhe hâ ǂāb aseb ge ge dī te,
ǁîb ǁhōb ǃnâb ge ge sâu te.
3 Tsîb ge tita ǃoa ge mî: “Sats ge ti ǃgātsa, Israeltse;
sats ǃnâ ta ge nî ǂkhaiǂkhaihe.”
4 Xawe ta ge tita ge mî: “ǁAuse ta ge ge sîsen;
ti ǀgaiba ta ge ǁaudommi ai tsî harebeoǃnâse ge sîsenū.”
Xawe ǃKhūb ge tita nî ǂnoaba
tsî ti Elob ge tita nî mādawa-am.
5 ǃKhūb ge tita ǁhās ǃnâ ǁîb di ǃgāse ǂnubi,
Jakoba ǁîb ǃoa ge hā-ū
tsî Israelsa ǁîb tawa nî ǀhaoǀhaobahe.
Tita ge ǃKhūb mûǁae ge ǃgôahe,
ti Elob a ti ǀgai.
6 Ob ge ǃKhūba ǃaruǀî tita ǃoa ge mî:
“Supuba te i ge a satsa Jakob ǁaesa nî ǂgaikhâi
tsî Israels ûiǃgau ge khoena ǁkhawa ūhās di ǃgāse dīsa.
ǁAedi di ǃnâse ta ge nî dī tsi,
ti ores ǃhūbaib ǀkhâuǀamdi kōse nî ǂapaǂoase.”
7 Nētib ge ǃKhūb Israels Ore-aob tsî ǁîb ǃAnuba,
ǁnāb ǃgamse sorahe hâb,
ǁaedi xa ǂharahe hâb
tsî ǂgaeǂgui-aogu di ǃgāb ǃoa ra mî:
“Gao-aogu ge mû tsî nî khâimâ,
gaosagu tsîn ge nî mû
tsî ǃKhūb aiǃâ nî ǃhonǁgoa.”
ǁÎb a ǂgomǂgomsa, Israels di ǃAnub,
ge satsa ǁhûiǂuibasen xui-ao.
Jerusalems ǀasaǀasahes
8 Nētib ge ǃKhūba ra mî:
“ǂHanu ǁaeb ai ta ge ge ǃeream tsi,
ti ores tsēs ai ta ge ge huiǂui tsi.
Tita ge sâu tsi tsî khoen ǃgaeǀhaos ase ge mā tsi,
ǃhūbats nî ǂnubikhâi
tsî ǃū-aise ǁgoe ǃhūǃâdets nî ǀumise ǀgoraǂuise.
9 ǃKhōsaben ǃoats ge nî mî: ‘ǂOaxa!’
tsî ǃkhaenab ǃnâ hân ǃoa ‘ǁGausen.’
ǁÎn ge daogu ai nî ǃû,
ǃnâugu hoagu ge ǁîn ǃû-aise nî ī.
10 ǁÎn ge tātsē ǃâ tsî ǁgâ tide,
tamas ka ios ge ǁkhō ǂoas kas,
sores kas hoasa ǁîna hō tide.
ǁÎn ǀKhomaob ǁîna ǂgaeǂgui
tsî ǁgamǀaude-u nî ǃkharu-ū xui-ao.
11 “Tita ge ti ǃhomgu hoaga daogu ase nî dī
tsî ti ǃgangu hoaga nî ǀgapiǀgapi.
12 Mû, nēn ge ǃnūseba xu ra hā
tsî mû, nēn ge ǀapas tsî huriǂoasa xu ra hā
tsî nēn ge Sinimǃhūba xu ra hā.”
13 ǀHomtse, ǃgâiaǂgaob ǀkha ǂgaiǂui
tsî ǃhūbaitse, ǃgâiaǂgao re!
ǃHomgo, ǁnaeb ǃnâ ǂariǃā!
ǃKhūb ǁîb khoena ge ǁkhaeǂgao,
tsî ǁnān hîa ra tsâna nî ǀkhomxaǃnâ amaga.
14 Xawes ge Sionsa ge mî:
“ǃKhūb ge ge ǁnāxū te,
ti ǃKhūb ge ge ǀuru te,”
15 Ob ge ǃKhūba ge ǃeream:
“Tara-e kha daisi-i ra ǀgôaro-e ǀuru ǁkhā-i a,
tamas ka io ǁîs ǁhās di ǀgôaro-e ǀkhomxaǃnâs tide?
ǁÎs ga ǀuru,
xawe ta ge tita tātsē ǀuru tide.
16 Mû, ti ǃomǃnās ǃnâ ta ge ǃgaoǂgā du hâ,
sadu ǂnubiǂgoagu ge hoaǁae ti aiǃâ mâ.
17 “Sasa nî omkhâin ge ǃhaeǁaeb ǃnâ nî hā,
tsî sasa ge hîkākān ge sasa xu nî bē.
18 Kōkhâi î kōǂnamipe!
ǁÎn hoan ge hāǀhao tsî sas ǃoa ra hā.
Tita ûi hâ ǃkhais ao, tib ge ǃKhūba ra mî,
os ge ǁîn hoana ǃgomǀgausa anixū-i ase nî ǂnûi,
ǁînas ge nî ǃgaesen ǃgame-aos khami.
19 “ǁAuse tsî ǃū-aisase ǁgoe ǃādi tsî hîkākāsa ǃhūb
ge ǁîs ǁanǂgāsaben ǃaroma nî ǂkhariro
tsî sasa ra hapun ge ǃnūse nî bē.
20 Sa ǃkhōsis ǃoab ǃnâs hâ hîa gere ǃnae ǀgôan
ge sas ra ǁnâu hîa nî mî:
‘ǃĀs ge sida ǃaroma a ǂkhariro,
ǁnā-amaga ǁanai da nî ǃkhai-e dība da.’
21 Os ge ǂgaob âs ǃnâ nî mî:
‘Tari-e nē ǀgôan hoana ge hōba te?
Tita ge ǃoab ǃnâ tsî ǀgôaose ge hâ i,
tita ge ǃkhōsis ǃnâ tsî ūǃgûbēhe hâse ge hâ i.
Tari-e ǁîna ge kaikai?
Tita ge ǃū-aisase ge ǁnāxūhe hâ i,
mâpa xun ge ǁîna hā?’ ”
22 Nētib ra ǃKhūb Eloba mî:
“Mû, tita ge ti ǃomma ǁaede ǃoa nî ūkhâi
tsîn ge sa ôaga nî tanihā-ū
tsî sa ôade ǃhōdi ai nî taniǀkhī.
23 Gao-aogu ge sa mâba-aose nî ī
tsî gao-aode sa daisi-aose.
ǃHūb ǃoa ǃgamǃgâ hâsen ge nî ǃhonba si
tsî sa ǂaira ai hâ tsaraba nî tsā.
Os ge nî ǂan tita a ǃKhū ǃkhaisa;
tita ai ra ǂgomaiǂnûin ge taotaohe tide.”
24 ǃKhamaoba xu amǀnē-i âba ǀhanahe ǁkhā-i a
tamas ka io hîkākā-aoba xu ǃkhōsabena?
25 Amaseb ge ǃKhūba ra mî:
“ǀGaisab di ǃkhōsaben tsîn ge nî ūhe
tsî hîkākā-aob amǀnē-i ge nî ǃnoraǃnorahe.
Sas ǀkha ra ǂnoagun hoana ta ge nî ǂnoagu-ū,
tsî ta ge sa ôana nî huiǂui.
26 Sa ǁgâiǀā-aona ta ge ǁîn ǂûn ǁgan-e nî ǂû kai
tsî ǁîn ǂûn ǀaob xan ge ǂauxûi-i xas khami nî ǀhoro.
Os ge ǁgans hoasa nî ǂan tita a ǃKhū sa ǃGâiǃōdī-ao
tsî sa Ore-aota, Jakob di ǀGaisata ǃkhaisa.”
© Khoekhoegowab Elobmîs © Bible Society in Namibia, 2020.
