Atalias ǃoagu hâ khâikhâisens
(2 Gao-aogu 11:4-16)1 ǃNani kurigu khaoǃgâb ge prister Jojadaba mîǀgui tsî koro ǂamkhoegu, ǁîb toroǃkhamaogu digu ǀkha ǃgaeǀhao-e ge dī. ǁÎgu ge Jerohammi ôab Asariab, Johananni ôab Ismaeli, Obedi ôab Asariab, Adajab ôab Maasejab tsî Sixrib ôab Elisafati tsîga. 2 ǁÎgu ge Judab di ǃādi hoadi ǃnâ ǃgû tsî Leviǁîgu tsî ǃhaoǃnādi ǂgaeǂgui-aogu tsîga Jerusalems ǁga ge hā-ū.
3 ǁÎgu hoagu ge Tempeli ǃnâ ǀhao tsî gao-aob ôab Joasi ǀkha ǃgaeǀhao-e ge dī. Jojadab ge ǁîgu ǃoa ge mî: “Nēb ge gao-aob ôaba. ǁÎb ge nēsi nî gao-ao kai, ǃKhūb ge gao-aob Davidi suriba mîmâiba khami. 4 Nēti ge ge nî dī. Pristergu tsî Leviǁîgu ga Sabbattsēs ai ǃoabas ǃoa a hā, ob ge ǃnonaǁîǃâb ǁîgu diba Tempeli dao-amde nî ǃûi, 5 nau ǃnonaǁîǃâb ge gao-omma nî ǃûi tsî ǃgau ra ǃâb ge ǃGaoǃgaob-Dao-ams tawa nî ǃûimâ. Nau khoen hoan ge Tempeli di omǂnamib ǃnâ nî ǀhao. 6 Khoe-i xare-i ge Tempeli ǃnâ ǂgâ tide, ǃoabasa ra dī pristergu tsî Leviǁîgu ǀguigu ge ǁnāpa nî ǂgâ. ǁÎgu ge a ǂgâ ǁkhā, khaihe gu hâ xui-ao, xawe nau khoen hoan ge ǃKhūb di mîmāsa nî ǁnâuǀnam. 7 Leviǁîgu ge ǁhâigôagu âga ǃomǁae ūhâse gao-aoba ǃûi tsî ǃgûb ka ǃkhai-i hoa-i ai, hoaǁae ǁîb ǀkha nî hâ. Tempeli ǃnâ ga ǂgâ ǂgao khoe-i hoa-i ge nî ǃgamhe.”
8 Leviǁîgu tsî Judab di khoen tsîn ge Jojadab ge mîmā khami ge dī. Mâ-i hoa-i ge ǁî-i khoega ge hā-ūba bi; Sabbattsēs ai ǃoabasa xu ra ǂoaxagu tsî ǁîs ai ǃoabasa nî dīse igu tsîgu hoaga. 9 Jojadab ge gao-aob Davidi di ge i ǁhâigôagu tsî ǁkhaukhōgu, Tempeli ǃnâ ge hâ iga ǂamkhoega ge mā. 10 Tsîb ge mâb hoab, ǁhâigôaba ǃomǁae ūhâ khoega, Tempeli aisǀkhāb ai ge mâ kai, gao-aoba gu nî ǃûise. 11 ǁNās khaoǃgâb ge Jojadaba ǂkham gao-aoba ǂoaxa-ū, kronsa ǀgapa bi tsî gao-aosi ǃoabas ǂhanugu ǁgâiǁnâba, ǁîba ge mā. ǁNāti gu ge Jojadab tsî ǁîb ôagu tsîga gao-aose ge ǀnauǂgā bi tsî gu ge hoaga “Ab gao-aoba ǂomxase ûi re” ti ge ǂgaiǂui.
12 Gao-aos Atalias ge nē ǂkhupib khoen dibas ge ǁnâuo, ǃhaese Tempeli tawa ge sī, khoen ge ǁnāpa ǀhao hâ i xui-ao. 13 ǁNāpas ge ǀasa gao-aoba, ǂnûiǂgās ǃoab Tempeli dao-ams di ǂkhâǃnâhaib tawa mâse ge mû. ǂAmkhoegu tsî xâi-aogu tsî khoen tsîn ge ǁîb ǂnamipe mâ xâiǁnâde xâi tsî gere ǃau, os ge Ataliasa saran âsa ǀkhau tsî “Gāxaǃnâsib, gāxaǃnâsib” ti ge ǂgaiǂui.
14 Jojadab ge Atalias, Tempeli ǃnâ nî ǃgamhesa ge ǂgao tama hâ i tsî toroǃkhamaogu di ǂamkhoega ge mîmā: “ǁÎsa sago mâ ǃkhaiba xu ūǂui, î ǁîsa ga hui ǂgao khoe-i hoa-e ǃgam.”
15 O gu ge ǁîsa ǃkhō, gao-ommi tawa sī-ū tsî Hān-Dao-ams tawa ge ǃgam.
Jojadab ge dī dī-unudi
(2 Gao-aogu 11:17-20)16 Prister Jojadab ge ǃKhūb tsî gao-aob tsî ǁaes tsîn ǁaegu ǃgaeǀhao-e ge dī, în ǁîna ǃKhūb di ǁae kai. 17 ǁNās khaoǃgân ge ǁîn hoana Baali di tempeli ǁga ǃgû tsî ǁîba sī ge hîkākā; ǁîn ge altardi tsî īgu tsîna khôaǃā tsî Baali pristeri, Matanna altardi ais ai ge ǃgam. 18 Jojadab ge pristergu tsî Leviǁîgu tsîga Tempeli ǃoabadi di mûǂamaose ge mâi. ǁÎgu ge gao-aob Davidi xa gu ge ǁguiǂamhe hâ i ǃoabade nî dī. ǁKhāti gu ge Moseb ǂhanub ǃnâ i xoaǁguisa khami, khauǁguibade ǁnaeb tsî dâb ǀkha ǃKhūba nî hā-ūba. 19 Jojadab ge ǁkhāti ǃûi-aoga Tempeli di dao-amdi tawa ge mâi, ǃanuoǃnâ khoe-i xare-i ǁnāpa ǂgâ tidese.
20 Jojadab ge toroǂnubidi ǂgaeǂgui-aogu, ǃās di ǃgôahesagu tsî ǂamkhoegu tsî nau khoen hoan tsîn ǀkha, gao-aoba Tempela xu gao-ommi ǁga ge ǁnū. ǁÎn ge dana dao-ams ǃnâ-u ge ǂgâ tsîb ge gao-aoba trons ai sī ge ǂnû. 21 Hoaraga ǁaes ge kaise gere ǃgâiaǂgao tsîs ge ǃāsa, Atalias ge ǃgamhes khaoǃgâ ge ǃnōsa i.
© Khoekhoegowab Elobmîs © Bible Society in Namibia, 2020.
