2 Gao-aogu 11 - Khoekhoegowab New Translation 2020 (KKG20)

Judab gao-aos Atalias

1 Ahasiab îs Atalias ge ǀgôab âs go ǃgamhe ǃkhaisas ge mû, o hoaraga khoen gao-aob surib din nî ǃgamǂuihe ǃkhausa ge mîmā. 2 Ahasiab ôab Joasi ǀguib ge ge ûiǂoa. ǁÎb ge nau khoen ǀkhab nî ǃgamhes aiǃâ Ahasiab di ǃgâsa tsî ǁkhāti gao-aob Jorammi ôas, Jehosebas xa ge huiǂuihe. ǁÎs ge ǁîb tsî ǀgôaǃûi-aos âb tsîra Tempeli tawa ǁomǃnâ-oms ǃnâ ge gaugau, ǃgamheb tidega. 3 Jehosebas ge ǁîba ǃnani kurigu kōse ge ǃkhōǂhomi tsîs ge ǁîba, Atalias gao-aose ǂnôas kōse Tempeli ǃnâ ge gaugau hâ i.

4 Xawe hûǁî kurib ǃnâb ge prister Jojadaba, gao-aob ǃûi-aogu di ǂamkhoegu tsî gao-ommi ǃûi-aogu tsîna ǁîb ǁga Tempela ǃoa ge hā kai. ǁNāpab ge ǁîgu ǀkha ǃgaeǀhao-e dī tsî mîmâi gu ges khaoǃgâ, ǁîga gao-aob Ahasiab ôaba ǁgau, 5 tsî nēti ge mîmā: “ǃOabas ǃoa go ga Sabbattsēs ai hā, ob ge ǃnonaǁîǃâb sago diba gao-omma nî ǃûi. 6 ǃNonaǁîǃâb ge Surdao-ams tawa nî ǃûimâ tsî ǃnonaǁîǃâb ge nau ǃûi-aogu ǃgâbǀkhāb ai hâ dao-ams tawa nî ǃûimâ. 7 Sabbattsēs ai ǃoabasa xu ra ǂoa ǀgam ǃnanra ge gao-aoba Tempeli tawa nî ǃûi. 8 Sago ge ǁhâigôagu âgo ǃomǁae ūhâse gao-aoba ǃûi tsî ǃgûb ka ǃkhai-i hoa-i ai hoaǁae ǁîb ǀkha nî hâ. Sago tawa ga ǀgū khoe-i hoa-e go ge nî ǃgam.”

9 ǂAmkhoegu ge Jojadab ge mîmā khami ge dī. Mâb hoab ge ǁîb khoega ge hā-ūba bi; Sabbattsēs ai ǃoabasa xu ra ǂoaxagu tsî ǁîs ai ǃoabasa nî dīse igu tsîgu hoaga. 10 Tsîb ge gao-aob Davidi di ge i ǁhâigôagu tsî ǁkhaukhōgu, Tempeli ǃnâ ge hâ iga ǂamkhoega ge mā. 11 Tsîb ge mâb hoab ǁhâigôaba ǃomǁae ūhâ khoega, Tempeli aisǀkhāb ai ge mâ kai, gao-aoba gu nî ǃûise.Tempelǃûi-aob 12 ǁNās khaoǃgâb ge Jojadaba ǂkham gao-aoba ǂoaxa-ū, kronsa ǀgapa bi tsî gao-aosi ǃoabas ǂhanugu ǁgâiǁnâba ge mā bi. ǁNās khaoǃgâb ge Jojadaba gao-aose ge ǀnauǂgā bi tsî gu ge ǁapunǃom tsî “Ab gao-aoba ǂomxase ûi re” ti ge ǂgaiǂui.

13 Gao-aos Atalias ge nē ǂkhupib ǃûi-aogu tsî khoen tsîn dibas ge ǁnâu, o Tempeli tawa ǃhaese ge sī, khoen ge ǁnāpa ǀhao hâ i xui-ao. 14 ǁNāpas ge ǀasa gao-aoba, ǂnûiǂgās ǃoab Tempeli dao-ams ǂkhâǃnâhaib tawa mâse ge mû. ǂAmkhoegu tsî xâi-aogu tsî khoen tsîn ge ǁîb ǂnamipe mâ xâiǁnâde xâi tsî gere ǃau, os ge Ataliasa saran âsa ǀkhau tsî “Gāxaǃnâsib, gāxaǃnâsib” ti ge ǃau.

15 Jojadab ge Atalias Tempeli di ǃkhaib ai nî ǃgamhesa ge ǂgao tama hâ i tsî toroǃkhamaogu di ǂamkhoega ge mîmā: “ǁÎsa sago ǁaeguba xu ūǂui, î ǁîsa ga hui ǂgao khoe-i hoa-e ǃgam.” 16 O gu ge ǁîsa ǃkhō, gao-ommi tawa sī-ū tsî Hān-Dao-ams tawa ge ǃgam.

Jojadab ge dī dī-unudi

(2 Kroniks 23:16-21)

17 Prister Jojadab ge ǃKhūb tsî gao-aob tsî ǁaes tsîn ǁaegu ǃgaeǀhao-e ge dī, în ǁîna ǃKhūb di ǁae kai. ǁÎb ge ǁkhāti gao-aob tsî ǁaes tsîn ǁaegus tsîna ǃgaeǀhao-e ge dī. 18 ǁNās khaoǃgân ge ǁîna Baali di tempeli ǁga ǃgû tsî ǁîba sī ge hîkākā; ǁîn ge altardi tsî īgu tsîna khôaǃā tsî Baali pristeri, Matanna altardi ais ai ge ǃgam.

Jojadab ge ǃûi-aoga Tempeli tawa ge mâi 19 tsî gu ge ǁîb tsî gao-aob ǃûi-aogu tsî gao-ommi ǃûi-aogu tsîga nau khoen hoaragan xa saohe hâse gao-aoba Tempela xu ǃÛi-aogu Dao-amsa-u, gao-ommi ǁga gere ǁnū. 20 Hoaraga ǁaes ge kaise gere ǃgâiaǂgao tsîs ge ǃāsa, Atalias ge gao-ommi tawa ǃgamhes khaoǃgâ ge ǃnōsa i.

21 Joasi ge hû kurixab a hîa ge Judab di gao-ao kai.