Nau ǂgomsaben ǃoagu hâ ǃereamxasib
1 Tātsēs tsîna tā kaira aoba ǁkhōse ǃgabe, xawe sa îb ǂûb khami ǃgôasib ǀkha ǀkhoma bi. ǂKham aogu ǀkha sa ǃgâsa-i ǂû-i khami ǃhoa. 2 Sa îs di ǃgôasiba kaira tarade mā, î hoa ǃanusib ǀkha ǂkham tarade ǃgôa, sa ǃgâsadi ase.
3 ǀGuriǃgâ ǃoatarade ǁîdi ǂhân hoan ǃnâ mâxōǀkhā. 4 Xawe ǀgôan tsî ǁnuriǀgôana ūhâ ǃoatarasa as ǁîn xa ǂhâsib âs ǃnâ mâxōǀkhāhe. Nēs ge a ǁîn di ǂguro elosi ǁgui-ai, omaris ǃaroman nî dīǀoaǀoasa tsîn ge ǁnā ǀgaus ai ǁgûn tsî ǁnaosana nî mādawa-am, Elob nēs ǃnâ kai ǃgâiǃgâibasensa ūhâ xui-ao. 5 Kaise ǀguriǃgâ tsî khoe-o taras ǀguis ge a ama ǃoatara tsî ǃâubasens âs hoasa Elob ǃnâ ūhâ. Tsēs tsî tsuxubas ge ǀû tamase Elob ǃoa ǀgores ǃnâ huiba ra ǂgan. 6 Xawe ǃgâiǃgâisens ûib ǀguiba ǀnam ǃoataras ge ǀnai gagasise ǁō hâ, ûitsamaǃâ. 7 Nē ǁgui-aide kerkheba mā, î di ǃoataradi hîab ra mâxōǀkhāde tā khoe-i xare-i xa ǀauhe. 8 Khoen hîa ǁîn di ǀaokhoen tsî ǃnāǂamsase omaris ǂûsa ǁae-ū taman hoan ge ǂgoms âna ra ǀūxū tsî ǂgomoǃnâ khoe-i ǃgâ-ai a tsū.
9 ǁNā ǃoataras hîa ǁaubexa a ǃnanidisi kurixas tsî ǁîs ǃgameb ǃnâ ge ǂgomǂgomsa is ǀguis ge nau ǃoataradi ǃnâ nî ǃgôaǂgāhe. 10 ǃGâidīgu âs ǃaromas ge khoen hoan xa kai ǃgôasiba nî māhe. ǁÎs ôanas ge ǂhanuse ge kaikai, ǃhaokhoenas ge oms âs ǃnâ gere ǁkhoreǁhare tsî hoa ǃgamǃgamsens ǃnâ nau ǂgomsabena gere ǃkhōǃoa. ǁÎs ge ǂhâb ǃnâ hâna gere hui, tsî ge ǂgomǂgomsa i ǃgâina dīs ǃnâ.
11 Tā ǂkham ǃoatarade nau ǃoataradi ǃnâ ǃgôaǂgā, ǁîdi aoǂhâsiturab nî Xristub* ǃnâ di ūhâ ǂgomǂgomsasiba dan tsî di nî ǃhaese ǃgame ǂgao xui-ao; 12 tsî ǁnās xa ǃaromahe hâse nî ǀgoraǃgâhe, ǀnai di ge mîmâi mîmâisa khôas ǀkha. 13 Omsa xu oms kōse di ge ǀhoeǂnûmas ǀkha ǁaeb âde ǁore, nau khoen ǂhôan ǀkha ǂnûkhâisen tsî mî ǁoa di a xūn tsîna ra mî. 14 ǁNā ǃkhais ǃaroma ta nî ǂgans ge, î di ǂkham ǃoatarade ǃgame tsî ǀgôana hō tsî omdi âde kōǃgâ. Nēs ge khākhoeba ǃēsa mā tide, sage ǃoagub tsū xū-e nî mîse. 15 ǀNai di ge ǀnî ǂkham ǃoatarade ǁnā ǀgaus ai ǁnāǁgôa tsî Satanni* di ǃkhōsis ǃnâ ge ǂgâ. 16 ǂGomsabe taras ga ǁîs omaris ǃnâ ǃoatarade ūhâ, os ge ǁîde nî hui, îb tā kerkheba ǁîdi ǃereams tsîna ūhâ tsî ǂâu hâse ǀguri hâ ǃoatarade hui ǁkhā.
17 ǃGâise ra ǂgaeǂgui ǂnomdomgu* ge ǀgamǃnâgu hōdawasa anu hâ, ǃgōsase ǀgaisa sîsenna aoǁnâs tsî ǁkhāǁkhās ǃnâ ra dīga. 18 Nētis ra Xoasa mî xui-ao: “Tā ǃhoroba ra dāǃgâ-ūhe gomaba ǃgae-amǃgâ!” tsî “Sîsenaon ge ǁîn di mataresa nî māhe.” 19 Khoe-i ga ǂnomdom-i ǃoagu ǀauxū-e ūhâ tsî ǀgam tamas ka io ǃnona ǀhûǀguitimî-aona ūhâ tama io, tā ǁnāti ī khoe-e ǃgâs tsîna hî. 20 Xawe i ga ǂnomdom-e a ǁore, o hoaraga Xristesi ǀhûhâsib aiǃâ ǁî-i ǁoreba ǂhaiǂhai, î-i ǂhanu ǀgaub ai Eloba ǃaoǃgâ ǁkhā.
21 Elob tsî Xristub Jesub tsî ǁhûisa ǀhomǃgāgu tsîn di ǂans ǃnâ ta ge ǁkhoase ra mîmā tsi, ǀkhāǁhûi tamase tamas ka io ǀō-aisa khoe-e ǃkhōǂuibasen tamasets nî nē ǁgui-aidi hoade ǁnâuǀnam ǃkhaisa. 22 Tātsēs tsîna tā ǃhaese ǃomkha ǁgui-ais ǀkha ǂnomdomna mâi. Tā ǁkhāti naun di ǁoren ǃnâ ǁhao, xawe ǁî-aitsama ǃanusiba ǁgūba.
23 ǃNāb di ǀaeb hîats hoaǁae ūhâb ǃaroma, tā ǁgam-i ǀgui-e ā, xawe ǂkharirose ǂauxûi-i tsîn xa ā.
24 ǀNî khoen di ǁoren ge kaise a ǂhaisa hoan mûdi aiǃâ tsî ǀgoraǃgâs âna ra aiǃgûba. Xawe ǀnî khoen di ǁoren hîa ǂganǃgâsib ǃnâ ra dīhen ge ega nî ǂhai. 25 ǁKhā ǀgaub ai gu ge ǃgâidīgu tsîna nî ǂhaisa tsî ǁkhāti ǁnāgu hîa ǂhaisa tamagu ge ǂganǃgâsase a hâ ǁoa.
© Khoekhoegowab Elobmîs © Bible Society in Namibia, 2020.
