ǃAnu ǁaes
1 ǁNā-amaga ǁguiǁnâ ǂkhabasib hoab, gāxaǃnâsib, ǀgamaixasib, surigub tsî mîǁgaiǁgaigub hoaba, 2 î du ǀase ǃnae hâ ǀgôaron xase, turaxaba ǃanu gagasi dai-e, î du ǁî-e ra āse ǀomkhâi tsî ǃgâiǃō kaihe. 3 Sadu ge ǀnai ǃKhūb di ǃgâiba tsâtsâ hâ. 4 ǁÎb tawa hā. ǁÎb ge ûitsama ǀui, khoen xa ge ǂharaheb, xawe Elob xa ge ǃkhōǂuibasenhe tsî ǀgapi ǃgôaheba. 5 Tsî nēsi du ge sado ǁnā ûitsama ǀui, gagasi om-i nî ǂnubi-ūhedo. Sadu ge ǁkhāti ǃanu pristerse nî ǃoaba tsî gagasi ǁguiba-i Eloba ūǃoasaba-e nî ǁguiba, Jesub Xristub* ǃnâ-u. 6 ǁNā-amaga i ge Xoas ǃnâ xoahe hâ:
“Mû, tita ge ǀuib
ǁhûiǂuisa tsî ǃgomǀgausaba
Sions ǃnâ ǁhôaǀuib ase ra ǁgui.
ǁÎb ǃnâ ra ǂgom-i hoa-i ge taotaohe tide.”
7 Sadu ǂgom hâdob ge a ǃgomǀgausaba, xawe i ge ǂgomoǃnân ǃoa ra mîhe:
“ǁNā ǀuib, ǂnubi-aogu xa ge ǂharaheb
ge ge ǁhôaǀui kai”
8 Tsî
“ǀUib khoena nî ǃnôa kaib
tsî ǃhaob ǁîna nî ǁnā kaiba.”
ǁÎn ge nî ǃnôa, ǁîn mîsa ǁnâuǀnam tama amaga, ǁnātis ge Elob ǂâisa ǁîn ǃaroma ge ī i.
9 Xawe sadu ge a ǃkhōǂuibasensa ǃhao, gao-aosi pristersi tsî a ǃanu ǁae. Elob ge sado ǃkhaenaba xu ǁîb buruxa ǃnâb ǃoa ge hā-ū tsî du ge nēsi ǁîb buruxa dīn xa nî ǃhoa.
10 “Sadu aibe ge ǁaese ī tama hâ i,
xawe nēsi Elob di ǁaedo.
Aibe ǀkhomxahe tama ge hâ i
xawe nēsi ǀkhomxahe hâdo.”
Elob di ǃoaba-aon ase ûi
11 ǀNamsabedo, sadu ǃhaokhoese tsî ǃhūsabese īdo ta ra ǁnama, sorosi turagu ǀoms ǃoagu ra ǃkhamga xu ūdabasen. 12 ǁKhāti sadu tanisensa Jodeǁî taman ǃnâ ǃgâiǂūxase ūhâ, în sadu xan ga ǂkhabadī-aon ase ǃhoao, sadu ǃgâi sîsenga mû tsî Eloba kare ǁîb di Hātsēs ai.
13 Khoesi ǂnûiǂgā-i hoa-e ǃnaka hâba ǃKhūb ǃaroma, gao-aob kao, hoan xa kai ǀgaiba ūhâb ase, 14 ǀkharisi mûǂamaogu kao, ǂkhabadī-aona ǁkhara tsî nî ǃgâidī-aona koase ǁîb xa ǁgaumâihe hâga. 15 Elob ge ǁnā ǃhoaxūn gâre khoen ra ǃhoana du nî sadu di ǃgâi dīgu ǀkha ǃnōǃnō ǃkhaisa ra ǂhâba. 16 ǃNorasa du ge a, xawe du ge sadu ǃnorasasiba ǂkhabab di ǃgū-aixūse ūhâ tama, xawe Elob di ǃgādu ase ûi. 17 Mâ-i hoa-e ǃgôa, ǂgomsabena ǀnam, Eloba ǃao î gao-aoba ǃgôa.
Xristub tsâb di aiǁgaus
18 Sadu ǃgādo, ǃaoǃgâb ǀkha ǀhonkhoena ǃnaka hâba, ǃgâi tsî tsamtsiǃnân ǀguin ose xawe ǁkhō-an tsîna. 19 Elob nî nēs ǂama ǀkhae tsi xui-ao, sats ǃoagu ga ǂhanuoǃnâ-i di tsûbats ga tsâo, Elob ǃoaguts ga ǂgomǂgomsa ǂgao ǃkhais ǃaroma. 20 Tare xū-e i nî harebeba tsi, tsūdī tsîts ga ǁnās ǃaroma ǂnauheo? Xawe ǃgâidī tsîts ga ǁnās ǃaroma tsâ tsî ǁîsa tani, ob ge Eloba sats ǃnâ ǃgâiǃgâibasensa ūhâ. 21 ǁNās ǃoa du ǂgaihe hâ xui-ao, Xristub tsîn ge sado tsâba tsîb ge aiǁgau-e ǃgoroba du amaga, Elob di daoga du nî saose. 22 ǁÎb ǁore-i xare-e dī tamab tsî ams âba xu i gāxaǃnâsi-i xare-e ǂoaxa tamaba. 23 ǁÎb ǃkhāǃkhāheb geo, ǃkhāǃkhā ǃoa tamab tsî tsâb geo, mâǃoa tamab, xawe ǁîb di ǃâubasensa Elob ǂhanu-ai ǀGoraǃgâ-aob ǃomǁae ge māǁnâba. 24 ǁÎb, sada ǁorena ǁîb di soros ǂûs ǃnâ ǃgâuhaib* ai ge taniǃapab, ǁorena ǁōǁnâ hâse da nî ǂhanu-aisiba ûibaga. ǁÎb di ǀhapina xu da ge ǂgauba. 25 ǁHapuma ra gūn xase du ge ī i, xawe du kom nēsi ǃhobasen hâo sadu ǀomdi di ǃÛi-aob tsî Sâu-aob ǃoa.
© Khoekhoegowab Elobmîs © Bible Society in Namibia, 2020.
