1 Gorgiab ge koroǀoadisi ǀnūtoroǃkhamaogu tsî ǃnāsa ǂansa ūhâ hātoroǃkhamaogu tsîna ū tsî tsuxuba toroǃkhamaogu hâǃkhaiba xu 2 Jerusalems di ǁkhui-ommi di khoegu ǀkha, ǁîb di daoǁgau-aogu ase ge ǂoa. ǁÎb ge ǃnapetama gu hâ, hîa Jodeǁîgu di toroǂnubisa ǁnāǂamsa ge ǀape hâ i. 3 Xaweb ge Judaba nē ǀapes xa ǁnâu tsî gao-aob toroǂnubisab nî Emmaus tawa, 4 Gorgiab tsî ǁîb toroǃkhamaogu ganupe hâǃkhaib tawa ǀkhai hîa nî ǁnāǂamse ge ǂoa. 5 Gorgiab tsî ǁîb di toroǂnubis tsîn ge ǁnā tsuxuba gu ge Judab di hâǃkhaib tawa sī, o khoe-i xare-e ǁnāpa ge ǀhao-ū tama ge i. ǁÎgu ge Judab tsî ǁîb khoegu tsîn ge ǃkhoeni ti ǂâi tsî ǁîga ǃhomgu ǃnâ gere ôa.
6 ǁGoagab ge Judaba ǁâtanisen gu nî khami ge ǁâtanisen tama hâ i ǃnonaǀoadisi khoegu ǀkha ǂgāb ǃnâ ge ǂkherexa. 7 ǁÎgu ge Jodeǁî taman di kai toroǂnubis, ǂansa ūhâ, torosarana ana tsî hātoroǃkhamaogu xa ge hâǂnamihe hâ isa ge mû. 8 Ob ge Judaba ǁîb khoegu ǃoa ge mî: “Tā toroǂnubis di kōsib xa ǂâiǂhansen, î ǁîgu ga ǁnāǂam go, o tā ǃhuri. 9 Mâti gu ge sada aboxaga Faraob xa gu ge ǁîb di toroǂnubis ǀkha ǃgôaǃgonheo, ǀApahurib tawa huihe, ǀgaus xa ǂâi re. 10 A ge nēsi ǃKhūb di ǀkhomma ǂgan. A ge ǀgore, îb sada aboxagu ǀkhab ge dī ǃgaeǀhaos xa ǂâi tsî nētsē ge ga nē toroǂnubisa ǁnāǂamo, ǁîsa ǂkhūǂkhū. 11 On ge hoaraga Jodeǁî tamana Israelǁaes, huiǂui tsî ra sâu Eloba ūhâ ǃkhaisa nî ǂan.”
12 Tsî Jodeǁî tamagu ge Judab tsî ǁîb khoegu ra torob ǃaroma ǂhomisen ǃkhaisa a mû, 13 o gu ge ǁîgu di hâǃkhaiba xu ǃkhammi ǃoa ge ǂoaxa. O gu ge Judab tsî ǁîb di khoega xâiǁnâdi âga xâi 14 tsî ge ǁnāǂam. Jodeǁî tamagu ge ǁnāǂamhe tsî ǂgāb ǃoa ge ǃkhoeni, 15 xawe gu ge khaos ai ge hâ igu hoaga ge ǃgamhe. Israelǁîgu ge khākhoega Gesers, Idumeab di ǂgāgu tsî Asotus tsî Jamnias tsîra kōse ǃgôaǃgon tsî ǁaubexa ǃnonaǀoadisi khoegu, khākhoen diga ge ǃgam.
16 Judab tsî ǁîb toroǃkhamaogu ge ǃgôaǃgonsa xu a oahā, 17-18 ob ge ǁîb khoegu ǃoa ge mî: “Gorgiab tsî ǁîb toroǂnubis ǀgūse ǃhomgu ǃnâ hâ tsîs ǀgaisa ǃkhamsa ganupe ǃâu ge hâ, xuige tā aibe ǁkhâuǁnâsǀî ǁgū. A ge mâǀgai tsî ǃkham. ǁNās khaoǃgâ go ge ǃnorasase, ǂhâba go hâs kōse, xūna ǁkhâuǁnâbasen ǁkhā.” 19 Judab ra gowaǀîs ǀkha toa, hîa gu ge ǃkhē-aoga ǃhomgu xu ge ǂkherexa. 20 ǁÎgu ge ǁîgu khoegu ge ǃkhoeni ǃkhaisa ge mû, tsî ǀanna gu ge mû, o gu ge ǁîgu di hâǃkhaib ra ǂhubi ǃkhaisa ge ǂan. 21 Nēn hoana gu ge mû, o gu ge ge ǃao tsî Judab toroǂnubis torodīs ǃoa, ǂgāb ǃnâ ǂhomisen hâ ǃkhaisa gu ge mû, 22 o gu ge Filistias ǃoa ge ǃkhoeni. 23 Ob ge Judaba khākhoen hâǃkhaib tawab nî ǁkhâuǁnâga oa tsî kai ǃgôab di ǃhuniǀurib tsî ǀhaiǀurib, ǂhoa tsî ǂhoaǀapa saran tsî ǀnî ǃkhūsib tsîna ge ǁkhâuǁnâ. 24 Jodeǁîn ge ǁîn di hâǃkhaib ǃoan ge oahāo, “ǃKhūb ge koahesa anu; ǁîb di ǀkhommi ge ǀamos kōse ra hâ” ti koatsanasa ge ǁnae. 25 ǁNā tsēs ais ge Israelǁaesa kai dansa ge ǃkhōǃoa.
Judab ge Lisiaba ra dan
(2 Makabergu 11:1-12)26 Ûiǂoa ge Jodeǁî tama toroǃkhamaogu ge īgen hoana Lisiab tawa ge sī ǃnuri. 27 Lisiab ge ǁîb toroǃkhamaogu go toroba a ǂoaǃnâ ǃkhaisab ge ǁnâu, o gao-aob ge mîmā hâ i khamis ge Israelǁaesa danhe tama i ǃkhais xa ǀūa-ai tsî ge ǂkhabuǂâi.
28 Sao ra kurib ge Lisiaba ǃnanidisiǀoadisi ǃgâise ǁkhāǁkhāsa ǀnūtoroǃkhamaogu tsî koroǀoadisi hātoroǃkhamaogu tsîna Jodeǁînab nî ǃgôaǃgonse ge ǀhaoǀhao. 29 ǁÎgu ge Idumeab ǃnâ ǂgâ tsî hâǃkhaiba Betsurs tawa ge ǂnaumâi. Judab ge disiǀoadisi khoegu ǀkha ǁîgu ǃoa ge hā. 30 Judab ge mâtikōses khākhoen di toroǂnubisa a ǀgaisa ǃkhaisab ge mû, o ge ǀgore: “ǃGâiǃōdī-aots Israelǁaes ditse, sida ge nî koa tsi. Sats ge ǀgaisa khoeb di ǁnāǂamsa, sa ǃgāb Davidi ǃnâ-u ge hîkākā, tsîts ge Sauli ôab Jonatanni tsî ǁîb di ǁâtanina gere tani ǂkham khoeb tsîkha nî hoaraga Filisteǁîn di toroǂnubisa dan ǃkhaisa ge īǁkhā kai. 31 ǁNā ǀgaub ǁkhāb ai as sa ǁaes Israelǁaesa, sida khākhoena dan re. ǁÎgu di ǂgomǃgâs hîa gu ǁîgu di ǀnūtoroǃkhamaogu tsî hātoroǃkhamaogu ǃnâ ūhâsa taotao re. 32 ǁÎga ǃaoǃao, î ǁîgu ǁēsib di ǀgaiba ǂkhabu kai re; a gu hîkākāhe gu nî ǃkhais xa ǀkhū re. 33 Sige ge satsa ǀnam tsî ra ǀgoreǀî, xuige age sige khākhoena ǃgam, î ge koatsanade ǁnaeba tsi ǁkhā re.”
34 ǃKhammi ge ge tsoatsoa, tsî gu ge ǃkhamgub ǃnâ ǁaubexa koroǀoadisi khoegu Lisiab diga ge ǃgamhe. 35 Lisiab ge ǁîb di toroǂnubis ra danhe tsî Judab tsî ǁîb khoegu di ǁkhoaǂgaoxasib, ûi gu kas, ǁō gu kas hoasa gu ǁîgu ǃgôasib ǃoa ūhâb tsînab ge mû, o Antioxs ǃoa ge oa. ǁNāpab ge ǀnîkhamakō ǀkhupitoroǃkhamaoga, egab Judeab ǃoa kai toroǂnubis ǀkha nî oase ge ǀhaoǀhao.
Tempeli di ǃanuǃanuhes
(2 Makabergu 10:1-8)36 O gu ge Judab tsî ǁîb ǃgâsaga ge mî: “A ge sage khākhoena ge go dan xuige, nēsi Jerusalems ǃoa ǃgû tsî Tempela ǃanuǃanu tsî khai.” 37 O gu ge hoaraga toroǂnubisa ǀhaoǀhao tsî Sionǃhommi ǃoa ge ǃgûǃapa. 38 ǁNāpa gu ge Tempela ǃūke-aisa, altarsa ǃanuoǃnâ kaihe, dao-amde ǂhubiǁnâhe, omǂnamisa ǃkhaiba ǀomatsân xa haiǀgoms ase ī tsî di pristergu di ǃnā-omde khôaǂkhūhe hâ ǃkhaisa ge mû. 39 ǁÎgu di ǃoab ǃnâ gu ge saran âga doaǃā, ǃgarise ǃau tsî tsaoba ǁîgu di danadi ai tsoro, 40 tsî aisǂama ǃhūb ai ge ǁnāǁgoe. Tsî xâiǁnâdi ǀkhas ge ǂanǂansa a mâhe, o gu ge hoatsama ǃKhūb ǃoa ge ǂgaiǂui.
41 Ob ge Judaba ǀnîgu ǁîb toroǃkhamaogu diga ge mîmā, î gu ǁîga, ǁîb ra Tempela ǃanuǃanu, hîa ǁkhui-ommi ǃnâ hâ khoega ǁnāǂam. 42 ǁÎb ge ǀhapio tsî ǂhanub ǃoa ǂgomǂgomsa pristerga ge ǁhûiǂui. 43 ǁÎgu ge Tempela ǃanuǃanu, ǀuriǀurihe hâ ǀuide ūbē tsî ǁîde ǃanuoǃnâ ǃkhai-i tawa sī ge ǂnûi. 44 ǁÎgu ge tare-i nî khauǁguibadi di altars, Jodeǁî taman xa ge ǃanuoǃnâ kaihes ǀkha dīhe ǃkhaisa ge ǃhoaǂam. 45 ǁÎgu ge ǁîn taosib ǃoas nî ǁgauǁgausao-i ase mâs xas nî khôaǁnâhe ǃkhaisa ge mîǀgui. 46 Tsî gu ge ǀuide ǃgâi ǃkhai-i ai Tempelǃhommi ai ge ǀhaoǀhaoǂnûi, kēbo-aob nî ǀkhī tsî tare-eb nî ǁîdi ǀkha dī ǃkhaisa mîǁguis kōse. 47 ǁNās khaoǃgâ gu ge Moseb ǂhanub ra ǂgaoǀkhā khami, khôasa tama ǀuide ū tsî ǀasa altars, hîa ǀoros khami īsa ge ǂnubi. 48 ǁÎgu ge Tempela ǂganagab tsî ǃaugab ǃnâ kuru-unu tsî ǁîb di omǂnamisa ǃkhaiba ge khai. 49 ǁÎgu ge ǃoabas ǃaroma ǀasa xapana ge kuru tsî ǃamǀaekandelari, ǀanǀanaltars tsî ǁguibaperen di tāb tsîna Tempeli ǃnâ ge ǂgâ-ū. 50 ǁÎgu ge ǃgâihamxūna altars ai ǂhubi tsî ǃamǀaedi kandelari ai hâde ge ǃamam tsîb ge ǃnâba Tempeli ǃnâ ge hâ! 51 ǁÎgu ge perena tāb ai ǂnûi, mûǂuidaolapiga ǂgāmâi tsî hoaraga sîsenna ge dītoa. 52-54 ǀGamdisikoroǀaǁî tsēs, khoeseǁî ǁkhâb, Kislefi dis, ǀguikaidisi tsî hakadisiǁkhaisaǀaǁî kurib dis ǃnâ di ge khauǁguibade ǂhanub ǃnâ xoamâihe hâ khami, ǀasa altars hîa gu ge ǂnubis ai ge dīhe. 55 Hoaraga khoen ge ǃhūb kōse ǃgamǃgâ tsî ǁînab ge dansa mā ǃkhais ǃaroma, ǃKhūba ǀgoreǀî tsî ge koa.
56 ǁÎn ge altars di khaihesa ǁkhaisa tsēde ge ǁâudī. Kai ǃgâiaǂgaob ǀkhan ge khauǁguibadi, ǂkhîbagus ǁguibadi tsî ganganǁguibadi tsîna ge ǁguiba. 57 Tempeli di aisǀkhāban ge ǃhuniǀuri krondi tsî ǁkhaukhōdi ǀkha ani, dao-amdi tsî pristergu ǃnā-omde kuru-unu tsî dao-amde ge ǂnûiba. 58 Jodeǁîna ge Jodeǁî taman ge hā-ū hâ i taosiban ge ūbēo, kai ǁâudība ge ūhâ i. 59 On ge Judab, ǁîb ǃgâsagu tsî hoaraga ǀhûhâsib Israelǁaes dib tsîna altars di khaihes nî ǃgâiaǂgaob tsî dâxasib ǀkha ǁkhā ǁaeb kurib dib ai, ǀgamdisikoroǀas, Kislefi dis ai tsoatsoa tsî ǁkhaisa tsēde nî hâ ǃkhaisa ge mîǁgui.
60 Tsîn ge ǀgapi ǂnubiǂgoagu tsî ǀgaisa ǂgō-omgu tsîna, Jodeǁî taman ǁkhawa ǂgâxa tsî ǁîba dāǂkhū tsî ǀuriǀuri tidega Sionǃhommi ǂnamipe ge om. 61 Judab ge Tempela nî ǃûise, toroǃkhamaoga ǁnāpa ge hâ kai. ǁKhātib ge ǃās Betsursa Israelǁaes nî Idumeaba mâǃoa ǁkhāga, ǀgaisa ǂnubiǂgoab ǀkha ge omǂnami.
© Khoekhoegowab Elobmîs © Bible Society in Namibia, 2020.
