2 Makabergu 10 - Khoekhoegowab New Translation 2020 (KKG20)

Tempeli di ǃanuǃanuhes

1 Judab Makabaeub tsî ǁîb di saoǃgonaogu ge ǃKhūb di ǂgaeǂguis ǃnaka Tempeli tsî Jerusalems tsîra ge ū-oa. 2 ǁÎgu ge ǁamaguǃkhaib ai ge ommâihe hâ i altarsa khôaǁnâ tsî nau ǃkhaigu, ǀgoreǀîs ǃaroma ge omhe hâ iga ge hîkākā. 3 Tempela ǃanuǃanu tsî gu ge ǀasa altarsa ge om. ǀUide ǂnanǀhao tsî gu ge nanib ǀkha ǀaesa khau tsî ǀgam kurikha ǁaeba gu ge dī tama hâ i ǁguibade ge dī, ǃgâihamxūna ǂhubi, ǃamǀaede ǃam tsî ǃanu perega ge ǁguiǂui. 4 Nēn hoana gu ge dīs khaoǃgâ gu ge ais ǂama ǃhūb ai ǁgoe tsî ǁkhawab ǃKhūba ǁnāti ī ǃgomsib ǀkha ǁkharagu tidega ge ǀgore. ǁÎgu ge ǃgoaxaǁaeb ǃnâ gu ga ǁoren ǃaroma ǁkharahe, ob nî Eloba ǀkhomxa gu tsîb ora ǀūben ǃomǁae māǁnâgu tide ǃkhaisa ge ǀkhoma. 5 ǁÎgu ge ǀgamdisikoroǀaǁî tsēs Kislef ǁkhâb dis ai Tempeli hîa ge Jodeǁî taman xa ǁkhā ǁkhâb tsî tsēs ai ǀuriǀurihe hâ iba ge ǃanuǃanu. 6 Nē ǁâudīb ge ǃgâiaǂgaob ǀkha ǁkhaisa tsēde ǁHaodi ǁÂudīb khami ge dīhe. ǁÎn ge mâtin ge ǂkhari ǁaero-e nē ǁHaodi ǁÂudīb aiǃâ, noxopa ǀgurun tsî xamarin khami ǃhomgu ǃnâ tsî ǁhoadi ǃnâ ǁan hâ i ǃkhaisa gere ǂâihō. 7 Xawen ge nēsi palmǂgonagu tsî tsaura ǁnâun ǀkha anihe hâ haiga tani hâse, ǁîb ǂhunuma Tempeli âba ge ǃanuǃanuba koatsanade ra ǁnaebase gere ǃgûma. 8 Hoan ge Jodeǁîn nî nē ǁâudība kurikorobe tsēdī ǃkhaisa ge mîǁgui.

Ptolemib Makronni ge ra ǃgamsen

9 Antioxub Epifaneb di ûitsēdi ge ge ǀam. 10 Nēsi da ge eloxoresa ge i aob di ôab Antioxub Eupatori xa ra ǁgamba du ǂgao tsî ǂkhaba sîsenǂuigu ǁîb di torogu diga nî ǃkhōǀhao. 11 ǁÎb ge gao-ao kai, ob ge Lisiab ti ǀon hâ khoeba hoa xūn di mûǂamao tsî danaǂgaeǂgui-aob Kai Siriab dib ase ge ǁgaumâi. 12 ǁNās ǀkhab ge Ptolemib Makronni, ǂguro ǂgaeǂgui-aob Jodeǁîna gere ǃgâise sîsenūba ge ǃkhōǃkhuni. Makronni ge ǁîb di ǂkhîb di khoexagusisa ǁîn ǃoagu ge dīhe ǂkhabadīna dīdawa-ams ǃaroma ge dī. 13 ǁNās xa ǃaromahe hâse gu ge Gao-aob di ǀHōsaga Eupatori ǃoa ǃgû tsî Makronna, ǁîb ge Sipruǃnāǃnuis hîab ge Egipteb gao-aob Filometoriba ǂgaeǂguis ǃaroma mâi bisa ǁnāxū tsî Antioxub Epifaneb ǃoa ge ǃgû xui-ao ǁîba ǀhôagaosib ai ge ǀanaǃgâ. Mâ-i hoa-i ge Makronna ǀapexū-aob ti gere ǂgai. ǃGôasib ǁîb sîsenǃkhaib gere ǁîba ǂgaoǀkhāba mâǀoa ǁoa tsîb ge ǃgā-i ǀkha ge ǃgamsen.

Judab Makabaeub ge Idumeaǁîna ra dan

(1 Makabergu 5:1-8)

14 Gorgiab ge Idumeas di ǂgaeǂgui-ao kai, ob ge ǀkhupitoroǃkhamaogu ǁîb tawa ge hâ i gu ǀkha ǃēsab ra hō ǁaeb hoaba Jodeǁîna gere ǁnāǂam. 15 ǁNās xōǀkhān ge Idumeaǁîn hîa gere ǀnî ǀgaisa hâǃkhaiga ǂgaeǂguina ǀû tamase Jodeǁîna gere ǀkhaoǁore. ǁÎn ge Jerusalemsa xu ge ǃkhoenina ǁkhoreǁhare tsî mâ ǀgau-i hoa-i ai torob ǀkha aiǃgûsa gere dītsâ. 16 Judab Makabaeub tsî ǁîb khoegu tsîn ge huib ǃaroma Elob ǃoa ǀgore, ǃhaese ǂoa tsî ǀgaisa ǁnāǂamsa Idumeab di ǀgaisa hâǃkhaigu ǃoagu ge dī. 17 ǁÎgu ge ǁnān hîa gere ǂnubiǂgoaga ǁkhaubanna ǃkhamǃoa, ǀgaisa hâǃkhaiga ǁkhâuǁnâ tsî hō gu ra khoe-i hoa-e gere ǃgam. ǁNāti gu ge ǁaubexa ǀgamdisiǀoadisi khoena ge ǃgam.

18 ǁAubexa khoeseǀoadisin khākhoen din ge supuse ǁkhaubahe ǁkhā ǀgam ǁkhui-omkha, hoa ǁkhaubaxūn ǀkha aiǂhomihe hâkha ǃoa ge ǁhaiǁhâ. 19 Judab ge ǀnî ǃkhain ǃhūb din, kaiseb ǂhâbahe hân ǃoa ge ǃgû, xawe Simonni tsî Josef hâkha, Saxaeub tsî ǁîb toroǃkhamaogu ǀkha ge ǁnāxū. Nē toroǂnubis ge ǁnātikōse ge kai i tsî ǁnāǂams ǀkha ge aiǃgû. 20 Xawe ǀnîgu Simonni digu ge ge mariǃgunuxa i tsî ǃnanidisihakaǀa kiloxramgu ǀhaiǀuriba gu nî māhe ti gu ge mîbahe, o ǀnî khākhoena ǁkhui-omga xu ge ǃkhoeni kai. 21 Judab ge taren ge ī ǃkhaisab ge ǁnâu, o ǁîb di toroǃkhamaogu di ǂgaeǂgui-aoga ǂgaiǀhao tsî ǁnā khoegu ge khākhoena ǁîn ǃoagun nî ǃkhamga ǃnora kais ǀkha, ǁîgu di ǃgâsaga ǁamaxū ti ge ǃnuriǃgâ. 22 ǁÎb ge nē ǀapexū-aoga ǃgam tsî ǀgam ǁkhui-omkha ǁnātimîsi ge ǁkhâuǁnâ. 23 Judab ge hoaǁae torodīs ǃnâ ge ǃgâiǃgâ i tsî nē ǀgam ǁkhui-omkhab ge ǁnāǂam, o ǀgamdisiǀoadisis xa ǃnāsa khoega ge ǃgam.

Judab ge Timoteuba ra dan

24 Timoteub, ǀnai ge Jodeǁîn xa danhe hâ ib ge kaise ǂgui ǀkhupitoro-aoga ge ǀhaoǀhao tsî ǂgui ǃgôab di hātoro-aoga Asiaba xu ǀhaoǀhao tsî Judeabab nî ǀgaisa torodīs ǀkha ūǃkhuniga ge aiǃgû. 25 Xawe khākhoen toroǃkhamaogu ra ǀgū khami gu ge Judab tsî ǁîb khoegu tsîna Elob ǃoa ge ǀgore. ǁÎgu ge ǃoab sarana ana, ǃhūba ǁîgu danadi ai tsoro 26 tsî aidi ǂama altars aiǃâ ǁnāǁgoe tsî Eloba, ǂhanub ǃnâb mîmâi hâ khamib nî ǁîn di khākhoen ǃoagu ǃkhamga ge ǀkhoma.

27 ǀGoretoan ge on ge ǁîn ǁâtanina ūkhâi, Jerusalemsa xu ǂâu hâ kō ǃnūse ǂoa tsî khākhoena xu ǃnū tamase ǃoes ǃaroma sī tentomde ge ǂnaumâi. 28 Sores ǁhaib ǀkha ra ge nē ǀgam toroǂnubira torob ǃnâ ge ǀhao. Jodeǁî toroǃkhamaogu ge ǁîgu di ǁkhoaǂgaosib tsî dan gu nî ǃkhais di ǂgoms ǃKhūb ǃnâ gu ge ūhâ is ai ge ǂgomǃgâ hâ i, xawe khākhoegu ge ǁîgu di ǃkhamǁkhāsib ai ǀgui ge ǂgomaiǂnûi hâ i. 29 ǃKhammi ge kaise a ǀgai, o gu ge khākhoega koro ǀgaisa khoega ǃhuniǀuri tomde ūhâ hāgu ai Jodeǁî toroǃkhamaoga ra ǂgaeǂguise ge mû. 30 Nē koro khoegu ge Judaba hâǂnami, ǁîgu di ǂhunuma ǁâtanin ǀkha ǁkhauba tsî ǂāgu tsî napagu tsîn ǀkha khākhoega ge ǁnāǂam. Khākhoen di toroǃkhamaogu ge ǀgommaǂâi, ǂgī kaihe tsî ge ǀgaruǀgaruhe tsî Jodeǁîgu xa ǃâdi ǃnâ ǁaraǃāhe. 31 ǀGamdisiǀoadisi tsî korokaidisi ǀnūtoroǃkhamaogu tsî ǃnanikaidisi hātoroǃkhamaogu tsîgu ge ge ǃgamhe.

32 Timoteub ge ǀgaisa hâǃkhaib Geser ti gere ǀonǂgaiheb hîa ge Kaesareab ǂgaeǂguis ǃnaka hâ ib ǃoa ge ǃkhoeni. 33 Judab tsî khoegu tsîn ge ǃgâiaǂgaob ǀkha haka tsēde ǁkhui-omma ge ǁgoeǂnami. 34 ǁKhui-ommi ge ǃnâ hâ i khoegu ge Jodeǁîn tsî ǁîn di Elob tsîna gere ǃkhāǃkhā. 35 Koroǁî tsēs di ǃnauǁgoaga gu ge ǀgamdisi khoegu Judab diga kaise nē ǃkhāǃkhās xa ǁaixa tsî ǂnubiǂgoab ai ǃapaǂoa tsî ǀhao-ū gu ra khoe-i hoa-e gere ǃgam. 36 ǁNā ǁaeb ǀguib ǃnâ gu ge ǀnîga nau ǀkhāb ǁkhui-ommi dib ai ǃapaǂoa tsî ǂgō-omma ge ǃkhāǂhubi. ǀAes di ǁhabugu ra khoraǂuisen khamin ge ǂgui ǃkhāǃkhā-aona ge ǂhubiǁō. ǀNîgu ge dao-amde khôaǁnâ tsî toroǃkhamaoga ge ǂgâ kai tsî gu ge ǃās ǃnâ ge ǁan. 37 Timoteub, tsaus ǃnâ ge sâusen hâ ib tsî ǁîb di ǃgâsab Kaesareab tsî Apolofanub hâgu hoagu ge ge ǃgamhe. 38 Xūn hoanan ge dītoa, on ge Jodeǁîna ǁnaetsanadi tsî gangantsanadi ǀkha ǃKhūb hîa ge ǁîna kai ǃgâisiba dība tsî dansa māba ra ganganse ge ǁâudī.