ǀApasǀkhāb Gaosib ai hâ ǃkhâikhoms
1 Efraimmi ǀhorosemagu di ǂnīsa krons ge a ǀâxarexūsa! ǁÎs ǂkhaisa, îsa ǁharedi hîa ra ǂnâtoadi, ǃkhū hâ îsa ǂûna tani hâ ǃgoaǃnāb ǀgapise ǂnôadi, xawe ǂauxûib xa ǃgauhe hâde. 2 Mû, ǃKhūb ge ǀgaisa tsî ǁkhāba ra sî; ǁnāb hîa ǁkhō ǃnareb khami īb, hîkākā ra ǁaiba ūhâb, ǁkhō ǀgaisa dâuǃkhū ra ǁgammi khami īb; ǁîb ǃommi ǀkha ǁîsa ǃhūb kōse nî aoǁnâba. 3 Efraimmi ǀhorosemagu ǂnīsa kronsab ge ǂaira âb ǃnaka nî dāǃgâ. 4 ǁNā ǂnīsa ǂgaeǂgui-aogu di kā ra ǂkhaisib ge ǂguro ra ǁan ǀnomaǂûn, ǁann ra khami ra hapuhen khami nî ī.
5 ǁNā tsēs aib ge ǃKhūb Hoaǀgaixaba ǂkhaisib di kronse nî ī, tsî ǂkhaisib ǃhuniǀurikronse ûiǃgau ra khoena nî ība. 6 ǀGoraǃgâs ǃnâ ǂnôabab ge ǂhanu-aisib gagaba nî mā tsî ǀgaiba ǁnān dao-ams tawa ǃkhamsa ra ǁkhae-oana.
Jesajab tsî Judab ǀhorosema kēbo-aogu
7 Kēbo-aogu tsîn ge ǂauxûib xa ge ǀhoro, ǃkhari-ās xa gu ge ra ǂgarema, pristergu tsî kēbo-aogu tsîgu ge ǃkhari-ās xa ra ǂgarema; ǁîgu ge ǂauxûib xa ra ǀgomaǂâi kaihe tsî ǀgaisa xûi-i xa ra ǂgarema kaihe. ǀHoro rase gu ge kēbosi aide ra mû tsî ǂgarema rase gu ge ǀgoraǃgâde ra dī. 8 Hoaraga tāgu ge ǀkhûib xa ǀoa hâ; ǃanu ǃkhai-i ge a ǀkhai. 9 “ǁÎba tari-e ra ǁkhāǁkhā ǂgao tsî tari-eb ra ǃgāǃgāba ǂgao? ǀŌǀōhe ra ǀgôaron ǀguin, ǁnān samsa xu nēsi ra ūǁnâhen ǀguin. 10 ǁÎb ge xoamûsa xu xoamûs, ǂâibasenna xu ǂâibasenni tsî nē mîsa nēpas tsî nau mîsa naupas ti ǀgui hâ.”
11 ǁÎb ge ǃhō ra amǁgaukha tsî ǃhaogowab tsîn ǀkha ǁîn ǃoa ǃhoa, 12 tsî nî mî: “Nēpab ge sâsasiba nî hōhe; tsau hân ge sâba nî māhe; nēpas ge sâsasib nî hōhesa.” Xawen ge ǁnâu ǂgao tama ge i. 13 ǁNā-amagas ge ǃKhūb mîsa ǁîna ǀōsaosa xu ǀōsaos, ǂâibasenna xu ǂâibasenni tsî nē mîsa nēpas tsî nau mîsa naupas ti ǀgui nî ǀōba. ǁNās ǃaroman ge ǃgûtsân ka xawe ǁâgu ân ai nî ǁnā tsî tsû, ǃkhōhe tsî ǃkhō-oms ǃnâ nî ǂgāhe.
ǁHôaǀuis Sions ǃaroma
14 ǁNā-amaga ǃKhūb mîsa ǃgâ, sago ǃhō-aogo, sago nē khoen Jerusalems ǃnâ hâna ra ǂgaeǂguigo! 15 Sadu ge mî xui-ao: “ǁŌb ǀkha da ge ǃgaeǁaresa ge dī tsî ǁŌhân Hâǃkhaib ǀkha da ge ǀhûǀguitimîsa ge dī. ǃNāǂamsases ga ǀgoraǃgâsa hā, os ge ǁîsa sida tsâǀkhā tide; ǂhumiba da ge sada ǁhaiǁhâǃkhaise dī xui-ao tsî ama tamaba sada omse.” 16 ǁNā-amagab ge ǃKhūb Eloba ra mî: “Sions ǃnâ ta ge ǃgaoǃgao ǀuis, ǃâiǂuisa ǀuis, ǀō-aisa ǀuis, ǁaposa ǃgaoǃgaoba nî ǁgui. ǁNā-i hîa ra ǂgomǃgâ-i ge ǂhansen tide. 17 ǂHanuba ta ge ǁgarab ase nî dī tsî ǂhanu-aisiba ǀnō-ūtsurib ase.”
ǃNareb ge ǂhumib ǃgareǀuiba nî ǀnapubē tsî ǁgamgu ge ǁîb hâǃkhaiba nî dâuǃkhū. 18 Os ge ǁōb ǃgaeǁares âdo nî ǀamǀamhe tsî sadu ǁōb ǃgaeǁares ge ǃaruǀî aiǃgû tide. ǃNāǂamsa ǀgoraǃgâs ga hā, o du ge ǁîs xa nî īǂamhe. 19 ǁÎs ge ǃnās hoasa ǁnāǂam tsî nî ū du; ǁgoas hoasas ge ǁîsa nî hāǂam du, tsēab tsî tsuxub ǃnâs tsîna. Nē ǂhôas ga ǁnâuǃāhe, os ge ǁîsa ǃaorosasib ǀguiba nî hā-ū. 20 Kharob garosen-ais ǃaroma a ǃnubu tsî ǂnams kaise ǁî-aitsama anasenūs ǃaroma ǃnubu xui-ao. 21 ǃKhūb ge Perasimǃhommi tawab ge khâimâ khami nî khâimâ tsî Gibeons ǃgoaǃnāb ǃnâb ge ǃkham khami nî ǃkham. Nēs ge ǁîb buruxa sîsengab nî dīsesa! ǁÎb sîsengab nî dīse, ǃhao sîsengu âba.
22 ǁNā-amaga tā ǃhō, sa khedegu ǃaruǀî ǀgui nî ǁaposa xuige! Tita ge ge ǁnâu ǃKhūb Elob Hoaǀgaixab ge hoaraga ǃhūbab nî hîkākā ti a mîǁgui ǃkhaisa.
Elob gā-aisib
23 ǃGâ, î ti domma ǁnâu; ǃgaoǃgâ, î ti mîsa ǁnâu. 24 ǃHūǃgao ra khoena ǂgāǁaeb ais tsînan ǁnās ǀkha ra aiǃgû? Hoaǁaen ǁîna ǃhūba ǁhāǁkhowa-am tsî ra tsautsau? 25 ǃHūban ga ǂhauǂhautoa, on ge ǁîna wiken ǃkhomn, komainn tsî ǃhorob tsî gerstǃhorob tsîna ǂgā tsî spelǃkhomna xō-am nî ǂgā. 26 ǁÎn Elob ge ǁîna ǃgâise ra ǁgauǃnâ; ǁîb ge ǁîna ǃhanaǂgās ǂansa ra ǁkhāǁkhā. 27 Wiken-i ge tsautsau-ūǃnaos ǀkha tā nî tsautsauhe tamas ka io komain kuniǀnūs ǀkha nî ǃnari-aihe. Xawe wiken ge haib ǀkha ra ǂnauǁnâhe tsî komaina ǂāb ǀkha. 28 ǃHorob ge pere-i ǃaroma ra tsautsauhe, xawets ge ǁî-e hoaǁae ǁkhami tama hâ; kuniǀnūs tsî hāgu tsînats ga ǁî-i ai ra ǃnari, xawe ǁî-e tsautsau tama. 29 Nē gā-aisib ge ǃKhūb Hoaǀgaixaba xu ra hā; ǁîb ǀapes ge buruxa tsî ǂoaǂamsa gā-aisiba ūhâ.
© Khoekhoegowab Elobmîs © Bible Society in Namibia, 2020.
