Isaskari di ôananôagub
1 Isaskari ge haka ǀgôagu, Tolab, Puab, Jasub tsî Simronni tsîga ge ūhâ i.
2 Tolab ge ǃnani ǀgôagu, Usib, Refajab, Jerieli, Jaxmaib, Ibsammi tsî Semueli tsîga ge ūhâ i. ǁÎgu ge ǁîgu ǀaokhoen Tolab ǃhaos din di dana tsî ǂansa toro-ao ge i. Gao-aob Davidi ǁaeb ǃnâb ge ǁîn di ôananôaguba, ǀgamdisiǀgamǀaǀoadisi tsî ǃnanikaidisi ge i.
3 Usib ge ǀgui ǀgôab, Israhiab ǀguiba ge ūhâ i. Israhiab di haka ǀgôagu, Mixaeli, Obadjab, Joeli tsî Isiab tsîgu ge ge ǁîgu ǀaokhoen di dana i. 4 ǁÎgu ge kaise ǂgui taradi tsî ǀgôan tsîna ge ūhâ i, tsî gu ge ǃnonadisiǃnaniǀaǀoadisi toroǃkhamaoga ǁîna xu ge ǀkhī.
5 Isaskari ǃhaos di ôananôagub di ǃgôakhâib ǃnâ gu ge ǁkhaisadisihûǀaǀoadisi toroǃkhamaoga ge xoakhâisa i.
Benjaminni tsî Danni tsîkha di ôananôagub
6 Benjaminni ge ǃnona ǀgôagu, Belab, Bekeri tsî Jediaeli tsîga ge ūhâ i.
7 Belab ge koro ǀgôagu, Esbonni, Usib, Usieli, Jerimoti tsî Irib tsîga ge ūhâ i. ǁÎgu ge ǀaokhoen, ǃhaos din di dana tsî ǂansa toro-ao ge i. ǁÎgu di ôananôagub ge ǀgamdisiǀgamǀaǀoadisi tsî ǃnonadisihakaǀa toroǃkhamaoga ge ǃkhōǂgā hâ i.
8 Bekeri ge khoese ǀgôagu, Semirab, Joasi, Elieseri, Eljoenaib, Omrib, Jeremoti, Abiab, Anatoti tsî Alemeti tsîga ge ūhâ i. 9 ǁÎn ôananôagub di ǃgôakhâib ǃnâ gu ge ǀgamdisiǀoadisi tsî ǀgamkaidisi toroǃkhamaoga ge xoakhâisa i.
10 Jediaeli ge ǀgui ǀgôab, Bilhanni ǀguiba ge ūhâ i, tsî Bilhanni ge hû ǀgôaga ge ūhâ i: Jeusi, Benjaminni, Ehudi, Kenaanab, Setanni, Tarsisi tsî Ahisahari tsîga. 11 ǁÎgu ge ǀaokhoen ǃhaos din di dana tsî ǂansa toro-ao ge i. ǁÎn di ôananôagub ge disihûǀaǀoadisi tsî ǀgamkaidisi ǃkham ǁkhā khoega ge ǃkhōǂgā hâ i. 12 Supimmi tsî Hupimmi tsîkha tsîn ge ge nē ǃhaos di i.
Danni ge ǀgui ǀgôab, Husimma ge ūhâ i.
Naftalib di ôananôagub
13 Naftalib ge haka ǀgôagu, Jaxsieli, Guni, Jeseri tsî Salummi tsîga ge ūhâ i. (ǁÎgu ge a Bilhas ôananôagub di.)
Manaseb di ôananôagub
14 Manaseb ge ǁîb di Siriaǁî xōǀkhātaras ǃnâ ǀgam ǀgôakha, Asrieli tsî Makiri tsîkha ge ūhâ i. Makiri ôab ge ge Gilead i. 15 Makiri ge Hupimmi tsî Supimmi tsîkha tarara ge hōba. ǁÎb di ǃgâsas ge Maakas ti ge ǀon hâ i. Makiri di ǀgamǁî ǀgôab ge Selofehad ti ge ǀon hâ i, tsîb ge ǁîba tareǀgôadi ǀguide ge ūhâ i.
16 Makiri di taras, Maakas ge ǀgam ǀgôakha, Peresi tsî Seresi tsîkha ge ǁora. Peresi ge ǀgam ǀgôakha ge ūhâ i, Ulammi tsî Rakemmi tsîkha, 17 tsî Ulammi ge Bedan ti ǀon hâ ǀgôaba ge ūhâ i. Nēb hoab ge Manaseb ǁnuri tsî Makiri ôab, Gileadi di ôananôaguba. 18 Gileadi ǃgâs, Hamolekets ge ǃnona ǀgôagu, Ishodi, Abieseri tsî Maxlab tsîga ge ūhâ i. 19 (Semidab ge haka ǀgôagu, Ahianni, Sexemmi, Likib tsî Aniammi tsîga ge ūhâ i.)
Efraimmi di ôananôagub
20 Nēb ge Efraimmi di ôananôaguba saogu gu rase: Sutelab, Beredi, Tahati, Eleadab, Tahati, 21 Sabadi tsî Sutelab tsîga. Efraimmi ge ǀnî ǀgam ǀgôakha, Sutelab xōǀkhā ge ūhâ i, Eseri tsî Eladi tsîkha. ǁÎkha ge Gats di ǁanǂgāsaben xa, ǁîn di ǀgoana kha sī ra ǃnari ǂgao hîa ge ǃgamhe. 22 ǁÎkha îb Efraimmi ge ǁîkha ǂama ǂgui tsēde ge ǃoa, tsîn ge ǁîb ǀaokhoena ǁîban nî ǁkhaeǂgaose ge hā. 23 ǁNās khaoǃgâb ge taras âb ǀkha ge ǁgoe tsîs ge ǀgamǀkhā tsî ǀgôaba ge ǁora. Ob ge ǁîba Beria ti ge ǀonǂgai, ǁîb di omaris ǃnâb ge tsâ ǃgomsib ǃaroma.
24 Efraimmi ge Sera ti ǀon hâ ǀgôasa ge ūhâ i. ǁÎs ge ǃādi, ǀGapigab-Bet-Horons, ǃNakab-Bet-Horons tsî Usen-Seras tsîde ge ǂnubi.
25 Efraimmi ge ǁkhāti Refa ti ǀon hâ ǀgôaba ge ūhâ i, tsî ǁîb di ôananôagub ge nē ra saoba: Resefi, Telab, Tahanni, 26 Ladanni, Amihudi, Elisamab, 27 Nunni tsî Josuab tsîga.
28 ǁÎn ge ū tsî a ǁanǃnâ ǀkharib ge sao ra ǃāde ge ǃkhōǂgā hâ i. Betels tsî ǁîs ǂnamipe ǁgoe ǃādi, Naarans aiǂoas ǃnâ ǁgoesa xu, Gesers huriǂoas ǃnâ ǁgoes tsî ǁîs ǂnamipe ǁgoe ǃādi kōse. Sexems tsî Ajas tsî ǁîra ǂnamipe ǁgoe ǃādi tsîn ge ǁkhāti ǁnā ǀkharib ǃnâ ge hâ i.
29 Manaseb di ôananôagub ge Betsans, Tanaks, Megidos, Dors tsî ǁîdi ǂnamipe ǁgoe ǃādi tsîna ge ūhâ i.
Nē ǃkhaidi hoadi ǃnâb ge Jakob ôab Josefi di ôananôaguba ge ǁan hâ i.
Aseri di ôananôagub
30 Aseri ge haka ǀgôagu, Imnab, Isvab, Isvib tsî Beriab tsî ǀgui ǀgôas Seras tsîna ge ūhâ i.
31 Beriab ôakha ge Heberi tsî Malxiel hâkha. (Malkieli ge ǃās, Birsaitsa ge ǂnubi.)
32 Heberi ge ǃnona ǀgôagu Jafleti, Semeri tsî Hotammi tsî ǀgui ǀgôas, Suas tsîna ge ūhâ i.
33 Jafleti ge ǃnona ǀgôagu, Pasaki, Bimhali tsî Asvati tsîga ge ūhâ i.
34 ǁÎb di ǃgâsab Semeri ge ǃnona ǀgôagu, Rogab, Jehubab tsî Arammi tsîga ge ūhâ i.
35 ǁÎb di ǃgâsab Hotammi ge haka ǀgôagu, Sofab, Imnab, Selesi tsî Amali tsîga ge ūhâ i.
36 Sofab di ôagu ge Suab, Harneferi, Suali, Berib, Imrab, 37 Beseri, Hodi, Samab, Silsab, Itranni tsî Berab tsîga ge i.
38 Jeteri di ôagu ge Jefuneb, Pispab tsî Arab tsîga, 39 tsî Ulab ôagu ge Araxi, Hanieli tsî Risiab tsîga.
40 Nēb hoaragab ge Aseri di ôananôagub ǀguiba. ǁÎgu khoen di dana, ǂansa toro-ao tsî ǂoaǂamsa ǂgaeǂgui-ao ge i gu ge nēga. Aseri ôananôagub ge ǀgamdisiǃnaniǀaǀoadisi khoegu, toroǃkhamsa ǁkhāba ga ge ǃkhōǂgā hâ i.
© Khoekhoegowab Elobmîs © Bible Society in Namibia, 2020.
