ǃKhūb ge Jerusalemsa dī-unusa ra mîmâi
1 Tsîs ge mîs ǃKhūb Hoaǀgaixab disa ge hāba te. 2 Nētib ge ǃKhūb Hoaǀgaixaba ra mî: “Kai tauxasib ǀkha ta ge Sions ǂama ra tau, tsî ta ge kai ǁaixasib ǀkha ǁîs ǂama ra tau. 3 Tita ge Sions ǃoa oa tsî Jerusalems ǁaegu sī nî ǁan tsîs ge Jerusalemsa ǂgomǂgomsasib di ǃās ti nî ǂansa, tsî ǃKhūb di ǃhomma, ǃanusib ǃhommi ti. 4 ǁKhawan ge kaira aogu tsî kaira taradi tsîna Jerusalems di ǃgangu ǃnâ nî ǂnû, mâ-i hoa-e ǁî-i di ǁgâibasenhaib ǀkha, kairasib ân xa. 5 Tsî ǃās ǃgangu ge ǀhuru ra axagu tsî ǀgôadi xa nî ǀoa.
6 “Nētib ge ǃKhūb Hoaǀgaixaba ra mî: ‘Nē khoen di ǃgau hân mûǁae i ge buruxase a mûsen ǁkhā ǁnā tsēdi ǃnâ. O i kha ti mûǁaes tsîna nî buruxa?’ ” tib ge ǃKhūb Hoaǀgaixaba ra mî. 7 “Tita ge ti ǁaesa aiǂoas di ǃhūba xu tsî huriǂoas di ǃhūba xu nî ore tib ge ǃKhūb Hoaǀgaixaba ra mî. 8 Tsî ta ge tita ǁîna nēpa nî hā-ū tsîn ge Jerusalems ǃnâ nî ǁan, tsîn ge tita ǁaese nî ība tsî ta ge ǁîna Elose nî ība, ǂgomǂgomsasib tsî ǂhanu-aisib ǃnâ.
9 “ǂGaoba ūhâ re! Sadu hîa ǁnā tsēdi ǃnâ mîdi ǁnā kēbo-aogu dide, ǃKhūb Hoaǀgaixab di ommi ǃgaoǃgaob gere Tempeli nî ǂnubihese ǁguihe tsēsa xu ge hâ ide ge ǁnâudo. 10 ǁNā tsēdi aiǃâ i ge khoe-i tamas ka io xamari-i tamas ka io ǀguru-e amǃnâ-e ge hō tama hâ i, ǁkhāti i ge khākhoen ǃoagu hâ ǃnorasasi-e ǁnān ǂgâxa tsî ra ǂoana a ge ǀkhaiba i, tita ge khoena ǁîn ǁanǁare-aon ǃoagu khākhoeguse a dī amaga. 11 Xawe ta ge tita ǃgau gen, nē ǁaes din ǃoagu ǃkharu ge tsēdi ǃnâs khami ī tide, tib ge ǃKhūb Hoaǀgaixaba ra mî. 12 ǂKhîb di ǃkhommi ge nî hâ; draibehais ge ǂûn âsa nî tani, ǃhūb ge ǃgaos âba nî ūǀkhī, ǀhommi ge ǀaub âga nî mā tsî ta ge tita ǃgau gen ǁaes dina ǁîna ǀumixūse nî mā. 13 Tsî du ge sadu Judab ommi didu tsî Israeli ommi didu tsîdo ǀâxarese ǃhaodi ǃnâ nî ī. ǁNās ǁkhās xase ta ge tita sado nî sâu tsî du ge ǀkhaeb ase nî ī Tā ǃao re, î gu ǃomgu âdo ǀgai.”
14 Nētib ge ǃKhūb Hoaǀgaixaba ra mî: “Sadu îgu ge ǁaixasib ǃoa ǁgoaǂui te o ta ge hîkākāsa ge ǂâibasen hâ i, tsî ǁî ǃkhais xa ǃhausen tama ge hâ i. 15 O ta ge nēsi Jerusalems tsî Judab di ǁaesa ra ǀkhae ǂgao, xuige tā ǃao re. 16 Nēn ge xūn ǁîna du nî dīna: Mâ-i hoa-e-i ǀgūkhoe-i â-i ǀkha amaba ǃhoa, î ǂgomǂgomsasib tsî ǂkhîb di ǂhanu-aisiba ǀgoraǃgâsa sadu di dao-amdi tawa. 17 Tā ǂkhaba ǀapede nē-e nau-i ǃoagu ǀape, î tā ǂhumi nūsa ǀnam. Nēn hoana ta ge tita ǁkhan hâ,” tib ge ǃKhūb Hoaǀgaixaba ra mî.
18 ǁKhawas ge mîs ǃKhūb Hoaǀgaixab disa ge hāba te: 19 “Hakaǁî ǁkhâb, koroǁî ǁkhâb, hûǁî ǁkhâb tsî disiǁî ǁkhâb ai ra dīhe ǂûtama hâdi ge Judab ommi ǃnâ ǃgâiaǂgaob tsî dâb ase nî ī. Î du amab tsî ǂkhîb tsîkha ǀnam.”
20 Nētib ge ǃKhūb Hoaǀgaixaba ra mî: “ǁAedi di khoen ge nî hā, ǂgui ǃādi di ǁanǂgāsaben on ge Jerusalems ǁga nî hā. 21 Nē ǃās din ge nau ǃās din ǃoa ‘A da ǃgû tsî ǃKhūb aisa sī ǀkhoma re, xuige sida ǀkhā hā re’ ti ge mî. 22 O di ge ǂgui ǃhaodi tsî ǁaede ǃKhūb Hoaǀgaixaba Jerusalems ǃnâ ôa, tsî ais âba nî ǀkhomase nî hā. 23 Nētib ge ǃKhūb Hoaǀgaixaba ra mî: ‘ǁNā tsēdi ǃnân ge disi khoen ǃkharaga ǁaedi tsî gowaga xu hâna ǀgui Jodeǁî-e sarab ai ǃkhō tsî “Sadu ǀkha da ge ra ǃgû ǂgao, Elob sadu ǀkha hâ ti da go ǁnâu xui-ao,” ’ ” ti nî mî.
© Khoekhoegowab Elobmîs © Bible Society in Namibia, 2020.
