ǀKhommi tsî ǂhanu-aisib, ǂûtama hâs ose
1 Hakaǁî kurib, gao-aob Dariusi gaosis dib ǃnâb ge ǃKhūba Saxariab ǃoa, hakaǁî tsēs khoeseǁî ǁkhâb, Kislevi dis ai ge mî:
2 Betels khoen ge Sar-Eseri tsî Regem-Melek hâkha tsî ǁîkha khoegu tsîga ge sî, ǃKhūb aisa nî sī ôa, 3 tsî ǃKhūb Hoaǀgaixab ommi di pristergu tsî kēbo-aoga nî “Ganupe ge kha koroǁî ǁkhâb ǃnâ ā tsî ǂûtama nî hâ, ǀnai ge gere dī khami?” ti sī dîse.
4 Tsîs ge ǃKhūb Hoaǀgaixab di mîsa tita ǃoa ge hā. 5 “Hoaraga khoen ǃhūb din tsî pristerga mîba re: ‘Sadu ge hûdisi kuriga koroǁî ǁkhâb ǃnâ tsî hûǁî ǁkhâb ǃnâ ǂûtama hâ tsî ra ǃoa. O xare du ti ǃgôasib ǃoa ǂûtama ra hâ?’ 6 ǂÛ tsî du ga āo, aitsama du ǁnāsa dībasen tama hâ?”
7 Nē mî tamade ǃKhūb ge aiǃâkam kēbo-aogu ǃnâ-u, Jerusalems ge ganupe ǁanǃnâhe hâ i tsî ǃnorasa i ǁaeb, Jerusalems ǂnamipe tsî ǁkhāti ǃkhawagas tsî ǃgoaǃnāb ge ǁanǃnâhe hâ ib xa a ǂgaiǂuide?
ǁNâuǀnamoǃnâsib ge a ǃkhōsis di ǃaroma
8 ǃKhūb di mîs ge Saxariaba ge hāba: 9 “Nētib ge ǃKhūb Hoaǀgaixaba ra mî: ‘ǂHanu-ai ǀgoraǃgâsa ǀgoraǃgâ, î ǃgâisib tsî ǀkhomxaǂgaosib tsîkha dī, nē-e nau-i tawa. 10 Tā ǃoataradi, ǃguniǀgôan, ǃhaokhoen tsî ǀgâsana ǁgâiǀā. Tā-i ǁkhāti nē-e nau-i ǃoagu ǂkhababa ǀape.’
11 “Xawen ge ǃgaoǃgâsa ǂkhā tsî ǂgaedi âna ǂganam tsî ǃhōdi âna ge ǂgaedawa, ǁnâun tidega. 12 Tsîn ge ǂgaogu âna ge karokaro, ǂhanub tsî ǁnā mîdi, ǃKhūb Hoaǀgaixab ge gagab âb ǃnâ-u, ǁîb di aiǃâkam kēbo-aoga mā hâ in tsînan ǁnâu tidese. Tsîb ge ǃKhūb Hoaǀgaixab di ǁaiba ge kai i. 13 Tita gere ǃhoa on ge ǃgâ tama hâ i ǃkhais ǁkhās khami ta ge tita tsîna ǃgâ tide, sadu ga ǂgaio,”
tib ge ǃKhūb Hoaǀgaixaba ra mî.14 “Tsî ta ge ǁîna hoaraga ǁaedi ǁîna ǀūdiǀî nî ǃgombē, tsî ǃhūb ge ǁîn khaoǃgâ hîǀhuruhe hâ, ǃkharugarun tsî oahā rana xu tsîn ge ǁîna ǃgâi ǃhūba ǃū-aisab ase ge dī.”
© Khoekhoegowab Elobmîs © Bible Society in Namibia, 2020.
