ǃNaniǁî ais: ǁKhana ra xamiǂhanis
1 ǁKhawa ta ge kōkhâi o ta ge ǁkhana ra xamiǂkhani-e ge mû. 2 ǀHomǃgāb ge tare-e ta go mûsa dî te o ta ge “ǀGapise ra ǁkhana xamiǂkhani-i, khoese meterga gaxu tsî haka tsî ǃkhare meterga ǂhaba-e ta ge go mû” ti ge ǃeream.
3 Ob ge ge mîǀî te: “Nēb ge ǀâxareb hîa hoaraga ǃhūb ai nî hāba. ǃNari ra khoe-i hoa-i ge nēpa xu nî ǃhomǂuihe tsî ǂkhabase ga nū-i hoa-i ge nî ǃhomǂuihe, ǁnā ǀâxareb ǁkhāb ǃoa. 4 ǃKhūb Hoaǀgaixab ge ra mî: ‘Tita ge ǀâxareba ra sî, ǃnari-ao-i oms ǃnâ tsî ǂkhabase ra nū-i oms ǃnâ nî ǂgâse. ǁNāpa hâ tsî omsa, ǀuin tsî haigu tsîn hoan ǀkha nî hîkākāse.’ ”
Hûǁî ais: ǀHarus ǃnâ ǂnôa khoes
5 ǁKhawa ǂhai tsîb ge ǀhomǃgāba ge mû: “Kō ǁnāpa! ǀNî xū-i ge noxopa ǃgoaxa!”
6 O ta ge “Tare-e?” ti ge dî.
Ob ge “ǀHarus ǂoaxa ras ge. Nēs ge a ǁîn di mû, hoaraga ǃhūbaib ǃnâ,” ti ge mî.
7 Tsîs ge ǃgupu, ǂgoaǀuri ǂganaisa ge ūkhâihe. ǁNāpas ge tarekhoesa efab ǃnâ ge ǂnôa i.
8 “Nē khoes ge a ǂkhaba” ti mî tsîb ge ǁîsa efab ǃnâ aoǂgā-oa tsî ǂgoaǀuri ǂganaisa ams âb ai ge aoǂnûi. 9 Kōkhâi ta ge o ta ge tiǀî ǁkhanaǃgoaxa tarekhoera ge mû, ǃariǃkhās ǁgabogu khami ī ǁgabogu ǀkha. ǁÎra ge efaba ǀhommi tsî ǃhūbaib ǁaegu ge ūkhâi.
10 O ta ge ǀhomǃgāba “Mâǀî ra efaba ū khoera?” ti ge dî.
11 Ob ge ǁîba “Sinarǃhūb ǃnâ nî sī omsa ombase. Tsîb ge aiǂhomihe tsî ǁnāpa ǁîb di ǂhunuma ǃgaoǃgaob ai nî ǁapoǁapohe.”
© Khoekhoegowab Elobmîs © Bible Society in Namibia, 2020.
