ǃNonaǁî ais: ǀNō-ūǁapab
1 Kōkhâi ta ge o ta ge ǀnō-ūǁapaba ǃomǁae ūhâ khoeba ge mû. 2 Tsî ta ge “Mâǀîts garu?” ti ge dî.
Ob ge “Jerusalemsa nî sī ǀnōse, gaxusib tsî ǂhabasib âsa” ti ge ǃeream te.
3 Ob ge tita ǀkha gere ǃhoa ǀhomǃgāba ge ǂoa tsî ǀnî ǀhomǃgāb ge ǃgûǂoa tsî ǁîba ge ǀhao-ū. 4 Tsîb ge ǁîb ǃoa “ǃKhoe, îts ǁnā ǂkham khoeba sī mîba ‘Jerusalems ge ǃgaroǃādi, ǂnubiǂgoaba ūhâ tama di khami nî ǁanǃnâhe, ǂnubis di khoesib tsî ǀgoan xa. 5 Tita ge ǀaexa ǂnubiǂgoab, ǁîs ǂnamipe hâb ase ǁîsa ība tsî ǂkhaisib ase ǁîs ǁaegu nî ī,’ ” tib ge ǃKhūba ge mîmâi.
ǃHūsaben ge oahā nîse ra ǂgai-oahe
6 “Khâi! Khâi! ǃHū re ǀapas di ǃhūba xu! Tita ge sado haka ǂoadi ǀhommi didi ǃoa ge ǀgaruǀgaru,” tib ge ǃKhūba ra mî. 7 Khâi Sionse, ǃhū re Babilons ôas di ǁanǂgāsabedo! 8 Nētib ge ǃKhūb, Hoaǀgaixaba ra mî: ǁÎb di ǂkhaisib khaoǃgâb ge ǁaedi, sado ge hîkākādi ǃoa ge sî te, sado ga tsâǀkhā-i hoa-i ǁîb mûǃnâde ra tsâǀkhā xui-ao.
9 Ti ǃomma ta ge ǁîn ǂama nî gongon, on ge ǁîna ǃgān âna nî ǁkhâuǁnâxū kaiba tsî du ge ǃKhūb Hoaǀgaixab ge sî te ǃkhaisa nî ǂan.
10 “Dâ, î ǃgâiaǂgao, sas Sionni ôase, tita ge sas ǃnâ hā nî ǁan”
tib ge ǃKhūba ra mî.11 O di ge ǂgui ǁaede ǃKhūb tawa nî ǀhaoǀhaosen, tsî ti ǁaese nî ī tsî ta ge sadu ǁaegu nî ǁan tsî du ge ǃKhūb Hoaǀgaixab ge sî te ǃkhaisa nî ǂan. 12 Tsîb ge ǃKhūba Judaba ǁîb di amǃnâse, ǃanu ǃhūb ǃnâ nî ǀumi, tsîb ge ǁîba ǁkhawa Jerusalemsa nî ǁhûiǂuibasen.
13 ǃNō re khoesits hoatse, ǃKhūb aiǃâ, ǁîb go ǃanusib âb di ǁanǃkhaisa xu khâi xuige.
© Khoekhoegowab Elobmîs © Bible Society in Namibia, 2020.
