Gā-aisib 8 - Khoekhoegowab New Translation 2020 (KKG20)

1 Gā-aisib di kai ǀgaib ge hoaraga ǃhūbaib ǃnâ khoraǂuisa tsî mâ xū-i hoa-e ǃgâi ǀgaub ǃnâ ra aiǃgû kai.

Salomob ge Gā-aisibab a ǀnam ǀgaub xa ra ǃhoa

2 Tita ge hūgasa xu Gā-aisiba ge ǀnam i. Ti ǂkhamsisa xu ta ge ǁîba ǀnam tsî ti ǃgame-ao kaib nîsa gere ǂhâba. Tita ge ǁîb di îsasiba ge ǀnam. 3 ǁÎb ge Elob, hoan di ǃKhūb, ǁîba a ǀnammi ǀkha ûiǁares ǀkha, ǁîba kai ǃgôasiba ra mā. 4 ǁÎb ge aiǂhanub Elob di ǂganǃgâsiga ǂans diba ūhâ tsî ǁîb sîsengu di aiǃgûs ǃnâ ra ǁhao.

5 ǃGâi i kha a ǃkhūsiba nē ûib ǃnâ ūhâsa? Gā-aisib ose i ge ǀnî xū-i ǃkhū kai tsi ǁkhā-e a ǀkhai, ǁîb hoa xūna ra īǁkhā kai xui-ao. 6 ǂAns ge xūna da nî dīs ǃoa ra hui da tsî Gā-aisib, hoa xūna ge kurus ǃnâ ǂnubib ose i ge ǀnî xū-i xare-e a hui da ǁoa. 7 Sada ge amaba ǀnam, xawe hoa ǃgâisib ge a Gā-aisib di sîsen. ǁÎb ge aitsama ǂhanu-aisib tsî ǁkhoaǂgaoxasib, ǃûisens tsî ǃgâi ǀgoraǃgâs tsîna ra ǁkhāǁkhā. Ûib ge nēn xa ǃnāǂamsa xū-e a mā da ǁoa. 8 Sada hoada ge ǂgui xūna ra ǁnâuǃā ǂgao. Gā-aisib ge taren ge īgeǁaeb ǃnâ ī ǃkhaisa a ǂan tsî ǃgoaxaǁaeb ǃnâ nî īna ǃâubasen hâ. Khoen ra mî xūna da nî ǁnâuǃā ǃkhais ǀkhab ge hui da tsî ǃgom xūn di ǃereamsa da nî hō ǀgaus tsîna ra mā da. ǁÎb ge mâtin nî sores, ǁkhâb tsî ǀgamiron tsîna ǃgû tsî mâ ǁaeb ain ǁnaetisa tama xūna ǂoab tsî ǀnanub di mâsib ǃnâ nî ī ǃkhaisa a ǂan. ǁKhātib ge taren nî kurikamagu ga ǀkharaǀkharasen tamas ka io kuriga ǃkharu, o ī ǃkhais tsîna a ǂan.

9 ǁNā-amaga ta ge Gā-aisiba ta tita ǀkhab nî hâse nî ū ǃkhaisa ge mîǁgui, ǁîb nî ǃgâise ǀapemā tsî ǃgomsigu tsî ǃoab di ǁaeb ǃnâ ǂgaoǂgaoǃnâ te ǃkhaisa ta a ǂan xui-ao. 10 Tita ge ra ǂâi: “ǁÎb xa ǃaromahe hâse ta hoaraga khoen xa, ǀhaon ra ǃkhain hoan ai ǃgôasiba nî māhesa. ǂKham ta a xawen ge kaikhoena ǃgôasiba nî mā te. 11 Ti mûǂgāǀgaugu ge ǁîn mûǁae nî ǃgâi tsîn ge ǁnān ǂgaeǂguis ǃnâ hâna tita xa nî ǂan ǂgao. 12 Tita ga ǃnō, on ge ǃhoa ta nîsa nî ǃâu tsî ǃhoa ta ga, o nî ǃgaoǃgâ. Gaxuse ta ga ǃhoa, xawes tsînan ge ǃgaoǃgâxase nî ǃgâ. 13 Gā-aisib xa ǃaromahe hâse ta ge ǁōǁoasiba nî ūhâ tsî ǁnān ti khaoǃgâ nî hān ge tātsē ǀuru te tide. 14 Tita ge ǃhaodi tsî ǁaedi tsîna nî gaoǂam 15 tsî ǃaoǃaosa ǂgaeǂgui-aogu ge ti ǀonsa gu ga ǁnâu, o ǃoab xa nî hāǂamhe. Tita ge ǃgâi gao-aob tsî ǁkhoaǂgaoxa toroǃkhamaob ase nî ǂansa. 16 Gā-aisib ǃoa ta ga ǁaruhā, o ta ge ǁîb tawa nî sâ. ǁÎb ǀkha ta ǀguipa hâ xui-ao i ge ǂâiǂhansen-i, tamas ka io tsû-i xare-e a ǀkhai tsîb ge ǃgâiaǂgaob tsî dâb tsîn ǀguina hâ.”

17 Tsî ta ge ge ǂâiǃgâ: Gā-aisib ǀkha ǃgames ge ǀamose ûisa, 18 ǁîba ǀnams ge ǃūmû ǃgâiaǂgaosa. ǁÎb sîsenna dīs ge ǃnāǂamsa ǃkhūsisa tsî ǁîb di ǀhûhâsib ǃnâ amǃnâxas ge ǃgâi ǀgoraǃgâs ǂansa ūhâsa. ǁÎb ǀkha ǃhoaǁares ge a ǃgôasi. O ta ge Gā-aisib ǀkha ǃgamesa ge mîǁgui. 19 ǀGôa ta ge i, o ta ge ǀgaisa tsî ge ǂuru i tsî ǁkhāti ǃgâiǃgâ tsî ǃgâi ûiba ge ǃkhōǃoa. Tita ge ǂuru sorosa ǀnai ta ge ǃgâi i xui-ao ge māhe. 20 Tita ge ge mûǂan, tātsē ta Gā-aisiba Elob ga mā te tama io ǃkhōǃoa tide ǃkhaisa. Tsî Elob ǀguib ǁîba tita mā ǁkhā ǃkhaisa ta ge ǂan, ǃkhais ge ge ǁnâuǃāb di ǁgauǁgau i. 21 ǁNā-amaga ta ge ǃKhūba ti ǂgaob hoab ǀkha ǀgore tsî ge ǀkhoma.