Gao-aogu tsîn ge khoes ǀguisa i
1-2 Tita tsîn ge khoen hoan khami a ǁō ǁkhā. Tsî ta ge ǁkhāti Elob ge ǃhūba xu ǂnubi ǂguro khoeb di suri. Ti ûib ge ti îb di ǃkhommi hîa ge ǁgoe-ūgus ǁkhoab ǃnâ hāb ǀkha ge tsoatsoa. Khoese ǁkhâgu ǃnâs ge ti sorosa ti îs di ǁhās ǃnâ hâ ǀaoba xu ge ǂnubihe. 3 ǃNae ta ge o ta ge nau khoen ǁkhān khami ǃhūbaib ǃnâ ge hā. Tita ge ǁkhā ǂoab hoa khoen ra ǀomǂgāba ǀomǂgātsoatsoa tsî mâ ǀgôa-i hoa-i ra dīs ǁkhās khami ǂguro ǃnāsa ge ā. 4 Tita ge lapin ǃnâ ǃgamihe tsî ge ǃkhōǂhomihe. 5 ǀGui gao-ao-i di ûib tsîn ge ǀkharati tsoatsoa tama hâ. 6 Hoada ge ǁkhā ǀgaub ai ǃnae tsî nē ûiba xu ǁkhā ǀgaub ai nî ǂoa.
Salomob ge Gā-aisibab ǀnam ǃkhaisa ra gowaǂui
7 Khoes ǀguisa ta i ǃkhaisa ta ge mûǂan, o ta ge ǀgore tsî ǁnâuǃāba ge māhe, tsîb ge Gā-aisib gagaba tita ǃoa ge hā. 8 Tita ge ǁîba tron-i tamas ka io kron-i xa ǀgapise ge ǃgôa. ǃKhūsib ge a ǁau tsî Gā-aisib ǀkha ǀgopeǀnōhe ǁoa. 9 ǃGomǀgausa ǀuin tsîn ge ǁîb di ǁkhāsiba a sīǃnâ ǁoa. Hoaraga ǃhūbaib ǃnâ hâ ǃhuniǀurib ge ǁîs ǃoagu ǃomǃnāb ǀoa ǃhū-i khami ǀgui ī tsî ǀhaiǀurib ge ǂgoa-i khami ǀgui i. 10 Tita ge ǁîsa ǂurusib tsî îsasib xa ǃnāsase a ǀnam. ǁÎs di ǃnâb ge tātsē ǀari tama ǀgaisa ǃnâba, tsî ta ge nau ǃnân hoan ǂamai ǁîsa ra ǂhâba.
11 Gā-aisib ge tita ǃoa hā, on ge hoaraga ǃgâi xūna ǁîb ǀkha ge hā. ǁÎb ge ǃgôaheǁoasa ǃkhūsiba ge hā-ūba te. 12 Gā-aisib ge ǁîna hā-ūba te xui-ao ta ge ǁîn hoan ǀkha ge ǂkhî i. Tita ge ǁîb a nē xūn hoan di ǀau ǃkhaisa ǂguro ge mûǂan tama hâ i. 13 Amabes ǃnâ ta ge ǁîba xu ge ǁkhāǁkhāsen tsî ta ge nēsi ǁkhāǁkhāsen ta ge xūna ta ǀgoragu ǁkhā ǃkhais xa ra ǃgâiaǂgao. 14 ǀGui khoe-i tsîn ge Gā-aisib ǁuiba toa kai ǁkhā tide. ǁNā ǁuiba sîsenū, ots ge Elob di ǀhōsa, tsîb ge ǁîba gā-aisiba xuts ra ǁkhāǁkhāsen xūn ǃnâ ǃgâiǃgâibasensa ūhâ.
15 Tita ge Elob, ti ǂâidi ǁkhāǁkhāsen ta ge xūn dide nî ama kai tsî ta ǁîb ǂâis ǃoa ta nî ǃhoa ǃkhaisa ra ǀgore. ǁÎb ge Gā-aisib di daoǁgau-ao tsî ǁnān gā-aina ra hui-unu. 16 Sada ǂûda, sada mîdi, sada hoaraga ǁnâuǃāb tsî ǁkhāsigu ge Elob di ǀgaib tsî ǁkhāsib ǃnaka hâ. 17 ǁÎb ge ǁnāb hâ a xūn di ǀoasa ǂans, mâtib ǃhūbaiba kuruhe hâ tsî ra sîsen ǃkhais dis, 18 tsoatsoas tsî ǀunis ǁaegu dis, ǃgûǀgaub sores dib, kurikamagu di ǀkharaǀkharasens, 19 kurigu tsî ǀgamiron di mâ ǀgaub tsîn diba ge mā teba. 20 ǁÎb ge ûitsama xūn di kurus, ǀgurun tsî xamarin di tanisenǀgaub, ǂoagu di ǀgaib, khoen di ǀgaib, ǃkharagaǃnâgu haiǃnôan tsî ǁîn di ǃnomaga sōǀôan ase sîsenūs tsîn xa ge ǁkhāǁkhā te. 21 Tita ge ǂansa ge i xūn tsî tātsē ge ǂansa tama hâ in tsîn hoana ge ǁkhāǁkhāsen, 22 Gā-aisib, mâ xū-i hîa hâ-i hoa-e ge ība māb ge ti ǁgauǃnâ-ao i xui-ao.
Salomob ge Gā-aisiba ra mîǃgāǃgā
Gā-aisib di gagab ge gā-ai tsî a ǃanu. Kurus ǃnâb ge ge ǀguis ǀguisa i-i xawe ǁî-aitsama ǂgui ǀgaugu ǃnâ ra ǂhaiǂhaisen. ǁÎb ge ǀguis khami ī ǃhūbaisi xū-i ǀkhas tsîna kuruhe tama hâ tsî ǃnorasase ra hâma. ǁÎb ge ǂhaisa, ǃanu tsî a ǂgomǂgomsa; ǁîb ge a ǂkhôahe ǁoa. ǁÎb ge ǃgâina a ǀnam. ǁÎb ge a ǀā tsî danheǁoasa, 23 ǃgâi tsî a khoesib di ǀhōsa. ǁÎb ge ǂgomǂgomsa, ama tsî ǂâiǂhansen tama hâ. ǁÎb ge ǀgaiba hoa xūn ǂama ūhâ tsî mâ xū-i hoa-e ra mû. ǁÎb ge mâ gaga-i, gā-ai tsî ǃanu-i hoa-i ǃnâ, mâtikōses ga ǁî-i di kurusa tsaura, xawe ra ǂgâ.
24 Gā-aisib ge gon ra xū-i hoa-i ǃgâ-ai ǃhaese ra gon, tsîb ge ǁnātikōse ǃanu tsî mâ ǃkhai-i hoa-i ǃnâ ra ǂgâ. 25 Gā-aisib ge a Elob ǀgaib di ǀom; ǃūmû ǂkhaisib, Hoaǀgaixaba xu ra ǀkhâuǂoaxaba. ǃAnuoǃnâ xū-i xare-i ge ǁîb ǃnâ ǂgâ ǁkhā tide. 26 ǁÎb ge ǀamo ǃnâb di ī tsî dīǀoaǀoasa mûsenǃnâxūs, Elob di sîsengu tsî ǃgâisiga da ǁîb ǃnâ ra mûb khami ī. 27 Gā-aisib ge ǀguis ǀguisa i, xawe hoa xūna ra dī. ǁÎb ge hoa xūna ra ǀasaǀasa, xawe tātsē ǁî-aitsama ǀkharaǀkharasen tama hâ. Suriba xu surib ǁgab ge ǃanu khoen di ǀomdi ǃnâ ǂgâ tsî ǁîna Elob di ǀhōsan tsî kēbo-aon ase ra dī. 28 Gā-aisib ǀkha ǀguipa ǁan hâ khoen ǃgâ-ai Elob xa ǀnamhe xū-i xare-i ge a ǀkhai. 29 Gā-aisib ge sores tsî hoaraga ǀgamiron ǃgâ-ai a îsa. ǁÎb ge ǃnâb ǂûb xa a ǃgâi, 30 tsuxub ra tsēsa sao xui-ao, xawe ǂkhabab ge tātsē Gā-aisiba dan tama hâ.
© Khoekhoegowab Elobmîs © Bible Society in Namibia, 2020.
