Gā-aisib 2 - Khoekhoegowab New Translation 2020 (KKG20)

ǂKhaba ǂâiǀgaub

1 ǂKhaba khoen ge ǂhanu tamase ra ǂâi, nētin ra mîo: “Sida ûib ge ǃnubu tsî tsûaǂgaob xa ǀoa hâ tsî ǁîb ǀams ga hā, o-i ge ûiǂoa-e a ǀkhai. Khoe-i xare-i ge ǁŌhân Hâǃkhaiba xu ge oaǀkhī khoe-i xa ǂan tama hâ. 2 ǀApeǁguihe tamase da ge ge ǃnae tsî ûib ga ǃkharu, o-i ge ǃnae tama da ge hâ i ǃkhais ǁkhās khami ī. Sida ǀommi ge ǀanni ase ī tsî sida ǂâidi ge sida ǂgaob di ǃgubus xa ra ǃae nani-i khami ī. 3 Nē nanib ga ǀari, o di ge sida sorode nî tsaotsao tsîb ge sida ǀomma nî ǀkhaiǃnâ ǂoab di ǃâ kai. 4 ǁAerob ǃnâ i ge ǀgui khoe-i tsîna dī da ge xūn di ǀgui xū-i tsîna ǃkhōmâi tide tsî di ge sida ǂhunuma ǀondi tsîna nî ǀuruhe. Sida ûigu ge ǃâudi khami nî ǃkharu tsî huris khami sores di ǀgammi ǃnâ nî ǀari. 5 Sida ûiǁaeb ǃhūbaib ai da ûi hâb ge ǃkharugaru sommi ase ī. Sida ǁōb di tsēsa xu da nî ǃkhoeni ǀgau-i ge a ǀkhai, ǁîs a mâiǁaposa tsî i khoe-i xare-e ǁîsa mâiǂui ǁoa xui-ao.”

6 ǂKhaba khoen ge ra mî: “Hā, î da ǃgâi xūn ûib din ǃnâ ǃgâiǃgâisen tsî nē ǃhūbaib ǃnâ ǂkham da ge i, o da gere ûi khami ûi! 7 A da ǃgomǀgausa ǂauxûina ā tsî ǀō-aisa ǃgâihamxūna sîsenū. Tā da ǀguis khami ī ǃkhā-i tsîna ǁhaoǁaeb ǃnâ ǂoaǃnâ! 8 Rosǃkhādi nî ǂnâs aiǃâ, a da ǁîde ǃora tsî sada ǀûn ǃnâ ǃkhāmâi! 9 A da hoatsama ǃgûǂoa tsî ǂgao da ra xū-i hoa-e dī, ûib sada ǂgui xūna surude hâ xuige!

10 “Nēsin ga ǂhanu-ai, xawes tsîna da ge ǀgâsana nî ǁgâiǀā. ǀGuis khami ī ǃgôasi-i tsîna da ge ǃoataradi kas, kaira khoen kas hoasa ūhâba tide. 11 Sada ge ǂâu hâse ǀgaisa tsî da ga ǂhâba da hâ xūna hō, o ǂhanu da a ti nî ǂgaisen. ǂKhabusasib ǀkha i ge khoe-i xare-e ǃkhai-i ai sī tama hâ! 12 ǂHanu-ai khoen ge ǂhanib ase ǀgui ī, xuige a da ǁîna da nî dībē ǃē-e kōbasen. ǁÎn ge sada ra dī xūn ǃoagu hâ, tsîn ge Moseb ǂhanuba da ǁnâuǀnam tama tsî aboxagu di ǁnaetiga ra ǃûǂam, ti ra ǀhapiǂgā-am da. 13 ǁÎn ge Eloban a ǂan ti mî tsî ǃKhūb ôan, ti ra ǀonǂgaisen. 14 Tare-i ǀgui-e da ga ǂâi, xawen ge ǁî-e ra mâǃoa, ǁnā-amaga da ge ǁnāti-ī khoena mû ǂgaos tsîna hî tama hâ. 15 ǁÎn ge nau khoen khami ī tama tsî ǁnaetisa tama ǀgauga ūhâ. 16 ǁÎn ge sida ǀapon ase ra ǃgapaǀî. Sida a ǃanuoǃnâ ti ǂâi tsîn ge sida xu ǃnūse ra hâ, sida xan nî ǀuriǀurihe ti ǂâi tsî. Elob a ǁîn di î ti koasen tsîn ge ǂhanusen ga ûi, os ǁîn di ǀamsa nî ǃgâiǃgâxa ti ra ǂâi. 17 Xawe da ge ǁnās a ama ǃkhaisa nî mû! A da ǁîn di ǁōǁaexa i ka, o i tare-e nî ī ǃkhaisa mû! 18 ǂHanu-ain amase nî Elob ôas karao, ob ge Eloba ǁîna khākhoen âna xu nî sâu. 19 ǁNā-amaga a da ǁîna ǃâitsâ. A da ǁîn ǃoagu orase tanisen tsî ǁîna tsûtsû, o da ge mâtikōsen ǃgēsa tsî ǁnâuǃāxa ǃkhais, tsî mâtikōsen a mâǃkharu ǁkhā ǃkhais tsîna nî ǂanǂui! 20 Sada ge ǁîna taotaosa ǁōb ǃoa nî ǀgoraǃgâ. ǁÎn kom Elob xan nî sâuhe, ti ra mîo.”

21 Nēb ge ǂkhaba khoen ra ǂâi ǀgauba, xawen ge ra ǂâisā. ǁÎn ǂûn di ǂkhabasib xan ge ǂgī kaihe hâ. 22 ǁÎn ge Elob di ǂganǃgâsiba ǂan tama hâ tsî ǃanu tsî ǀhapio ûib di mādawa-ams ǃâubasen-e ūhâ tide. 23 Elob ge kuru da, ob ge ǁō da nî ti ge ǂâibasen tama hâ i, tsîb ge ǁîb ǂhunuma ǀamosib di īb ǃoa ge kuru da. 24 ǁGâuab di tauxasib ge ǁōba ǃhūbaib ǃnâ ge hā-ū tsî ǁnān ǁgâuab din ge nî ǁō.