Gā-aisib 16 - Khoekhoegowab New Translation 2020 (KKG20)

1 ǁNā-amaga i ge ge ǂhanu i, ǁnā khoen nî nēti ī ǂgui ǀgurun tsî xamarin ǀkha ǁkharahe ǃkhaisa.

2 Xawe sats, ǃKhūts ge sa khoena nē ǀgaub ai ǁkhara tama i tsî ǁîna ǁnās ǃās ǃnâ ǃgâisiba ge ǁgau. Sats ge ǁîna ǃhaudi hîa ǁkhoaxa ǁgan-e ūhâde ǂû tsîn nî ǁâse ge sîba. 3 Sats ge nēn hoana ǁgôa-eloǃoaba-aon nî ǃân kao, sats ge ǁîna sîba ui-uisa ǀgurun tsî xamarin xa ǂû ǁoa ǃkhaisats a ǂan xui-ao ge dī. Sa khoen ge ǃnubu ǁaero-i ǀgui-e ǃâsa ge hōǃâ tsî ǁnās khaoǃgâ ǃgâi ǂûna gere ǂû. 4 ǁGâiǀā-aon nî ǀkhomoǃnâ mâsib ǃnâ ǁgariǂgāhe, khākhoen ân ra tsûtsûhe ǀgausan sa khoena ra mû hîa ǃkhais ge ge ǂhâbasa i.

5 ǃAoǃaosa, ǁaixa ǀaon ge sa khoena ǁnāǂam tsî ǁîn ǃgāb ǀkha ǃgam, xawets ge sa khoenats nî hîkākāse ǁaixahâhâ tama ge i. 6 Nē ǂōǂōsib ge ǃkhâikhoms ase ǁaero-i ǀgui-i di ge i. ǁNās khaoǃgâts ge ǁîna, sa ǂhanub ra ǂgaoǀkhā xūnab ǁîna nî ǂâiǂâiǃnâse brons ǀaoba, ǂuruǂurus di ǁgauǁgaus ase ge mā. 7 Khoe-i ga nē ǁgauǁgaus ǃoa kō, o-i ge ǀaob di nâsa xu gere ǂuru, mû i ra-e xus ose, xawe sats hoa khoen di Hui-aotsa xu. 8 Nēsa dīs ǀkhats ge ǁkhāti sida khākhoena ge mîdan, sats ǀguits khoena mâ ǂōǂōsi-i hoa-e xu huiǂui ǁkhā ǃkhaisa. 9 Sida khākhoen ge ǂhomn tsî ǀgînan di nâdi xa ge ǁō tsîn ge ǁnā ǁkharab, ǁnāti ī xoxon diban ge anu hâ i xui-ao, ǀnî ǀgau-i tsîn ai ge ǂuruǂuruhe ǁoa i. 10 Xawe ǃgāxa ǀaon tsîn ge sa khoena sats ge ǁîna ǀkhom, hui tsî ǂuruǂuru xui-ao dan tama ge i. 11 Sats ge ǀaon nî sa khoena nâ tsîn ǁnās ǀkha sa ǂhanuba nî ǂâiǃgâ ǃkhaisa ge mîǁgui. Nē ǀgaub ain ge satsa hoaragase ǀuru tide tsî sa ǃgâisiba nî mûǂan ǁkhā, xawets ge nē ǀhapide ǃhaese ge ǂuruǂuru. 12 ǁÎn ge ǀguis khami ī sōǀôa-i tamas ka io ǂkhausenxū-i xa ǂuruǂuruhe tama hâ. ǃKhūtse, sa mîs hoaraga ǃhūbaib khoena ra ǂuruǂurus ge ǁnāsa ge dī. 13 Sats ge ǀgaiba ûib tsî ǁōb tsîkha ai ūhâ. Sats ge khoe-e ǁōb kōse sī-ū tsî ǁkhawa ûi-ûi ǁkhā. 14 ǂKhaba khoe-i ge ǀnî khoe-e ǃgam ǁkhā, xawe i ge ǁō hâ khoe-e ǁkhawa ûi-ûi ǁoa tamas ka io ǃkhōsis ǃnâ hâ ǀomsa a ǃnoraǃnora ǁoa.

Elob ge ǁgaoǂoaba Egipteǁîn ai ra sî

15 ǀGui-i tsîn ge sa ǃomma xu ûiǂoa ǁkhā tide. 16 Eloxoresa khoen ǃoa kō: ǁÎn ge satsa Elots ase mûǂan tama i, xui-aots ge ǁîna sa kai ǀgaib ǀkha ge ǁkhara. ǁÎn ge kai, ǀgaisa ǀnanub tsî ǃnareb tsîna xu ge ǃkhoeni ǁoa i tsî ǀaes xa hoaragase ge hîkākāhe. 17 Xūn hoan xa ge buruxa is ge ǁgam-i hîa ǁnaetisase ǀaesa ra ǀari-i ǃnâs ge ǀaesa ǃaruǀîǀgui ǀgaisase gere khausa. Hoaraga ǀgaigu kurus digu ge ǁnān hîa ǂhanu-aina nî ǁkhaubase ra ǃkham. 18 ǀNî soa-i ǃnâ gu ge ǀaeǁhabuga ge ǀari, eloxoresa khoenan nî ǁkharase ge sîhe kurusabena gu hîkākā tidega. ǁNā khoen ge Elob di ǀgoraǃgâs xan ra tsâ ǃkhaisa nî mûǂan. 19 Xawe ǀnî soa-i ai gu ge ǀaeǁhabuga ǁgam-i xa hâǂnamihe hâǃâ, ǀaes ra khaus ǃgâ-ai ǀgaisase gere ǂhubi, tsî ǁnāti ǂhanuoǃnâ khoen ge ǁan ai hâ i ǃhūb di ǃhanaǂûn tsîna ge hîkākā.

Israelǁîn ge mannaba ra ǃkhōǃoa

20 Xawe nē tsūǀkhāb ge sa khoena hāǂam tama ge i tsîts ge ǁnās ǃās ǃnâ ǁîna ǀhomǃgān di ǂûna ge mā. Aiǂhomihesa ǂhâbasa tama pereb, ǂûs ǀguisa nî hîhebats ge ǁîna ǀhomma xu ge sîǁnâba. Sats ge mā ǂû-i ge khoe-e ǁkhoaxaba ǂû-i hoa-i ǀkha gere ǀgau tsî hoana kaise gere ǃgâiaǂgao kai. 21 Nēn hoan ge mâtits sa ôana ǀnamǀnamsase ra ǃkhōǂhomi ǃkhaisa ge ǁgau. ǁNā ǂû-i ge ǁî-e gere ǂû khoe-i hoa-i di turab tsî ǁkhoab ǃoa ge hâ i. 22 ǁNā ǂû-i ge ǁnaetisa mâsigu ǃnaka tsamaro-i tamas ka io ǃkhoa-i khami a tsuni ǁkhā, xawe i ge ǁnāpa i ge ǀaes ǃnâs tsîna ge tsuni tama hâ i. Nēs ge sadu khoen nî ǂanse ge dīhe, ǁkhā ǀaes hîa ge sadu khākhoen di ǃhanaǂûna ǀgaisa ǀnanub tsî ǃnareb di ǁaeb ǃnâ gere hîkākās 23 ge ǀgaib âsa ge ǂgae-oa, sa ǂhanu-ai khoen nî ǂûna ūhâse.

24 Sats ge sa mîs ǀkha hoa xūna ge kuru. Hoaraga kurus ge ǁîs di ǀgaiba khākhoenas nî ǁkharase ra sîsenū, xawes ge ǁnān hîa sats ǃnâ ra ǂgomn ǃaroma tsamtsiǃnâ tsî a ǃgâi. 25 Kurus ge mâtits hoa ǀgaugu ai hoan sa ǃoa ra ǀgorena māǂgaoxase ra ǀgoraǂuiba ǃkhaisa ge ǁapoǁapo. 26 ǃKhūtse, nēn hoan ge sats, ǀnamts a khoena ǁîn ǃhana tama ǂûn ǀkhan ra ǂûmā ǃkhaisan nî ǁkhāǁkhāsense ge ī. Sa mîs ge ǁnān hîa sats ǃnâ ra ǂgomna, ûib ǃnâ ra ǃkhōǀgaipe. 27 ǀAes xa ge hîkākāhe tama hâ i ǂû-i ge sores di ǂguro ǀkhâugu xa i ga ǀgam, o gere tsuni. 28 ǁNās ge ra ǁkhāǁkhā da sores ǁhaib aiǃâ ǂkhai tsî da sores ǁhaib ǀkha satsa gangan tsî nî ǀgoresa. 29 Xawe ganganoǃnâ khoe-i di ǃâubasens ge ǃkhoab khami nî tsunibē tsî ǀuriǁgam-i khami nî dâubē.