Gā-aisib 14 - Khoekhoegowab New Translation 2020 (KKG20)

ǁGôa-elona Noaxi di doe-ommi ǀkha ǀgopeǀnōs

1 ǀNî-i ge ǁkhawa khoe-i, ǁaixa ǃgabiga ūhâ hurib ai ra ǃnari ǂgao-e, ǁî-i ǃnari ai hâ doe-oms xa ǂkhabusa ǃnaoǃâro-i ai ra hui-ôa-e. 2 ǀNî khoe-i ge hōǂgās di turaba xu doe-omma ra kuru tsî-i ge ǃnaokuru-ao-e ǁîba ǂans di ǁkhāsib ǀkha ra kuru. 3 Xawets ge sa ǃkhōǂhomis ǀkha ǁGûtse, doe-omma ǁnumi tsî ǃnorasa daoba hurib di ǃgabigu ǃnâ-u ra mā. 4 Khoen ge ǂans di ǁkhāsiban ga ūhâ tama i, xawe hurib ai a ǃnari ǁkhā, ǃaorosasiba xūn sats xa huiǂuihe ǁkhā xui-ao. 5 Sa ǂâis ge sa gā-aisib ǀkha ge kuruhe xūn nî sîsenūhesa. Tsîn ge khoena ǁîn ûigan ǃnaoro-i ai ra ǂgomǃgâ xui-ao, hurib ai ǂgaus ǀkha ǃnari tsî ǃnorasase ǃhūb kōse sī ǁkhā.

6 Nēn ge ǀorokam ǁaeǃgâs hîan gere ǂnīsa, kaikara khoena ǁōǂoas ǃnâ gere ī xūna. ǃÂubasens ǃhūbaib dis ge nēti ī ǂgaus ai, sa ǂgaeǂguis ǃnaka ge ûiǂoa tsî ǃhūbaiba ǀasa suriba khoesi aiǃgûs ǃaroma ge ǁnāxūba. 7 ǀKhaeb ge Noaxi di doe-ommi hîa ǂhanu-aisib nî ûiǃkharu ǃkhaisa ge ī ǁkhāb kaib ai ge hâ i, 8 xaweb ge ǀâxareba khoen xa ǃomgu ǀkha kuruhe hâ ǁgôa-elo-īb ai hâ. ǁKhātib ge ǀâxareba nēti-ī xū-e ra kuru-i ai hâ, ǁgaoǁkhā xū-e kuru tsî i elob ti ra ǀonǂgai xui-ao. 9 Eloxoresa khoen tsî eloxoresasib tsîn hoanab ge Eloba a ǃhuisa 10 tsîb ge xūn tsî ǁîna ge kuru khoen tsîn hoana nî ǁkhara. 11 ǁNātis ge Elob di ǀgoraǃgâsa, ǁîb ge kuru xūn ǀkhan kuruhe hâ xawes tsîna ǀūbeǁgôa-elon ai nî hā. ǁNātib ge Eloba nē ui-uisa ǁgôa-elon hîa ǀomdi gâkhoen dide ra ǃnuina nî hîkākā.

ǁGôa-eloǃoabas di tsoatsoas

12 ǀAib ge ǁgôa-elon ge hōǂuihe, o ge tsoatsoa. ǁÎn ge khoesi ûiba ǁgôa-elon ge ǂguro kuruhe ǁaeba xu ge ǁgaoǁgao. 13 ǁGôa-elon ge hâhâ tama tsî tātsēs tsîna hâhâ tide. 14 Khoesi ǂnīsasib ge ǁîna ǃhūbaib ai ge hā kai tsî ǁnā-amagas ge Elob ge ǁîn ǃhaese nî kā ǃkhaisa ge ǀapesa.

15 ǀGui ǁgûb ge ǁîb ôab di ǃnapetama ǁōb xa kaise gere ǃoa, tsîb ge ǁnā ǀgôab ǁnāti ge ǁîba xu ǃhaese ūbēheb di ī-e ge kuru. ǁÎb ge ǁîb di ǁō hâ ǀgôaba elo-i ase ǃgôasiba mā tsî ǁîb di ǂgaeǂguis ǃnaka ge hâ i khoena ǂganǃgâsa ǃoabade ge ǂnûiǂgāba. 16 ǁAeb ra ǃgû khamib ge nē eloxoresasib di ǁnaetiba ge ǀgai. ǀUnis aib ge ge ǂhanu kai, tsîn ge ǀgaisa ǂgaeǂgui-aogu di mîmās ai ǁgôa-elona gere ǀgoreǀîhe. 17 Khoen ge ǁîn di gao-ao-en ga ǃgôasiba mā ǂgao, xawen ga nē ǃkhaisa dīs ǃaroma kaise ǃnūse ǁan, o mâtib ī ǃkhaisa mûnanai tsî mûhesa ī-i ǁîb di-e gere kuru. 18 Kuru-aogu hîa gere nē īga kurugu ge nē ǀgoreǀîs nî gao-aoba ǀū khoen tsîn ǃnâ khoraǂuihe ǃkhaisa ge ǃaroma. 19 Kuru ǁkhā khoe-i hîa ǁî-i di ǂgaeǂgui-ao-e ra ǂkhîǂkhîǂgao ǂgao-i ge ǁî-i di sîsenǂansa sîsenū tsî khoeb di ība ǁnā khoeb ǂûb ǃgâ-ai îsase gere kuru. 20 ǁNātikōse kuru ǁkhā khoeb di sîsenni xa ǂgaehe tsîn ge khoena nē khoeb hîan gere aiǃâ ǃgôasiba māba gere ǀgoreǀî. 21 ǁNā-amagan ge khoen hîa ǃoa tamas ka io gaosi ǀgaib ǃnaka hâna nēs xa ǁōǁōsa ǃnuis ase ībahe tsî xūn hîa ǀui-i tamas ka io hai-i ǀkha kurusana ū tsî ǀgui Elob ǀguib nî māhe ǃgôasiba gere mā.

ǁGôa-eloǃoabas ra ǃaroma xūn

22 ǁÎn ge Elob di ǂansan ra ǂâisā ǃkhais ǀkha ge ǂâu tama hâ i. Tsîn ge ǂkhabab ǃnân ge ûi hâ i, xawe ǁnātikōse ǀū tsî ǂkhababa ǂkhîb ti gere ǂgai. 23 ǁÎn ge ǀgôana ǃhaoǃnāsi xūn ǁkhāǁkhādi ǃnâ-ū ǃgam, ǂganǃgâsa ǃoabade dī tsî ǁgauoǃnâ ǃgâiǃgâisenga ǁnaetisa tama dīxūn ǀkha gere dī. 24 ǁÎn ûigu tamas ka io ǃgamegan ge ǃaruǀî ǃanuse ge ūhâ tama hâ i. Khoeb ge ǀnî khoeba ǀhôagao ǀgaub ǃnâ ǃgam ǁkhā, tamas ka io ǁîb taras ǀkha ǀais ǀkha ǁnā khoeba ǃoaba ra ǃaromaba. 25 ǁGaiǁgaisa xūn ǀaoǂnâxūs tsî ǃgams, ǃnarib tsî gāxaǃnâb, ǀhôagaosib tsî ǂgomǃgâoǃnâsib, ǂâikorobesib tsî ǂhumib, 26 ǀhapio khoena ǃgôaǃgons tsî ganganoǃnâsib, ǀgaiǃkhōs tsî ǃgamekhôas, ǁgauoǃnâsib tsî ǀaib tsîn hoan ge ge hâ i. 27 ǁGôa-elon tātsēs tsîna di ǀondi âna ǂgaihe tidena ǀgoreǀîs ge tsoatsoa tsî a ǀuni tsî mâ ǂkhabab hoab di ǃaroma. 28 ǁNān hîa ǁîna ra ǀgoreǀîn ge ǃkhau hâ khoen khami ra dīsen. ǁÎn ge ǂhumi tsî kēbos ti mî tsî ǂkhabase ûi tsî ǁîn mîsa khôasa îganǀgē tama hâ. 29 ǁÎn ra ûitsama tama ǁgôa-elon ǃnâ ǂgom xui-aon ge nūs ǃnaka ǂhumiba ǃhoa tsî ǁkharahen nî ǃkhaisa ǃâubasen tama hâ. 30 Xawe ǁkharab ge ǀgam ǃaromara ai ǀunis ai nî hā: ǂGurosen ge ǁîna ǁgôa-elona ǀgoreǀîs ǀkha Eloba ge ǃharaxū tsî ǀgamǁîsen ge ǁîna ǂkhari ǃgôasib ǀguiba ǃanusiba ūba hâ tsî khoenan nî gāxaǃnâse, ǂkhaba ǃnuride ra dī. 31 ǂHanuoǃnâ khoen ga ǁoreo, on ge nî ǁkharahe ǁî-i ain ra nū xūn di ǀgaib ǃnâs ose, xawe ǁore-aon ǃoaǂui hâ ǁkharaba ǃoa.