Gā-aisib ge Adamma ge sâu
1 Gā-aisib ge ǃhūbaib di ǁgûs, ǁîb ǀguib ge ǂguro kuruhe khoeba ge sâu. Gā-aisib ge ǁîba ǁîb di ǂhunuma ǃûǂamsa xu sâu 2 tsî hoaraga ǃhūbaibab nî gaoǂamse ǀgaiba ge mā.
Kainni ge Gā-aisiba ge ǂhara
3 Xawe ǁnāpab ge ǂhanuoǃnâ khoeb Gā-aisiba ge ǂharaba ge hâ i; ǁîb ge ǁî-aitsama ǁîb ǃgâsabab ge ǁaib ǃnâ ǃgam ǃkhais ǀkha ge hîkākāsen.
Gā-aisib ge Noaxa ge sâu
4 ǁNā ǁoreb xa ǃaromahe hâseb ge ǃhūbaiba kai ǁgammi xa ge dâuǃkhūhe, xaweb ge Gā-aisiba ǁîba ǁkhawa ge sâu. ǁÎb ge ǂhanu-ai khoeba ǁîb di supu ǂgaus, haina xu kuruhe hâs ǃnâ ge ǂgaeǂgui.
Gā-aisib ge Abrahamma ge hui
5 ǁAedi ge ǁîdi ǂkhaba ǂâidi ǃnâ ǀgaruǀgaruhe, ob ge Gā-aisiba ǀgui ǂhauǃnâ khoeba mûǂan tsî ǁîba ǀhapiose Elob mûǁae ge ūhâ. Gā-aisib ge ǁîb ôabab a ǀnam, xaweb nî Elob di mîmāde ǁnâuǀnam, ǃkhais di ǀgaiba ge mā bi.
Gā-aisib ge Lotta ge huiǂui
6 Gā-aisib ge eloxoresa khoen ra ǁō hîa ǂhanu-ai khoeba ge huiǂui. ǁÎb ge koro kai ǃāde ge hîkākā ǀaesa xu ge ûiǂoa. 7 ǁÎn ǂkhabasib di ǁgauǁgausats ge noxopa a mû ǁkhā. ǁNā ǃhūb ge ǃgora tsî ra ǀan. Hain ge tātsē ǁan tama ǂûna ra tani tsî ǂōǂkhâǃnâ-i ge ǁnā-i, ǂgom tama ge i-i di īb ase mâ. 8 Nē ǃādi di khoen ge Gā-aisiba kō-īǂam tsî ǃgâi-i tsî tsū-i tsîn ǁaegu ǀgorasa ge dī ǁoa i. ǁNās ǀgui tamas, xawe di ge nē khauǃkhūhe hâ ǃāde, ǁîn ge ûiǃnâ hâ i gâsib xa ra ǂâiǂâiǃnâ da, ǁîn di ǃgâiǃgâ tama is ǀuruhe tidese. 9 Xawe Gā-aisib ge ǁîba ra ǃoaba khoena ǃaorosasiba xu ge huiǂui.
Gā-aisib ge Jakoba ge sâu
10 ǀNî ǃnā-i aib ge ǂhanu-ai khoeba ǁîb ǃgâsab di ǁaiba xu ǃkhoeni tsî Gā-aisib xa ǂhanu daob ai ge ǂgaeǂguihe. Gā-aisib ge ǁîba Elob di gaosiba ǁgau tsî ǃanu xūn xab nî ǂan ǃkhaisa ge mā-am. ǁÎb ge ǁîba dīb gere xūn ǃnâ ge ǃgâiǃgâ kai. 11 Tsî naun gere xūǃgunuxasiba xu ǁîb ūhâ xūna ūǀhana bi ǂgao, ob ge Gā-aisiba ǁîba mâxōǀkhā tsî ge ǃkhū kai. 12 ǁÎb ge khākhoen, ǁîba ǁnāǂams di ǃē-e ge ǃâu hâ ina xu ge sâu bi. ǁÎb ge ǁîba ǀgaisa ǃkhams ǃnâ dansa ge mā, îb Eloba ǃoabas ǃgâ-ai ǃnāsa ǀgaiba mā bi tsî ǁkhā, xū-i xare-i a ǀkhai ǃkhaisa mûǂan.
Gā-aisib ge Josefa ge huiǂui
13 ǀNî ǃnā-eb ge ǂhanu-ai khoeba khobose ge ǁamaxūhe, xaweb ge Gā-aisiba ǁnāxū bi tama ge i. ǁÎb ge Josefa ǁoreba xu sâu tsî ǁîb ǀkha ǃkhō-oms ǃnâ ge ǂgâ 14 tsî tātsē ǁnāxū bi tama ge i. ǁÎb ge ǀgaiba gaosi-i ǂama mā bi tsî khoen, ǁîba gere ǁgâiǀān ǂama ǂgaeǂgui-aose ge mâi bi. ǁÎb ge ǁîb ǃoagu hâ ǀanaǃgâs a ǂhumi ǃkhaisa ge ǁgauǂui tsîb ge ǁîba ǀamo ǃgôasiba ge mā.
Gā-aisib ge Moseb tsî Israelǁîn tsîna Egipteba xu ge ǂgaeǂguiǂui
15 ǀNî ǃnā-i aib ge Gā-aisiba ǀhapio tsî ǃanu ǁaesa ǁgâiǀā-aon di ǁaesa xu ge huiǂui. 16 ǁÎb ge Elob ǃgāgu ǀguib di ǀoms ǃnâ ǂgâ tsî ǃaohesa gao-aoga buruxa dīn ǀkha ge mâǃoa. 17 ǁÎb ge ǃanu ǁaesa ǁîn di ǃgom sîsenni ǃaroma mādawa-am tsî ǁîna buruxa ǃgûdaob ai ge ǂgaeǂgui. Tsîb ge ǁîna tsēa somma tsî tsuxuba ǂkhai ra ǃnâb, ǀgamirodi diba gere mā. 18 Gā-aisib ge ǃgam ǁgamgu ǀApahurib digu ǃnâ-u ǁîna ge ǂgaeǂguiǃkharu, 19 xaweb ge khākhoena ge āǁō kai tsî ǁîn di sorode, huriba xu ge ǀhabuǂui. 20 Tsî ǁnātin ge ǂhanu-aina, eloxoresana ūn ge hâ i xūna ge ūǀhana. ǁÎn ge ǁnaetsanade sa ǃanu ǀonsa gere ǁnaeba, ti ǃKhūtse. ǁÎnats ge ǁkhauba ǃkhais ǃaroman ge ǀhûpe gere koa tsi. 21 Gā-aisib ge ǃhoa ǁoa ge ina ǃhoas di ǁkhāsiba mā tsî ǂkham ǀgôaron nî ǃgāsase ǃhoa ǃkhais tsîna ge ī ǁkhā kai.
© Khoekhoegowab Elobmîs © Bible Society in Namibia, 2020.
