Aorekhoeb
1 Mâtikōse ra a îsa ǂaira âsa, ǁharora ǃnâ
îsa ǀgôase.
Sa ǂnamira di ǃgupusib ge ǃgomǀgausa ǀuira,
ǂansa ūhâ ǀuikuru-aob ǃomsîsenni dira khami ī.
2 Sa sunis ge ǃgupu ǃores,
ǁîs ǃnâ ǂnâhe hâ ǂauxûi-i ǂnâǂoa tamas khami ī.
Sa ǁkhoms ge ǃhoroǀhaos,
lelin ǀkha ǁgâuǂnamisas khami.
3 Sa samra ge ǃaris di ǂkhamrora,
ǁgûs di ǀgēra khami ī.
4 Sa ǃaos ge ǂkhoaǁgûǂgō-ommi khami ī.
Sa mûra ge Hesbons damra,
Bat-Rabims di ǂgâ-ams tawa hâra khami ī.
Sa ǂguis ge Libanonni di ǂgō-ommi
Damaskusǀî ra kōb khami ī.
5 Sa danas ge Karmelǃhommi khami ī,
danaǀûn âs ge ǂkhai ra ǂnūba ūhâ
tsî îsasib ân ǀkha gao-e ǃkhōsis ǃnâ a ūhâ ǁkhā.
6 Mâtikōses a îsa
tsî mâtikōses a ǀnamǀnamsa, ǀnamsase ǃgâiǃgâisendi âs ǃnâ.
7 Sa soros di gaxusib ge palmhais khami ī
samra âs ge draibeǃkhomara khami ī.
8 Tita ge palmhais ai ǂharo
tsî ǁîs ǁnâugu ai nî ǃkhōbasen.
A ra samra âsa draibeǃkhomara khami tita ība
tsî ǂguis âs di hamma apeldi khami.
9 Ams âs ge ǃgâi ǂauxûi-i
ti ǀnamsas di-i
ǂkhanuse ǁnān ǁom hân di amǁgauga-u ra ǂgâ-i khami ī.
Tarekhoes
10 Tita ge a ti ǀnamsab di tsîb ge ǁîb turaba titaǀî hâ.
11 Hā re ti ǀnamsase îm ǃhanab ǁga ǃgû
tsî ǃoesa ǃārodi tawa sī hâǂkhai.
12 Îm ǃnauǁgoaga draibeǃhanagu ǃoa ǃgû
tsî ǁhare gu gosa sī mû.
Tsî xranathaidi ǁnāpa ǁhare hâsa.
ǁNāpa ta ge ti ǀnamma nî mā tsi.
13 Dudaimdi ge ǁamab âde sam dao-ams tawa ra ūǀkhī
tsî ta ge ǃkharagaǃnâgu xūn,
ǀasan tsî ǀorona sâuba tsi hâ, ti ǀnamsatse.
© Khoekhoegowab Elobmîs © Bible Society in Namibia, 2020.
