Taradi ǃoagu hâ ǀapemās
1 Tā ǀnamts a taras ai tauxa. Sats ge ǁîsa mâtis nî satsa tsûtsû ǃkhais ǀguisa nî ǁkhāǁkhā. 2 Tā sa anuxasiba tara-e māǁnâ. 3 ǀNî aogu di tarade xu ǂgō tamas ka io di ge ǁîde nî ǃnui tsi. 4 Tā tarekhoe ǀkhō-aodi ǀkha ǀhû, ǁîdi ge nî ǀhôagaoǃnâ tsi. 5 Tā ǂâibasens ǀkha oaxaesa kō, ǁnā tamas ka iots ge nî ǁgarihe, îts ǃgame-aos marisa matare. 6 Tā ǀai-aode māsen, ūts hâ xūn hoanats nî ǂoaǃnâ xuige. 7 ǁÎde tā ôama, ǁîdets hōǃnâ ǁkhā ǃūke-aisa ǃganga xu hâbē. 8 Îsa sorosa ūhâ ǃgametarasats ga mû, o ǀnî ǀkhā i ai kō. Tās sa ǂâisa mûts ra îsa khoes hoas hîa sa tara tamas ai hâ. ǂGui khoegu ge khoes di îsasib xa ge ǂgaeǂhapuhe. ǀAeǂomaron ra ǀaesa khau kai ǃkhais khamib ge khoes di îsasiba khoeba ǁgoe-ūgus di turaba ra mā. 9 Tā ǀnî aob di taras ǀkha ǂnû tsî ǂû tamas ka io ā. ǁÎsats nî ǀnam tsî ǁnāsats ga dī, os ge ǁî ǃkhaisa sa ûiba hîkākā ǁkhā.
ǀNî khoegu ǀkha hâ khoexasib
10 Tā ǀoro ǀhōsaba aoxū; tātsēts ǁîb soasa nî ǃkhōǃkhuni ǀasaba hō tide xuige. Khoeǀhōgusib ge ǂauxûib hîa ǀorob ra garu khami ra ǃgâib khami ī. 11 Tā ǁore-ao-i di ǃgâiǃgâba suri, tareǃnôa tsūkeǃgâ-i ǁî-e ǃâu hâ ǃkhai-ets ǀū xuige. 12 Tā eloxoresa khoena ǃgâiba xūn ǃnâ ǃgâiǃgâibasensa ūhâ. ǁÎn nî ûin hâs kōse ǀhapixase ūhâhe ǃkhaisa ǂâis ǃnâ ūhâ. 13 Satsa i nî ǃgam ǃkhais di ǀgaiba ūhâ khoe-e xū hâbē, ots ge ǃgamhets nî ǃkhais di ǃaob ǃnâ hâ tide. Xawets ga ǁîb ǀkha ǀgora ǁoa, o kaise ǃûisen ǃgam tsi ǁkhāb a xuige. Sâusa ǃnuidi ǁaeguts nî ǃgû tsîb supuse nî ǃgam tsi ǃkhaisa ǂanbasen.
14 ǁKhāts as kōse sa ǂnamipe hâ khoena ǂan, î gā-ain tawa ǀape-ôa. 15 Gā-ai khoen, Hoan xa ǀGapib di ǂhanuba a ǂann ǀkha ǁgam. 16 ǂHanu-ai khoena sa ǂûǁares ǃaroma ǁkhau. Sa ǀgapiǂâixasib ge sa ǃKhūbats nî ǃao ǃkhais ǃnâ nî hâ.
ǂGaeǂgui-aogu
17 Kuruǁkhāsiba ūhâ xūkuru-aob ge kurub ra xūn âb ǂama ra buruhe tsî ǂgaeǂgui-ao-i di gā-aisib ge mîdi âb xa ra ǁgauǂuihe. 18 Xawe ǃgarise tsî ǁgauoǃnâse ra ǃhoa ǂgaeǂgui-aogu ge ǃās ǃnâ hâ khoe-i hoa-i xa ǃaohe tsî ra ǃhuihe.
© Khoekhoegowab Elobmîs © Bible Society in Namibia, 2020.
