ǀNî xūn khoen dī ǁoan
1-2 Tsū xū-ets ga tātsē dī tama i, o i ge tsū-e tātse hāǂama tsi tide. 3 Tā ǂhanuoǃnâsib di ǃkhomnats nî tsoroga ǃhūba ǃkhāǃkhuri, ǃâubasents hâs xa ǃnāsa ǃgaosats hō ǁkhā xuige.
4 Tā ǃKhūba ǃgôasib di ǃkhai-e tamas ka io gao-aoba ǂoaǂamsa ǃharo-e ǂgan. 5 Tā ǃKhūba sats a ǂhanu-ai ti mîdansa dītsâ tamas ka io gao-aoba sats a gā-ai ti ǂâi kai ǂgao. 6 ǂHanuoǃnâsiba ǀamǀams di ǀgaibats ga ūhâ tama io, tā ǀgoraǃgâ-ao kai. ǀGaiba ūhâ khoe-i ga ǂhanuoǃnâsets nî ǀgoraǃgâ ǃkhaisa khâikhâiǃnâ tsi, ob ge sa ǂanǂansasib ǂhanu-aits as diba nî hîkākāhe. 7 Tā ǁore-i xare-e ǀhûhâsib ǃoagu dī tsî ǁnā ǀgaus ai sa ǃhūǁîn ǃnâ taotaosen.
8 Tā ǁkhā ǁoreba ǀgam ǃnāra dī. ǂGurots ge hō hâ i ǁkharab ge ǀnai ǂâu hâ.
9 Tā Hoan xa ǀGapi Elob mâtikōsets māǂgaoxa ǃkhaisa ǂâiǃgâ tsî mâ ǁguiba-i sats ra ǁguiba ǂgao-i hoa-e nî ūǃoa, ti ǂâi.
10 Tā ǀgoresa ǀōpe, î tā ǀgâsana xū-e māsa îganǀgē.
11 Tā ǀgâsib ǃnâ hâ khoe-e âiǂui. ǃKhūb ge khoe-e ra ǃgamǃgam, xaweb ge ǁkhāti ǁî-e ǁkhawa ra ūkhâi.
12 Tā sa ǃgâsab xa nî ǃhoase ǂhumina ǂâiǂui. 13 Tsî ǁnās ǁkhāsa sa ǀhōsab ǃoagu dī. ǃGâi xū-i ge ǂhumiba xu hā tama hâ.
14 ǂHanuǁî ǂnûs ǃnâts ga hâ, o tā khâimâ tsî ǂgui xūtama xūna ǃhoa. Tsî ǀgorets kao, tā ǀnaits go mî hâ i xūn ǁkhānna mî ka mî.
15 Tā ǃgaroǃās di sîsenni tamas ka io ǃgom sîsenna ǂgōsen; Hoan xa ǀGapib ge dī da nîse nē sîsenga ge mā da.
16 Tā ǁore-aon di ǂnubis ǀkha ǁaeǁaesen; ǃKhūb di ǁkharab amase nî hā ǃkhaisa ǂâis ǃnâ ūhâ re.
17 ǁŌb di ǁgaoǁgaosib sada hoada ǃâu hâ xuige ǃgamǃgamsen.
Naun ǀkha khoexagus
18 Tā ǀhōsa-e mari-i ǃaroma ǀapexū. Tā ama ǃgâsa-e ǃhūbaib ǃnâ hâ hoaraga ǃhuniǀurib ǃaromas tsîna ǀapexū.
19 Tā gā-ai tsî ǃgâi khoesa ǃgamesa ǂoaǃnâ kaisen. Tsauraǃnâ taras ge ǃhuniǀurib ǃgâ-ai a ama-ai.
20 Sa khobon tsî sîsenaon, māsenxase tsî ǂgomǂgomsase ǁîn sîsenna ra dīnats ge ǃgâise nî sîsenū.
21 Sats a ǀnamsens ǁkhās khami sa gā-ai sîsenaona ǀnam, î ǁîna ǃnora kaisa tā ǁnāxūǃgâ.
22 Ûitsama xūnats ga ūhâo, ǁîna ǃgâise kōǃgâ. Mari-ets ga ǁîna xu hōǂgā, o ǁîna ūhâǀgāra.
23 ǀGôagats ga ūhâo, ǁîga ǁgauǃnâ. ǂKham gu a noxopa hîa ǁîga ǁnâuǀnamxasiba ǁgauǃnâ.
24 ǀGôadets ga ūhâo, ǁîdi oaxaesisa ǃûiǃgâ, î ǁîde tā mâ xū-i hoa-e mā-am. 25 Sa ôasats ga ǃgameb ǃnâ māǂui, ots ge kai ǁgui-aisa go dītoa, xawe ǃgâi gomma ūhâ khoeba ǁîsa mā.
26 ǃGâi tarasats ga ūhâo, tā ǁîsa xu ǀgora, xawe ǁîs xats ga ǃgâibahe tama i, o ǁîsa tā ǂgomǃgâ.
27 Sa îba sa hoaraga ǂgaob ǀkha ǃgôasiba mā, î sa îs ge sats ge ǃnaeo, mâtikō tsûba tsâ ǃkhaisa tātsēs tsîna tā ǀuru. 28 Sa ûibats ǁîra surude hâ ǃkhaisa ǂâis ǃnâ ūhâ. Mâtits nî ǁîra dī ra ge xūn ai mādawa-am ǁkhā?
29 ǃKhūba sa ǂgaob hoab ǀkha ǃaoǃgâ, î ǁîb di pristerga ǃgôasiba mā. 30 Sa hoaraga ǀgaib ǀkha sa Kuru-aoba ǀnam, î ǁîb di ǁkhāǁkhā-aoga ǂkhâǃnâ. 31 ǃGôasiba ǃKhūba mā tsî pristerga ǃaoǃgâ. Māts nî tits ge mîmāhe xūn: ǂGuro ǃhanaǂûn, ǁoreǁguibas, ǃanu ûitsama xū-i di ǁguibas; hoa ǁguibadi hîa ge ǂganhede ǁîga mā.
32 Sa huiba ǀgâsana mā re, ob ge ǃKhūba ǀoasa ǀkhaeba nî mā tsi. 33 Ûitsaman hoan ǃoagu māǂgaoxa tsî ǁō hân ǂâiǂâisens ǃoa tsauraǃnâ. 34 ǁÎn di ǀnamsanna ge ǂoaǃnân ǀkha tsâbaǁhao, î ǁîn ǀkha ǃoaǀhao. 35 Tā ǀaesen hâ-e sarisa îganǀgē. Nēti-ī xūna dīs aits nî ǀnamhe xuige. 36 Tāre-i ǀgui-ets ga dī, xawe ǀgui tsēts nî ǁō ǃkhaisa ǂâis ǃnâ ūhâ. Nēsats ga ǂâis ǃnâ ūhâ, ots ge tātsē ǁore tide.
© Khoekhoegowab Elobmîs © Bible Society in Namibia, 2020.
