Siraxi ôab, Jesub di ǀgores
1 Tita ge ra gangan tsi, ǃKhū tsî Gao-aotse
tsî ra koa tsi, ti Elo tsî Hui-aotse.
Gangan tsi ta ge ra,
2 sats ra hui tsî sâu te amaga.
Sats ge ge sâuǂui te
ǁōb, ǁkhō ǂhumib tsî mîǁgaiǁgaide xu.
3 Sats ge sa kai ǀkhommi ǃaroma a ǂansa,
tsîts ge ge sâu te,
ǂgui ǃgomsigu hîa ta ge mû gu,
ǀā khākhoesib ti khākhoen dib,
hîa ra ǃgam te ǂgaon diba xu.
4 Ti khākhoen ge khau ǀaes,
ǀom ta nî ǃkhaisa ra ī ǁoa kaisa xu,
5 ǁōb ǂûba xu;
ǂkhaba mîǁgaiǁgaidi gao-aob ai ge ǃnurihede xu.
6 ǁŌb ǀkha ta ge aisa xu ais ǃoa ge hā-ūhe.
7 Ti khākhoen ge hoa ǀkhāgu ai xāǂgā te hâ;
hui te nî khoe-e ta ge kō-ôa,
xawe i ge ǀgui i tsîna ge ǀkhai i.
8 Xawe ta ge ǃKhūtse mâtikōsets a ǀkhomxaǃnâ
tsî tarenats ge ǃkharu ge ǁaeb ǃnâ dī hâ isa ge ǂâihō.
ǁNān sa ai ra ǂgomǃgânats ge huiǂui
tsî ǁîn di khākhoena xu sâu ǃkhaisa ta ge ge ǂâihō.
9 O ta ge ǃhūbaiba xu,
ǁōba xuts nî huiǂui tega sa ǃoa ra ǀgore.
10 ǀGore ta ge ge, “ǃKhūtse, sats ge a ti î;
tā ti ǂōǂōsigu ǃnâ ǁnāxūǃgâ te re,
ǁîǃgôasenxa khākhoen ǃoagu ta ga ǀgaioǃnâo.
11 Hugaǀgui ta ge koa tsi
tsî gangantsanade nî ǁnaeba tsi.”
Sats ge ti ǀgoresa ge ǁnâu-am
12 tsî ǁōba xu ge sâuǂui te.
ǁNā-amaga ta ge gangan tsî ra koa tsi.
ǃKhūtse, koa tsi ta ge ra!
Xoa-aob ge Gā-aisiba ra ôa
13 Noxopa ta ǂkham hîa, ti ǃnariǂoadi ǀkha ta nî tsoatsoas aiǃâ ta ge ǁkhoase Gā-aisiba ta ga hōsa gere ǀgore. 14 Tita ge Tempeli ǃoa ǃgû tsî ǁîba gere ǂganbasen tsî ta ge ûi ta hâs kōse ǁîba nî ôa. 15 Ti ǂkhamsisa xu ti kairasis kōse ta ge ǁîba ge ǀnam i. ǂKham ta ge isa xu i ge xū-i xare-e Gā-aisiba ôasa xu ge ǁkhae te tama hâ i. 16 Tita ge Gā-aisiba ǁîba ta ra ǃgâtsoatsoa hîa ge ǃkhōǃoa tsî ta ge kai ǂans ǀkha ge mādawa-amhe. 17 Tita ge kai ta ge khami gā-ai tsî ǃKhūb, gā-aisiba ge mā teba ge koa. 18 Tita ge gā-aise ta ga ûisa ge ǂâibasen hâ i tsî ǃgâi xūn ǀguina dīsa ge māsenxa i; tsî ta ge ǃhausen tama hâ. 19 Gā-aisiba ta ge gere ǃkhamba tsî ti tanisens ǃnâ ge ǁkhō i. ǀGore ta gere, o ta ge Gā-aisib xa ta kaise ǀorose ǂan ǃkhaisa, ǃoa hâse gere ǁguiǁnâ. 20 Xawe ta ge ǁîba hōsa ge ǂâibasen hâ i tsî ta ge Gā-aisiba ǁoreba xu ūdawasens ǀkha ge hō. Tita ge Gā-aisib ǃnâ ge kaikhâi tsîb ge tātsē ǁnāxū te tide. 21 ǁÎba hō ǂgaos di turab xa ta ge ǁgarihe, amaga ta ge ǃkhū hâse ge mādawa-amhe. 22 ǃKhūb ge mîde ge ǀkhae te tsî ta ge ǁîde, ǁîba koas ǃaroma gere sîsenū.
23 ǁKhāǁkhāsen ǂgaots ra? ǁNās kao, tita ǃoa hā, îts tita xats nî ǁgauǃnâhena xu ǁkhāǁkhāsen. 24 ǀŪts a ǃkhaisats ga mîǂui, o tare-i ǃaromats ǂhâbats hâ gā-aisib ose ra aiǃgû. 25 Nēs ge ti ǀapemāsa: Gā-aits nî ǃkhais ge xū-i xare-e ǂgan tama hâ. 26 Jokhoesa ūkhâi, î Gā-aisiba xu ǁkhāǁkhāsen. Sats ge mâ xū-i hoa-e xu ǁkhāǁkhāsen ǁkhā. 27 Aitsama mûbasen! Tita ge ǀgaisase ge ǁkhāǁkhāsen tama hâ i, xawe ta ge ǂkhîba ge hō. 28 Sats ge Gā-aisiba ǁkhāǁkhāsensa xu, sats ra māǂuis ǃgâ-ai ǃnāsase nî hōǂgā. 29 ǃKhūb a ǀkhomxaǃnâ xuige ǃgâiaǂgao, î nauna mâtikōseb ǃgâi ǃkhaisa mîbasa tā tao. 30 ǁAebats ūhâ hîa Gā-aisibats nî hōse sîsen, ots ge sa mādawa-amsa, ǂhanu ǁaeb ai ǃKhūba xu nî hō.
© Khoekhoegowab Elobmîs © Bible Society in Namibia, 2020.
