Josiab
1 Josiab xa ǂâiǂâisens ge ǃgâihamxūna habas ǂansa ūhâ khoeb xa habahe hâ ǃgâihamxū-i khami a ǃgâi. ǁÎ-i ge mâ-i hoa-i ǃaroma danib khami ra ǁkhoa tsî ǀkhōxūn di ǀōb tsî ǂauxûib khami, ǂûǁares tawa ī. 2 ǁÎb ge ǂhanu ǀgaub ǁaesa dī-unus diba sao tsî ui-uisa ǁgôa-elona ge ūbē. 3 Josiab ge ǂgomǂgomsase ǃKhūba ge ǁnâuǀnam hâ i tsî ǁnā ǂkhaba ǁaegu ǃnâ khoena ǃKhūban nî sao ǃkhaisa gere ǂgaoǂgaoǃnâ.
Jeremiab
4 Davidi, Hesekiab tsî Josiab tsî gu ǀguigu ose gu ge nau gao-aogu Judab digu hoaga ǁgaisise ge ǁore, Hoan xa ǀGapib di ǂhanuba gu ge aoxū xui-ao. ǀUnis aib ge Judaba gao-ao-i xare-e ge ūhâ tama hâ i. 5 ǁÎgu ge ǁîgu di ǀgaib tsî ǃgôasib tsîkha ǃhaokhoen ai ge māǁnâ. 6 Nē ǃhaokhoen ge ǃKhūb ge ǁîb di Tempeli ǃaroma ǁhûiǂuibasen ǃāsa khauǃkhū tsî ǁîs di ǃganga ǀkhaiǃnâse ge ǁnāxū, Jeremiab ge ǀnai aimûǀgaru hâ i khami. 7 Jeremiab ge ǃnaes âb aiǃâb ge ǀnai kēbo-aose ǁhûihe hâ i, xawe ǁîb di khoen ǂûn xa tsūse ge sîsenūhe. ǁÎb ge khoen ǀkha ǃhanaǂgā-aob ra haina ǂgaeǂui, khôaǁnâ tsî hîkākā khami nî dī tsî ǁnās ǁkhās khami ǁkhāti ǂnubikhâi tsî nî ǃhana.
Esekieli
8 Esekieli ge ai-i ǃnâ xerugu tsî kunis tsîn ǂamai, ǃKhūb di ǂkhaisiba ge mû. 9 ǁÎb ge ǁkhāti Job, hugaǀgui ǃgâi xūna gere dīb ǃoa ge ǁnaeǁgau.
Disiǀgamǀa kēbo-aogu
10 An disiǀgamǀa kēbo-aogu di ǂkhōna, ǁîgu ra Israelǁîna ǂgaoǂgaoǃnâ tsî ǂgomǂgomsa ǃâubasens ǀkha sâu xui-ao, ǁkhawa ǀasa ûiba hō.
Serubabeli tsî Josuab
11 Mâti da kha Serubabela nî koa? ǁÎb ge ǃgomǀgausa râis, ǃKhūb di amǀkhāb ǁôab ai hâs khami ge ī i, 12 ǁnātib ge ǁkhāti Josadaki ôab Josuab tsîna ge ī i. ǁÎkha ge ǃKhūb di ǃanu Tempela ǁkhawa ǀamo ǂkhaisib ǃoa ge kurukhâi.
Nehemiab
13 Sada ge Nehemiab tsîna ǁkhāti kai ǃgôasiba nî mā. ǁÎb ge khôaǂkhūhe ge hâ i ǂnubiǂgoagu Jerusalems diga omkhâi, ǀasa daode ǁîgu ǃnâ ǂnûi tsî ǁîde ǃnau-ams ǃaroma ǀuriga ge ǂgā. ǁÎb ge sida omdi, hîkākāhe ge hâ ide ǁkhawa ge kurukhâi.
ǀNî kai aboxagu
14 Henoxi khami i khoe-i xare-i ge tātsēs tsîna ǃhūbaib ai ge hâ tama hâ i, ǁîb ge ǃhūbaiba xu ǀhommi ǃoa ūǃapahe xui-ao. 15 Josefi khami ī khoe-i tātsē ge ǃnae tama hâ i, ǃKhūb ge ǁîb di ǂkhōn tsîna kōǃgâ xui-ao. 16 Semmi, Seti tsî Enosi tsîgu ge ge ǀgapiǃgôahe hâ i, xawe Adammi ǂkhaisib ge nau hâ ûitsaman hoan ǂamai ge hâ i.
© Khoekhoegowab Elobmîs © Bible Society in Namibia, 2020.
