1 Mâtikōseb kha ǃgāsa, ǃanu ǀhomma sada ǂamai îsa!
Tarebe ǂkhaisa mûheǁkhāsiba!
2 Sores ga ǁhai tsî ǁnās khaoǃgâ ǀhommi ǃnâ ǂoa,
ots ge mâtikōse i Hoan xa ǀGapib xa ge kuruhe xū-e buruburuxa ǃkhaisa ra mû.
3 Tsēǃgâǁaeb ǃnâb ge ǁîs di ǀaexa ǀgamma ǃhūba ra daoǂnâǂnâ
tsî tari-e ǁîs di ǀgamma mâba ǁkhā.
4 ǁGanoms tawa hâ khoeb ge ǂhubi ra ǀgammi ǃnâ ra sîsen,
xawe ǃhomgu ai hâ sores ge ǃnona ǃnāde ǁnās xa ǀgamsa.
ǁÎs ge ǀaexa ǀkhâuga ra sîǂui
tsî gu ge ǁîs di ǃgāsa ǀkhâuga mûde ra ǂgī kai.
5 ǃKhūb, ǁîsa ge kurub ge a kai
tsîs ge ǁîb di mîmās ai, ǁîs daob ai ra ǃgû.
6 ǃKhūb ge ǁkhāti ǁkhâba, ǁîb di ǂhunuma sîsenni,
kamaga ǀkharaǀkharas ǃaroma ge kuru.
7 ǁKhâb ge mâǁae di ǃanu tsēde ra hā ǃkhaisa ra mîba da.
ǁÎb di ǃnâb ge ǃgāsase tsî ǁkhawa ǀhoese ra ǃnâ.
8 “ǁKhâb” ti mîs ge “ǁkhâba” xu ra hā.
ǁKhâb ge ǁaeb ǀkhab ga ǀoasa ǁkhâ kai, o buruburuxa;
tsî ǀhomaib aib ra ǃnâǂoaxa,
o ǃKhūb di toroǂnubisa, ǁgauǁgaus ase ība.
9 ǃKhūb di ǀgapi ǀhommi ge tsuxuba,
îsase ra ǃnâ ǀgamirodi ǀkha ra anihe.
10 ǁÎn ge ǃAnu ǃKhūb xan ge mîmāhe ǃkhaidi ai mâ.
ǁÎn ge hugaǀgui ǁîn di sîsenna ǂgomǂgomsase ra dī.
11 ǀApiǃhanab, ǃgāsa tsî îsaba kō,
î ǁîb di Kuru-aoba koa.
12 Hoan xa ǀGapib ge ǁîba, ǁîb ǃomkha ǀkha ǂgaegamagama tsî ǀhommi aib ai ge ǃammâi,
ǀgui ǀkhāb ǀhommi diba xu nau ǀkhāb ǁga.
13 ǁÎb ga mîmā, os ge tsamarosa ra ǁnātsoatsoa,
tsîb ge napaba ǁîb di mîmās ǃoa ra ǃhaeǃhae.
14 ǁÎb ge sâuǃnâ-omgu ǀhommi diga ge ǁkhowa-am
tsî di ge ǃâude ǀhomanin khami ge ǁkhanaǂoa.
15 ǁÎb di ǁkhāsib ge ǃâude ǀgaiba ge mā
tsî di ge ǃnarede ge ǁnā.
16-17 ǁÎb ra ǃhoa, ob ra ǃguruba ǃhūbaiba tsûba hōǃâ kai;
ǃhomgu ge ǁîb di ǀgaib xa ra ǁnobeǁnobehe.
ǁÎb ra ǂgao, ob ge ǃkhawagas ǂoaba ra ǃgom,
saredi ge ra hā tsî ǁgaoǂoaga ǀapasa xu,
ǁîb ge tsamarosa ǁkhanaǁgôaxa ra ǀhomanin khami
tsî ǂhomn, hîa ǃhūb ai ra ǂnûn khami ra sî.
18 Sada ge ǁîs di îsa ǃurisib xa ra ǂnûmûhe
tsî burugâ rase, ǁnās ra ǀgausa ra kō.
19 ǁÎb ge ǃkhoaba, ǂōb khami ǃhūbaib ai ra tsoro
tsîb ge ǀā ǁkhūgu khami ǃhūb ai ra ǃkhoa.
20 ǁÎb ge ǃkhai ǂoab ǀapas diba ra ǃgom kai
tsî i ge ǁgam-e ǃnareb khami ra karo;
mâ hurirob tsî ǁgamǀaus hoas aib ge ǃnareba
ǁkhaiǁkhausarab khami ra ǁgoe.
21 ǁÎb ge ǀnanuba ra ǃgao kai tsî ǀaexa ǀgammi ǀkha,
ǃgarob di ǃnâugu tsî ǀgânna ra khauǂgamaǂgamaba.
22 Xawes ge ǀnanuxa tsamarosa ǃhaese ǀgâna ǀasa ûiba ra mā,
tsîb ge ǀauba ǀgammi khaoǃgâ, ǀomǂnûisa ra hā-ū.
23 ǁÎb ge mâtib nî ǃgam huriba ǃnōǃnō
tsî ǃnāǃnuide ǁîb ǃnâ ǂnûi ǃkhaisa a ǂan.
24 ǂGauǃnari-aogu ga hurib di ǃaoroxasigu xa ǃhoa,
o da ge ra burugâ.
25 ǃHao tsî buruburuxa ûitsama xūn ge hurib ǃnâ hâ;
ǁîb ǃnân ge kaiǃgâ huriǀgurun tsî ûitsama xūǃnôan tsîna hâ.
26 ǃKhūb di sîsabe-i hoa-i ge ǁî-i ge kurubahe ǂâibasensa,
ǃgâise sîsenǂui tsî ǁîb di mîmās ǃoa ra sîsenǁare.
27 ǂGui xūna da ga mî, xawe da ge tātsē hoana mîtoa ǁkhā tide.
ǁNās ge nēsa ra ǂâibasen: Elob ge hoa xūn ǃnâ hâ.
28 Sada ge ǁîba tātsē ǂâu hâse koa ǁkhā tide,
ǁîb di hoaraga kurus xab a kai xui-ao.
29 ǃKhūb ge ǃaoǃaosa tsî kaise kai;
ǁîb di ǀgaib ge a ǃnāǂamsa.
30 Sats ge ǃKhūba sa ǀgaib hoab ǀkha koa ǁkhā,
xaweb ge sats a ǁgâiǂuisen ǁkhās ǃgâ-ai a kai.
Sats ge ǁîba sa hoaraga ǀgaib ǀkha, tsau tamase ǃaoǃgâ ǁkhā,
xawets ge noxopa ǁîba ǂâu hâse a koa ǁoa.
31 ǀGui-i tsîn ge mû bi tama hâ, ǀgui-i tsîn ge xoaǃgāǃgā bi ǁoa.
ǀGui-i tsîn ge ǁîba ǂhâbasa ǀgaub ai koa ǁoa.
32 ǂKhari ǃâb ǃKhūb sîsenni dib ǀguiba da ge a ǂan,
ǂgui xūn nēn xa kain ge noxopa ǂansa tama hâ.
33 ǃKhūb ge hâ a xūn hoana ge kuru.
ǁÎb ge ǁîba ra ǀgoreǀî khoena ge gā-aisiba māba.
© Khoekhoegowab Elobmîs © Bible Society in Namibia, 2020.
