Sirax 35 - Khoekhoegowab New Translation 2020 (KKG20)

ǃKhūb xa ra ūǃoahe ǁguibadi

1 ǃKhūb di ǂhanuba ǁnâuǀnams ge ǂgui ǁguibade hā-ūs ǁkhās khami ī. ǂKhîbagus ǁguibas ge nau khoen ǀkhats ūhâ ǀhûhâsiba ǁkhawa ǀasaǀasas khami ī. 2 ǃGâisiba sats ǃoagu ge ǃgâi i khoena ǁgaus ge ǃhoroǁguibasa dīs khami ī. ǀGâsana mās ge ganganǁguibasa dīs khami ī. 3 ǁOreba xu ūdawasens ge ǁoreb ǃaroma ǁguibas khami ī tsîb ge ǃKhūba ǁnās xa nî ǃgâibahe. 4 Xawe tā Tempeli ǃoa ǃKhūbats nî ǁguiba xū-i ose hā. 5 ǂHanub ge xū-ets nî hā-ū ǃkhaisa ra ǂgaoǀkhā. 6 ǂHanu-ai khoe-i ga xū-e ǁguiba tsîb ga ǁnuiba altars ai ǂnâǁgôa tsî ǀana altarsa xu ǃapa, ob ge ǃKhūb Hoan xa ǀGapiba ǁnās xa nî ǃgâibahe. 7 ǃKhūb ge nēti ī ǁguibade nî ūǃoa tsî ǁîde tātsē ǀuru tide. 8 ǃKhūbats ga ǀgoreǀî, o māǂgaoxa tsî tā ǀgîxase ǁîba xū-e ǁguiba. 9 Mâ ǁguibas hîats ra mās hoasa dâxase dī, î disiǁîǃâs hîats ra māsa ǃgâiaǂgaoxase mā. 10 Hoan xa ǀGapiba ǁîb ge satsa mā khami, ǁkhāts a khami māǂgaoxase mā. 11 ǃKhūb ge satsa nî mādawa-am tsî sats ge ǁîba mās ǃgâ-ai ǃnāsase nî mā tsi. 12 Tā ǃKhūba ǁguibadi ǀkha ǁamaǃkhuni ǂgao. ǂHanuoǃnâ ǃaromadi ǃaroma ǁguiba-e ǁguibas ge harebeoǃnâ, ǃKhūb ge ǁî-e ūǃoa tide. ǃKhūb ge ǂhanu-ai tsî ǀkhāǁhûixa tama hâ.

ǃKhūb di ǂhanu-aisib

13 ǁÎb ge ǀgâsan ǃoagu ǀkhāǁhûixa tama hâ; tsūdīhe hâ khoe-i ga ǀgore, ob ge ǃKhūba ra ǃgâ. 14 Elob ge ǃguniǀgôa-i ga huib ǃaroma ǀkhoma, o ra ǃgâ. ǁÎb ge tsūse ra sîsenūhe ǃoataras di ǃgaesendi domma ra ǁnâu. 15 Xōra âs ai ra ǂnâǁgôa ǁgamrogu ǀkhas ge ǃKhūb ǃoa, ǁîsa ge ǀhūsasiba ǃaromaba-i ǃoagu ra ǂgai.

16 ǃKhūb ge ǁîba māsenxase ra ǃoaba khoena nî ūǃoa tsîdi ge ǁîn di ǀgorede ǀhommi kōse nî sī. 17 ǃGamǃgamsenxa khoen di ǀgores ge ǃâudi ǃnâ-u ra ǃkharu tsî tātsē sâ tama hâ ǃKhūb Hoan xa ǀGapib tawas nî sīs kōse, tsîs ge ǁnāpa ra hâ, ǃereammi nî tsîs ǀgoraǃgâsa dīhe tsî ǀhapixana nî ǁkharahes kōse.

18 ǃKhūb ge torob ǃnâ hâ ǁkhoaǂgao toroǃkhamaob khami ǃhaese nî dī. ǁÎb ge Israelǁaes di ǀgapiǂâixa khākhoena ǀkhao, karosaǂgao ǀgaib âna tsautsau, ǁîn ǂkhaba ǂgaeǂguisa khôa tsîb ǁîna hoaragase hîkākā tama hâ hîa sâ tide. 19 ǁÎb ge hoaraga khoesibab ǁîn di ǂâidi tsî dīxūn ǃaroma mādawa tama hîa sâ tide. ǁNās khaoǃgâb ge ǁîb di ǂhunuma khoena ǀgoraǃgâ, sâu tsî ǁîna nî ǃgâiaǂgao kai. 20 ǃGomsigu ǁaeb ǃnâb ge ǃKhūb di sâuba, gaxu ǀkhurub khaoǃgâ ra hā ǀnanub khami a ǁkhoreǁharehesa.