1 ǁÎn ga ǁâudīb ǂgaeǂgui-aose dī tsio tā ǀgapiǀgapisen. ǁÎn di ǀgui-i ase ǁîn ǁaegu hâ. ǂNûts nîs aiǃâ kōǃgâ, î i mâ-i hoa-e ǂhâba-i hâ-e hō, 2 ǁnās khaoǃgâts ge mâ-i hoa-i ǃgâi ǁaeba ūhâ xui-ao ǂnû tsî a ǃgâiaǂgao ǁkhā. ǁÎn ge ǃgâi sîsenni ǃaroma ǃgôasiba nî mā tsi.
3 ǃNāsa ǁkhausaben xats ga kai, ots ge ǃhoa ǁkhā; nēb ge sa aiǂhanu. Xawets ge tare-i xats ra ǃhoa ǃkhaisa nî ǂan tsî ǀkhōhe i ra 4 tamas ka io ǀnî ǁkhoaxasi-i hâ ǁaeb ǃnâ ǃhoa tide. 5 ǃGâi ǂauxûib tsî ǃgâi ǀkhōxūn di ǁkhoaxa ǀōb ge ǃuiǂûǁares tawa ǃhuniǀurib ǃnâ ǂnôa ǀapa robainǀuis khami ī. 6 ǂAuxûib ra ǂnâhe hîa ra ǃuiǂûǁares tawa ǀkhōhe ǀkhōxūn ge ǂauxûiba ǃgâise ra ǁkhoa kai tsîb ge ǂauxûiba musik-e ǃnāsase ra ǁkhoaxa kai. ǁÎn ge ǃgomǀgausa ǀuidi hîa ǃhuniǀuri ǀkhunuǂnûidadi ǃnâ ǂnôadi khami ī. ǃGomǀgausa ǃam emeraldǀuis ge ǃhuniǀuriba ǃnāsase ra îsa kai tsîb ge ǃhuniǀuriba ǃgomǀgausa ǀuisa ǃgāsase ra ǂkhai kai.
7 ǂKham ǁkhausabets ka, o khoe-i xats xū-e dîhe tamas kōse tā ǃhoa. Tā ǀgam ǃnāra xa ǃnāsase ǃhoa. 8 ǃNubuse ǃhoa, ǁkhāts as kōse ǂgui xūna ǀoro mîdi ǃnâ mî. Nēs ge ǁnâuǃāxats a tsîts ǁkhāti ǁkhaesen ǁkhā ǃkhaisa nî ǁgau. 9 Tā ǁnāpa hâ ǃgôahesa khoen ǀkha ǀguitikōse dīsen tsî kaigu ǁaegu khâi tsî ǁîgu ra ǃhoa hîa ǃhoa. 10 Napabats ga mû, ots ge ǃgurubats nî ǁnâu ǃkhaisa a ǂan. ǂGomǂgomsa khoe-i garuǀî ǃkhaib hoab, aits ge khoen xab nî ǁkhoreǁharehe ǃkhaisa a ǂan.
11 ǁÂudī-i tawats ga hâ, o ǁaeb ai oa, î tā ǀunigase nî ǁaruse ī. Tā dao-ams tawa mâma, î ǃhaese oms ǃoa ǃgû. 12 Sa oms tawats ge ǃgâiaǂgao tsî sats ra ǂgao khami dī ǁkhā, xawe ǁnāpas tsîna tā ǀgapiǂâixasib di ǁoreba dī. 13 ǀGapiǂâixasis ǃās ǃnâ sa Kuru-aob hîa ǂgui ǃgâi xūn ǀkha ra ǃgâiaǂgao kai tsiba gangan.
ǂHanuba ǁguiǃās
14 ǃKhūbats ga ǃaoǃgâ, ots ge ǁîb di ǂgōǀausa nî ūǃoa. ǁÎb ge ǁnān ǀgoren nîga ǃnauǁgoaga ra khâina nî ǀkhae. 15 Amabes ǃnâts ga Elob di ǂhanuba ǁkhāǁkhāsen, ots ge nî ǂan bi. Xawets ga ǁkhōǁkhōsase ǁnāsa ǃgapaǀî tama i, ots ge nî ǁnā. 16 ǃKhūbats ga ǃaoǃgâ, ots ge taren a ǂhanu ǃkhaisa nî ǂan, tsîts ge sa ǂhanu-aisib ǃaroma nî ǂanǂansa. 17 ǁOre-aon ge ǂhanub ga ǁîna ǁorena xu ǃkhâi, o ǂkhî tama hâ; ǁîn ge ǁîna ǂgaon ra khamin nî dī ǃkhaisa ra mā-am ǁguiǃāsa nî ôa.
18 Gā-ai khoen ge ǂgōǀau-e kō-īǀkhā tide, xawen ge ǀnî khoena ǁnātikōse ǀgapiǂâixa tsî ǁîn ai ǂnīsa tsî tātsēs tsîna ǃao tide. 19 Dīts nîse ī xū-e, dīts nîs aiǃâ ǂōrisase ǂâiǃgâ, îts dīts kao, ǁnās xa tā ǃhausen. 20 Tā ǃgomsiba nî ǃaromaba tsi tits ǂan xū-e sī dī, î tsūdīts ka, o tā ǁkhā xū-e ǁkhawa dī. 21 ǃHao ǀkhari-i ǃnâts ga hâo, hugaǀgui ǂanbasen, 22 î ǀūǂamse nî hāǂam tsi xū-i ǃoagu ǃûisen. 23 Tare-i ǀgui-ets ga dī xawe ǂanbasen. Nēsats ga dī, ots ge ǃKhūb di mîmāde ra ǃkhōǀgaipe.
24 ǂHanub ǃnâts ga ǂgom, ots ge ǃKhūb di mîmāde ra ǃkhōǀgaipe tsî ǃKhūb ai ra ǂgomaiǂnûi khoen ge ǂoaǃnâ tide.
© Khoekhoegowab Elobmîs © Bible Society in Namibia, 2020.
