Gā-aisib di koas
1 Gā-aisiba ǃgâ re! ǁÎb ge ǁîb di koatsanade ǁîb di khoen Israelǁîn ǁaegu, 2 Hoan xa ǀGapib di ǀhûhâsib ǀgaib ǃnâ ra ǁnae.
3 “Tita ge Hoan xa ǀGapib xa ge ǃhoahe mîta.
Tita ge ǀaub khami ǃhūbaiba ǃgū-ai hâ.
4 Tita ge ti omsa hoan xa ǀgapi ǀhommi ǃnâ
tsî ti tronsa ǀnanu-i di ǂkhâǃnâb ai ge kuru.
5 Tita ge ǀguri ǀhomaiba ǃgûǂnami
tsî ǃhūbaib di ǃgamsib ǃnâ ge ǃgû.
6 Tita ge hoaraga ǃhūbaib tsî hurib di ǃgabigu,
tsî mâ ǃhaos tsî ǁaes hoasa ge gaoǂam.
7 Mâ ǃkhai-i hoa-i ai ta ge ǁan ta nî ǃkhai-e ge ôa,
ǃhūbaib di ǃkhai-i, ti omsa ta nî kuru-ai-e.
8 Ob ge ti Kuru-aob, hoaraga kurusa ge ǂnubiba
mâpa ta nî ǁan ǃkhaisa ge mîba te.
ǁÎb ge ge mî: ‘Sa omsa Israeli ǃnâ kuru,
Jakob di ôananôagub ge nî sa ǁae.’
9 ǀAmosib ǃnâ, ǁaeb nî tsoatsoas aiǃâb ge tita ge ǂnubi
tsî ta ge hoa ǀamosib kōse nî hâ.
10 Tita ge ǁîba ǃanu Tentommi ǃnâ gere ǃoaba
tsî ǁnās khaoǃgâ ti omsa Sionǃhommi ai ge om.
11 ǁÎb ge ǀnamǀnamsa ǃās ǃnâ hâǃkhai-e mā te
tsî Jerusalems ǂama ge gao kai te.
12 ǃGôahesa ǁaes ǃnâ ta ge ge ǃnomaǃkhō,
ǃKhūba ge ǁîb di ǂhunuma ǁaes ase ǁhûis ǃnâ.
13 Libanonni sederhaidi khami ge ge ǀom kai,
Hermonǃhommi di sipreshaidi khami,
14 Engedis di palmhaidi khami,
Jerixos di îsa ǃkhādi khami,
îsa ǀkherahaidi ǃgarob ǃnâ mâdi khami,
ǁgammi tawa mâ kai haidi khami.
15 ǁKhūb tsî ǁganas khami ta ge ǃgâi ǁamaba mā
tsî mire-i di hamma gere khoraǂui,
galbanums, onitsas tsî staktes khami
tsî ǃgâihamxū-i khami ǃanu Tentommi ǃnâ ge ī i.
16 Aikehais khami ta ge ti ǁnâuga ge khoraǂui,
îsa tsî anusase.
17 ǂAuxûiǂûǃhanab khami ta ge ti ǀnamǀnamsa ǃkhāde ge māǂui
tsî di ge îsa tsî ǃnāǂamsase ge ǂûtani.
19 Sadu tita ǂhâba hâdo tita ǃoa hā re,
î ti ǂûn xa ǁâ du nîs kōse ǂû re.
20 Tita xa ǂâiǂâisens ge dani-i ǃgâ-ai a ǂkhon;
tita ra mā-i ge ǂnaoba xu ra hā dani-i ǃgâ-ai a ǃgâi.
21 Tita xuts ra ǂû tsî ās
kōsets ge ǃnāsase nî ǂhâba.
22 Titats ga ǁnâuǀnam, ots ge tātsē taotaohe tide;
tita ra mî khami dī, ots ge ǁoreba xu nî sâuhe.”
Gā-aisib tsî ǂhanub
23 Gā-aisib xa a ama i ge ǂhanub xas tsîna a ama. Moseb ge mā da ǂhanub ge Elob Hoan xa ǀGapib di ǃgaeǀhao tsî Israeli di sinagogegu di ǀumi. 25 ǂHanub ge Pisonǃāb tsî Tigrisǃāb tsîkha ǃoras ǁaeb ǃnâ ra ǀoa khami Gā-aisib xa ǀoa hâ. 26 ǂHanub ge Eufratǃāb tsî Jordanǃāb tsîkha ǃgaos ǁaeb ǃnâ ra ǀoaǃnā khami ǁnâuǃāb xa ǀoaǃnā hâ. 27 ǁÎb di mîmādi ge Nylǃāb tsî Gihonǃāb tsîkha ra draibeǃgaoǁaeb ǃnâ ǂkhai khami ra ǂkhai.
28 ǂGuro kurusabeb tsîn ge Gā-aisiba tātsē ǀoasase ge ǂan tama hâ i tsî ǀuni khoe-i ǃhūbaib ai ra ǃgau-i tsîn ge ǁnās ǃnâ ǃgâiǃgâ tide. 29 Gā-aisib di īǁkhāsigu ge hurib ǃgâ-ai a kai. ǁÎb di ǁuib ge ǃhūbaib ǃnaka hâ ǃgam ǁgamgu ǃgâ-ai a ǃgam.
30 Tita xasa, tita ǂûta xa ta ge ǃgoarob hîa ǁgam-e ǃāba xu ǃhanab nî ǂnâhega ra hā-ūb ti ra ǂâi. 31 Tita ge ti ǂûhaidi tsî ǃkhādi tsîna gere ǂnâ ǂgao, xaweb ge ǃgoaba ge ǃā kai tsî ǃāba ge huri kai. 32 Xawe ta ge nēsi ti ǁgauǃnâde ra ǂanǂan tsi ǂgao. Tita ge ǁîde ǁhai ra sores khami nî ǂkhai kai, îb ǁîdi ǃnâba hoa ǃkhaidi ai sī ǁkhā. 33 Tita ge ti ǁkhāǁkhāde kēbo-ao-i di aoǁnâs khami nî ǁhōǂui, îb hānîǁaeb di ôananôaguba ǁîde xu ǃgâiǃgâ. 34 Mû, tita ge tita ǃaroma ǀgui ge sîsen tama hâ i, xawe Gā-aisiba ra hō ǂgao-i hoa-i ǃaroma.
© Khoekhoegowab Elobmîs © Bible Society in Namibia, 2020.
