Elob di kaisib
1 ǃKhūb, ǀamose ûi hâb ge hoaraga xūna ge kuru 2 tsî ǁîb ǀguib ge a ǂhanu-ai. 4 Khoe-i xare-eb ge ǁîb ge dī xūna ǂanǂuis di ǁkhāsiba mā tama hâ, khoe-i xare-i ge ǁîb di sîsenga ǀoasase ôaǃnâ ǁoa. 5 Tari-e ǁîb di ǁkhāsiba ǀgopeǀnō ǁkhā? Tari-e ǁîb di ǀkhomxaǃnâ sîsengu di hoaraga ǂhôasa a ǃhoa ǁkhā? 6 Sada ge xū-e ǁnāpa ǀaro tamas ka io ūbē ǁoa. ǃKhūb ge dī buruxa dīn ge a ôaǃnâheǁoasa. 7 ǁNā ǂhôas di ǀunis kōse da ga sī, o da ge noxopa tsoatsoas tsîna hî tama hâ, o da ge ǀûsens ǀguisa nî hî.
Khoen ge ǁaus ǀguisa i
8 Khoena a tare? Tare-en harebe hâ? ǃGâib ǁîn ra dīb, ǂkhabab ǁîn ra dīb; nēn hoana tare-en ra ǂâibasen? 9 ǀGuikaidisi kuriga ge ûi khoe-i ge ǁnaetisa tama gaxu ǁaeba ge ûi, 10 xawe ǀamosib ǀkha i ga ǀgopeǀnōhe, o gu ge ǁnā kuriga ǁgamǂhoro-i hurib ǃnâ hâ i tsî tsararo-i khami ǀgui ī. 11 ǁNā-amagas ge ǃKhūb ǁnātikōse taniǀnamxasa tsî ǁîb di ǀkhomma, ǁaeba xu ǁaeb ǁga ǁîna ra māsa. 12 ǁÎb ge sada ǃoa ra kō tsî ǁōba ǃoa da ǀgoraǃgâhe hâ ǃkhaisa a ǂan tsî ǁnā-amaga ra ǀûba da ǂgao. 13 Khoe-i ge ǁanǁare-ao-e ra tsâbaǁhao, xawe ǃKhūb ge hoaraga khoesiba ra tsâbaǁhao. ǁÎb ge sada ǂhanuǂhanu, ǁgauǃnâ tsî ra ǁkhāǁkhā. Gūǃûi-aob ra ǁîb di gūna ǃûi, khamib ge sada ǁîb ǃoa ra oahā-ū. 14 ǁÎb ge ǁîb di ǂgaeǂguisa da ga ūǃoa, o sada ǀkha nî tsâbaǁhao tsî a turaxa sada mâpa da tsū ǃkhaisa ǁgausa.
Khoexaǃnâsib tsî ǀnammi
15 Ti ôatse, khoe-ets ga hui, o ta ǁkhā ǁaeb ai ǁî-e ǃgabe. ǀKhaets ka, o ta tsûtsû ra xū-i xare-e mî. 16 Sa mîdi ge māts ra xū-i xa ǃnāsase ra ǃgôa. Tsî di ge ǀaub hîa ǀgamsa tsēs khaoǃgâ ra karakarab khami ī. 17 Ā, ama mîdi ge ǃnāsa sîsenǂuiǁkhāsiba ǃgâi ǀkhaexūn ǃgâ-ai ūhâ, tsîts ge ama ǂâiǂhansents ka, o hoa ǀgamna nî mā. 18 Amaoǃnâsib tsî ǃkhāǃkhās tsîn ge a gâresi. ǀGîxaǃnâ khoeb di ǀkhaexūn ge mûde ra ǂkhabu kai.
ǁÎ-aitsama ǃâisens
19 ǃHoats nîs aiǃâ tare-i xats ra ǃhoa ǃkhaisa ǂan tsî ǀaets nîs aiǃâ sa ǂurusib ai ǂâisa ǂnûi. 20 Sa ǂgaoǂansa sa Elob xats nî ǀgoraǃgâhes aiǃâ ǃâi, ob ge ǁnā ǁaeb ga ǀoa, o nî ǀûba tsi. 21 ǀAeb ǀkhats nî ǁkharahes aiǃâ ǃgamǃgamsen tsî ǁorets ga hâ, o ǃhobasen. 22 Mîmâi-ets ga ǃKhūb ǀkha dī, o ǁkhāts as kōse ǃhaeǁaeb ǃnâ ǁî-e dīǀoaǀoa. 23 Xawe ǁnāti ī mîmâi-ets ga dī, o ǁî-e ūǃoas ǃoa ǂhomisen. Tā ǃKhūb di taniǀnamxasiba ǃâitsâ. 24 ǂÂis ǀguisa hî re! Sats ǀkhab nî ǁōts ka tsēs ai ǁaixa ǃkhaisats ǂhâba hâ? ǁÎb ga ǀgoraǃgâ tsi, ob nî satsa xu dabasen ǃkhaisats ǂhâba hâ? 25 Hoa xūn sats ǂhâba hânats ga hō, o ǂâis ǀguisa hî re, ǃâsa tsîts ga ǀgâsa, o i mâti īsa. 26 Xūn hoan ge ǀgui tsēs ǃnâ ǀkhara ǁkhā. ǃKhūb ge ǃhaese a dī-unu ǁkhā. 27 Gā-aits ka, ots ge dīts ra xūn hoan ǃnâ nî ǂanbasen. ǁOreb ga sa ǂnamipe hâ, o ǂanbasen îts tā ǀhapixa. 28 Gā-ai khoe-i hoa-i ge gā-aisiba mûǂan tsî mâ-i hoa-i ǁnāsa ra ǁgau-e nî ǃgôa. 29 Gā-aisibats ga ǁnâuts kao gangan, ots ge ǁî-aitsama nî gā-ai tsî di ge sa mîde ǀnî khoen ǃaroma nî gā-aisib di ǁui.
ǁÎ-aitsama ǃkhō-aisens
30 Tā sa turab xa gaoǂamhe, î sa turaga ǃkhō-oa. 31 Mâ turab hoaba ǂkhîǂkhîsats ga mā-am, ots ge sa khākhoen aiǃâ xorexūse nî ī. 32 Māǂuis ge nî hîkākā tsi xuige tā ǃkhūsib ǃnâ māǁnâsen. 33 ǀKhope-ao kaits nî xuige tā ǂâu hâ mari-ets ūhâ tama hîa, ǀkhupimari-i ǀkha kai ǂûǁarede dī.
© Khoekhoegowab Elobmîs © Bible Society in Namibia, 2020.
