Elob ge ǁore-aona ra ǁkhara
1 Tā ǂgui ǀgôan, xū-e ǃgâiba tamana turabasen tsî ǁîn ai ǂnīsa. Eloxoresa ǀgôan ge ǂnīsa aihe nî xūse ī tama hâ. 2 Mâtikōsen ga ǂgui xawes tsîna ǃKhūban ga ǃao tama io tā ǁîn ai ǂnīsasib ǀkha kō. 3 Tā kai ǂgomǃgâ-e ǁîn di hānîǁaeb tamas ka io gaxusen nî ûi ǃkhais ǃnâ ūhâ. ǀGui ǀgôa-i hîa ra ǃKhūb ǂâisa dī-i ge ǀoadisin ǁnāsa dī taman ǃgâ-ai a ǃgâi. Sa ǀhobas ǃnâ ǀgôaose ǂgâs ge eloxoresa ǀgôana ūhâs xa a ǃgâi.
4 ǃĀ-i di ǁanǂgāsaben ge ǀgui khoe-i a gā-ai xui-ao, hoaraga ǂhanuo ǁaes ga hîkākāhe, xawes tsîna a aiǃgû ǁkhā. 5 Tita ge nēti ī xūna ǂgui ǃnāde ge mû tsî ǁkhāti ǁnās xa ǃnāsa ǁnāǂamdi xa ge ǁnâu. 6 ǃKhūb ge ǀhûpe ǀhao hâ ǁore-aon tamas ka io hoaraga ǁaes hîa ǁnâuǀnamoǃnâs ǀkha kaise nî ǁaixa. 7 ǁÎb ge aibekam ǁaeb di kai tsî ǀgaisa khoegu, ǁîb ǃoagu khâikhâisen tsî ǁîgu ǀgaib ai ge ǂgomǃgâ hâ iga ǀûba tama hâ. 8 Khoen Sodoms din, Loti ge ǁîn ǁaegu hâ in ge kaise ge ǁîǃgôasen hâ i. ǃKhūb ge nēsa ge ǃhuisa i tsî ǁnā-amaga ǁîna ge hîkākā. 9 ǁÎb ge nē ǁaesa ǀkhom tama ge i tsî ǁîna ǁoren ân ǃaroma hoaragase ge hîkākā. 10 ǁKhātib ge ǃnanikaidisiǀoadisi toroǃkhamaogu ǃgaroǃhūb ǃnâ ǀhao tsî ge ǃKhūb ǃoagu ǃnâudanaxase khâikhâisengu tsîna ǀkhom tama ge i. 11 ǀGui ǃnâudanaxa-i ga hâ hâo, tarekōse i ga buruxa hâ ǁî-i ga ǁkharahe tama i hâo. ǃKhūb ge a ǀkhomxaǃnâ, xawe ǁkhāti ǁaixa ǁkhās tsîna i. ǁÎb ge ǁkhāsib âba ǁorena ǀûba ǁkhā tamas ka io ǁaixasiba ǁgauǂui ǁkhā. 12 ǁÎb di ǀkhommi a kais ǁkhās khamib ge ǁîb di ǁkharaba a ǁkhō. ǁÎb ge khoena dīn ge xūn ai ra ǁkhara. 13 ǀGuis khami ī ǁore-aob tsîn ge ǃnarib hâ xū-i ǀkha ǃnora tide. ǃKhūb ge ǃnūǃnâxasib eloǃaoǃgâxan diba nî mādawa-am. 14 ǂHanu-ai khoe-i hoa-i ge mādawasa nî ǃkhōǃoa; khoe-i hoa-i ge ǃoaǂui-i hâ-e nî ǃkhōǃoa.
17 Tātsēs tsîna tā nēti mî: “Tita ge ǃKhūba xu nî gau. ǀGui-i ǀgapise hân di i tsîn ge tita xa ǂâi tide. Mâti ta nētikō ǂgui khoen ǁaegu nî mûǂanhe? Kurus ge kaise a kai tsî tita ge a ǁauxū. 18 ǃKhūb ga hā, o-i ge xū-i hoa-e nî ǀkhū: ǃHūbaib tsî kai ǁgammi ǁîb ǃnaka hâb, ǀhommi tsî ǁîb xa ǀgapise hâ ǀhommi tsîna. 19 ǃHomgu ge nî ǀkhū tsî ǃhūbaib di ǃgaoǃgaob ge ǁîn ǃoab ga kō, o nî ǂgubi. 20 Tita ais tsînab ge ǁkhāti ǂâisa ǂnûi tide tsî ti daogu xasa tari-e ǁîgu xa nî ǂan. 21 ǁOre tsî ta ga ǂganǃgâsase îǂhôaoǃnâ, o i ge khoe-i xare-e ǂan tide. 22 ǂHanuse ta ga dī, o i ge ǀgui-i tsîna ǁnās xa ǃKhūba mîba tide. Tari-e ǁîba ra ǃâu ǂgao? ǁÎb ge dīb nî tib ge mî xūn ǃaroma kaise a ǂau.” 23 ǂKhari ǁnâuǃāba ūhâ i tsî gâse ǂgaeǂguihe hâ khoe-i ǀgui-i ge ǁnāti-ī xūna a ǂâi ǁkhā.
Elob di Gā-aisib kurus ǃnâ
24 Ti ôatse, ǃgâ î ǂâisa tita ai ǂnûi. Sats ge ǁnātits ga dī, o ǀgui ǂansa nî hō. 25 Tita ge ǂhanu tsî ǃoaǃū hâ mîmāsa nî mā tsi.
26 Tsoatsoas ǃnâb ge ǃKhūba kurus di sîsena ge dī
tsî xū-i hoa-e ǁî-i di ǃkhais ǂûsa ge mā.
27 ǁÎb ge sores, ǁkhâb tsî ǀgamirodi tsîna ǀamosen nî hâhâ ǀgaub ǃnâ ge ǂnûi,
tsî tsēs tsî tsuxuba nî ǂgaeǂguise ge ǀgoraǂgā.
Nēn di ǀgui-i tsîn ge tātsē ǃâ
tsî tsau tsî sîsenǀû tide.
28 Nē ǃâdi ge ǀnî-e nau-i di daob ǃnâ hâ tama
tsî tātsē ǁîb mîsa ǁnâuǀnamoǃnâ tama hâ.
29 ǃKhūb ge nēn hoanab ge kurutoa,
o ǃhūbaib ǃoa kō tsî ǁîba ǃgâi xūn ǀkha ge ǀoaǀoa.
30 ǁÎb ge ǃhūbaiba hoaǃnôa kurusaben
ǁō tsî nî tsara kain ǀkha ge ǀoaǀoa.
© Khoekhoegowab Elobmîs © Bible Society in Namibia, 2020.
