Sirax 12 - Khoekhoegowab New Translation 2020 (KKG20)

1 ǃGâidī-ets ga dī, o tari-i ǁnāpa xu ǃgâiba ra ǃkhōǃoa ǃkhaisa ǁapoǁapo, o i ge sats ra dī-e ǁau tide. 2 Mâ ǃgâidī-i, eloǃaoǃgâxa khoe-ets ra dība i hoa-ets ge nî mādawa-amhe. ǁÎ-i ga satsa mādawa-am tama i, xaweb ge Hoan xa ǀGapiba ǁnāsa nî dī. 3 ǀGui ǃgâi-i tsîn ge ǂkhaba khoe-e ra ǁkhaeǂgao khoe-i ǃoa hā tama tsî nē-i ge ǂhanu-ai dī tama hâ. 4 Eloǃaoǃgâxa khoena mā, xawe tā ǁore-aona hui. 5 ǃGamǃgamsensa khoena ǃgâidī, xawe eloǃaoǃgâxa tamana tā xū-i xare-e mā. Tā ǂû-e mā tamas ka ion ge sa khoexaǃnâsiba sa ǃoagu nî sîsenū. Mâ ǃgâi xū-i nēti ī khoenats ra dība i ge ǀgam ǃnāra ǁnās xa ǃnāsase ǂkhabasiba mādawas ase sats ǂama nî hā-ū. 6 Hoan xa ǀGapib ge ǁore-aona ǃhuisa, tsîb ge ǁîna nî ǁkhara. 7 ǃGâi khoena mā, xawe ǁore-aona tā hui.

8 Xūn ga ǃgâise ǃgû, o i ge tarin a sa ǂhunuma ǀhōsa ǃkhaisa mîsa a ǃgom, xawe ǃgom ǁaeb ǃnâts ge sa khākhoena mûǂan ǁkhā, 9 tsîn ge sa ǀhōsana ǁnā ǁaeb ai nî ǁnāxū tsi. Xawe ǃgâiǃgâts ka, on ge sa khākhoena ǀhōsan khami nî dīsen. 10 Tā khākhoe-i, ǁî-i di ǂkhabusasib ǀuriǀgūb ase ī-e ǂgomǃgâ. 11 ǂAnbasen, î tare-eb ra dī ǃkhaisa ǃgamǃgamsenxaseb ga ǁgausen xawe ǃkhē. ǁÎb ge ǀuri-e xu kuruhe hâ mûsenǃnâxūs, ǂkhanuǂkhanuhes ra xawe ǀuriǀgūb xa ra habuhes khami i. 12 Khākhoeba sa amǀkhāb ǁôab ai ǂnû kai, ots nî mû ǃkhais ge sats ǂgomǃgâ-aihe hâ ǃkhaisab ra ū ǂgaosa. Sa xōǀkhāts ga ǂnû kai bi, ob ge sa ǂnûǃkhaisa xu nî ūǁnâ tsi. Ti mîdi di amabats ge ǁnā ǁaeb ai ǀgui nî mûǂan tsî ǁîdets ga ǂâihō, o nî tsûaǂgao. 13 ǀGui khoe-i tsîn ge ǀao-e ra tsaurase ǁnaeba tamas ka io ǀkhōba tamas ka io ǀgurun tsî xamarina ra ǂauǂau tsî ǁîn xa nâhe khoe-e ǀkhom tama hâ. 14 ǀGui khoe-i tsîn ge satsa ǁore-aon ǀkhats ga hâǁare tsî ǁîn ra dī tsūdīn ǃnâ ǁhao, o ǀkhom tide.

15 Khākhoe-i ge ǁaero-i ǀgui-e, ǃgomsi-i hā tamas kōse ǀgui sats ǀkha nî hâ. 16 Khākhoeb ge tsaura gowab ǃnâ, satsab nî ǃnui ǀgausab ra ǀape, o ra ǃhoa. ǁÎb ge sa tsûaǂgaob ǃnâ ra ǁhao khami ra ǁgausen, xaweb ge soa-eb ga hō, o nî ǃgam tsi. 17 ǃGomsib ǃnâts ga ǂgâ, ots ge aisǀkhāb aib satsa ra hui ǂgao khami ǃâu hâse nî ǀhao-ū bi, xaweb ge satsa ǃnuisa ǁguiba hâ. 18 ǁNā ǁaeb ai ǀguib ge mâǃnôa ǀhōsab a ǃkhaisa ǁgau, ǃomkha ǁam, ǃnābindana tsî sats xa hâ ǂhôana nî khoraǂui.