ǃGameba xu hâ aiǁgaus
1 ǃGâsado, ǂhanub khoe-e ûi i hâs kōse ǀgui gaoǂam hâ ǃkhaisa du kha a ǀū, nēsa ta ge ǁnān Moseb ǂhanuba* ǂann ǀkha ra ǃhoa. 2 Taras ge ǂhanusise ǁîs aob ûi hâs kōse ǁîb ǀkha ǃgaeǀhaohe hâ. ǁÎs aob ga ǁō, os ge nē ǂhanuba xu ra ǃnora. 3 Xawes ga ǁîs aob ûitsama hîa ǀnî aob ǀkha ǁanǀhao, os ge ǃgamekhôa-aose nî ǃgapaǀîhe. ǁÎs aob ga ǁō, os ge ǂhanuba xu a ǃnorasa tsîs ge ǃgamekhôa-ao tama hâ, ǀnî aob ǀkhas ga ǃgameo. 4 ǁNās ǁkhās ase du ge sadu tsîna ǂhanub ǃoa Xristub* di soros ǃnâ-u ge ǁō, ǀkhara aob hîa ǁōba xu ge ūkhâiheb ǀkha du nî ǃgaeǁarehe tsî da Eloba nî ǂûtanibase. 5 Khoesi ǂūsib ǃnâ da ge hâ i, o gu ge ǁoreb di turagu ǂhanuba xu ra gongonǃnâhega sada ǃnâ gere sîsen, ǁōba nî ǂûtanibase. 6 Xawe nēsisa da ge ǁnān sada ge ǃkhōsis ǃnâ ūhâ ina ǁōǁnâ tsî ǂHanuba xu ge ǃnoraǃnorahe. ǁNā-amaga da ge nēsisa ǃaruǀî ǀoro xoaǁguisa ǀgaub ǂHanub dib ai ûi tama, xawe ǀasa ǀgaub Gagab dib ǃnâ ûi hâ.
ǂHanub tsî ǁoreb
7 Tare-e da kha ǁnâi nî mî? ǂHanuba a ǁore? Tātsē, ǁnāti tamas! ǂHanu tamab ga hâ, o ta ge ǁoreb a tare ǃkhaisa ga ǂan tama i hâ. Turab a tare ǃkhaisa ta ge ǂhanub, “Turats ge tide” ti ra mî tamab ga hâo, ga ǂan tama hâ. 8 Xaweb ge ǁoreba nē mîmās ǃnâ-u soasa hō tsî mâ tura-ai-i hoa-e tita ǃnâ gere hā-ū. ǂHanub oseb ǁoreba ǁō hâ xui-ao. 9 Ti ûib ǃnâb ge ǂhanuba ta ge ǀū i ǁaeba ge hâ i, xawe mîmās ge hāo, ob ge ǁoreba ǁkhawa ge ûi 10 tsî ta ge tita ge ǁō. Nē mîmās tita ûiba nî hā-ūbase ge ī-is ge ti ǁōb ǀguiba ge ǃaroma. 11 ǁOreb ge mîmās ǃnâ-u ǃēǃkhō, gāxaǃnâ tsî ge ǃgam te.
12 ǂHanub ǃanu tsîs mîmāsa ǁkhāti ǃanu, ǂhanu-ai tsî a ǃgâi hîa. 13 O-i kha ǃgâib ge ti ǁōba ǃaroma ti ra ǂâibasen? Tātsē! ǁOreb ge ǃgâiba ǁōb ǃnâ ge ǀkharaǀkhara. ǀNî mîdi ǃnâ, ǁoreb ge mîmāsa ǁîb di ama ǀgaub ǃnâ ǂanǃgâhe tsî-i nî mâtikōseb a ǃaoǃaosa ǃkhaisa mîmās ǃnâ-u mûmûsase ge sîsenū.
Sada ǃnâ hâ ǃkhams
14 ǂHanub a gagasi ǃkhaisa da ge ǂan, xawe tita ge ǁoreb di khobosis ǃnaka ǁamaxūhe hâ khoes ǀguisa i. 15 Ti dīga ta ge ǁnâuǃā tama hâ, dī ǂgao ta ra xū-e ta dī tama xui-ao, xawe ta ge ǁkhan ta hâ-e ra dī. 16 ǂGao tama ta hâ xū-e ta ga dī, o ta ge ǂhanub a ǃgâi ǃkhaisa ra ǃkhōǃgâ. 17 Xawe ti tama ta ge ǃaruǀî dī ta ra xūna ra dī ta, xawe ǁoreb tita ǃnâ ǁan hâb ge. 18 ǂAn ta a ǃkhais ge ǃgâi-i tita ǃnâ a ǀkhaisa. ǃGâiba dīs di turaba ta ūhâ, xawe ta ge ǁnāsa dī a ǁoa. 19 Dī ǂgao ta ra ǃgâiba ta dī tama, xawe ta ge ǂkhabab, dī ǂgao tama ta hâba ra dī. 20 Dī ǂgao tama ta hâ xūn hîa ta ra dīn ge ǃaruǀî tita xa dīhe tama hâ, xawe ǁoreb tita ǃnâ hâb xa.
21 Nē ǂhanub ǃnâ ta ge hō-i ge: ǃGâiba ta ra dī ǂgao, xaweb ge ǂkhababa tātsēs tsîna ǁnāxū te tama hâ. 22 Ti ǃnākhoesib hoaba xu ta Elob di ǂhanub ǃnâ ra ǃgâiaǂgao, 23 xawe ta ge ti soros ǃnâ ǀkhara ǂhanu-i, ti ǂâis di ǂhanub ǀkha ra ǃkham-e ra mû. ǁOreb di ǂhanub ge tita ǃnâ sîsen tsî tita ǃkhōsis ǃnâ ūhâ. 24 Ti ǀkhomǀkhomsa khoeta! Tari-e nē soros ǁōb disa xu nî ore te? 25 Eloba gangan re Jesub Xristub sada ǃKhūb ǃnâ-u.
Tsîb ge nēba a ti mâsi: Ti ǂâis ǀkha ta ge Elob di ǂhanuba ra ǃoaba, ti khoesi ǂūsib ra ǁoreb di ǂhanuba ǃoaba hîa.
© Khoekhoegowab Elobmîs © Bible Society in Namibia, 2020.
