Xristub* ǃaroma da ûi hâ
1 Tare-e da kha ǁnâi nēn xa nî mî? ǁOreb ǃnâ da kha nî hâhâ, îb ǀkhomma ǀarosen? 2 Tātsē! Mâti da kha sada, ǁoreb ǃaroma ǁō hâda ganupe ǁîb ǃnâ nî ûi? 3 ǂAn tama du hâ, sada Xristub Jesub ǃnâ da ge ǁāǁnâheo, ǁîb di ǁōb ǃnâ ra amǃnâxasa? 4 ǁĀǁnâs ǃnâ-u da ge ǁîb ǀkha ǁōb ǃnâ ǁkhōhe hâ, Xristub ge ǁō hâna xu ǁGûb di ǀgaib ǃnâ-u ǂkhaiǂkhaihe khami da nî ǁkhāti ǀasa ûib ǃnâ ûise.
5 ǁÎb di ǁōb ǃnâ da ge ǁîb ǀkha a ǀguis ǁkhās khami da ge ǁîb di khâis ǃnâ nî ī. 6 Sada ǀoro khoesib ge Xristub ǀkha sada ǁorexa ûib nî hîkākāhesa ǃoa a ǃgâuhe tsî da ǃaruǀî ǁoreb di khobo tide ǃkhaisa da ge a ǂan. 7 ǁŌ ra-i, ǁoreb di ǀgaiba xu ra ǃnoraǃnorahe xui-ao. 8 Xristub ǀkha da ge ǁō, xui-ao da ge ǁîb ǀkha da nî ûi ǃkhaisa ǁkhāti ra ǂgom. 9 Tsî da ge ǂan Xristub ge ǁōba xu a ūkhâihe tsî tātsē ǁkhawa ǁō tidesa. ǁŌb ge ǃaruǀî gaoǂam bi tide. 10 ǁŌb ge ob ge ǀgui ǃnās ama ǁoreba ge ǁōba tsîb ge nēsib ûi hâ ûiba Eloba ra ûiba. 11 Nēs ge sadu ǂûdu xa du nî ǂâi ǀgausa; sadu ǁoreba ǁōba hâs ase, xawe du Xristub Jesub ǃnâ Eloba ûiba hâse.
12 ǁNā-amagab ǁoreba ǃaruǀî tā sadu ǁōǁkhā sorosa gaoǂam, î ǁîb turagu ǃnâ tā māǁnâsen. 13 Tā sadu uniǁaede ǃaruǀî ǂkhabab di ǁâtanin ase sîsenū, xawe ǁōba xu ge ûi khoe-i khami sadu hoaraga sorosa Elob ǂhanu-aisib ǃoa sîsenū. 14 ǁOreb ge sado gaoǂam tide, Moseb ǂhanub* ǃnaka du hâ tama, xawe du ǀkhommi ǃnaka ûi hâ xui-ao.
ǂHanu-aisib sîsenaon
15 O ǁnâi mâtis? ǂHanub ǃnakas ose, xawe da ǀkhommi ǃnaka hâ xui-ao da kha nî ǁore? Tātsē! 16 Khoe-i ǁî-i ǃnaka māǁnâsen tsî du ra ǁnâuǀnam-i di ǃgā du a ǃkhaisa du kha a ǀū. ǁOreb, ǁōb ǃoa ra sī-ūb kas tamas ka io Eloba ǁnâuǀnams, ǁîb ǀkha ǂhanu-ai kaihes ǃoa ra sī-ūs kas hoasa? 17 Aibe du ge ǁoreb di ǃgā i, xawe du nēsi ǁîb ǃnaka du ge māǁnâhe ǁkhāǁkhāǀgauba ǂgaob hoaba xu ǁnâuǀnam hâ ǃkhais ǃaroma Eloba gangan re. 18 Tsî ǁoreba xu ǃnoraǃnorahe tsî du ge ǂhanu-aisib ǃgāse ge dīhe. 19 Sadu di khoesi ǂkhabusasiba ta a ǂan xui-ao ta ge khoesi ǀgaub ai ra ǃhoa. Sadu ge hoaragase ǃanuoǃnâsib tsî xorexūsasib tsî ǁgauoǃnâ ûiba ûis ǃnâ ge māǁnâsen hâ i. ǁKhā ǀgaus ai nēsi ǁnâi ǂhanu-aisib di ǃgādīhes ǃnaka, ǃanu ûib ǃaroma māǁnâsen re.
20 ǁOreb di ǃgā du ge i, o du ge Elob di ǂhanu-aisiba dīǀoaǀoas ǃoagu hâ i xui-ao. 21 Tsî tare-e du ǁnāpa xu ge hō? ǁNān, ǁîna du nēsi ra taon di ǀams a ǁō xui-ao. 22 Xawe du ge sado ǁoreba xu ǃnoraǃnorahe tsî ge Elob di ǃgā kai tsî du ge sadu mādawa-ams ǃaroma ǃanusib hîa ǀamo ûib ǃnâ ra ǀammi ǃnâ ge ǀomkhâi. 23 ǁOreb di mādawa-ams ge a ǁō, xawe Elob di ǀkhommi mās ge a ǀamo ûi, Xristub Jesub sada ǃKhūb ǃnâ hâsa.
© Khoekhoegowab Elobmîs © Bible Society in Namibia, 2020.
