Romeǁîn 2 - Khoekhoegowab New Translation 2020 (KKG20)

Elob di ǂhanu-ai ǀgoraǃgâs

1 ǁNā-amaga khoetse, tarits ga xawe, ǀhapiokaisen-i ge a ǀkhai. Nau-ets ra ǀgoraǃgâ ots ge ǁî-aitsama ra ǀgoraǃgâsen, ǀgoraǃgâts ra xūn ǁkhānats ra dī xui-ao. 2 ǂAn da ge a Elob ǀgoraǃgâs a ǂhanu-ai ǃkhaisa nēti ī xūna ra dī khoen ǂama. 3 Khoetse sats kom nau khoen ǁnāti ī xūna ra dīna ra ǀgoraǃgâo, ǁkhā xūna ra dīǃâ. Elob di ǀgoraǃgâsats nî ǃkhoeni tits ra ǂâi? 4 Tamas ka iots ǁîb ǃgâisib, tanixasib tsî ǃnūǃnâxasib di ǃkhūsiba ra ǃharaxū? ǂAn tamats kha ǁnâi hâ Elob di ǃgâisib ǃhobasens ǃoa satsa ǂgaeǂguisa ra ǂâibasen ǃkhaisa? 5 Xawe sa karokarosens tsî sa ǃhobasen ǂgao tama ǂgaob ǀkhats ge ǁaiba sa ǃoagu aitsama ra ǀhaoǀhaobasen, Elob ǁaib di Tsēs ǁîs ais ǂhanu-ai ǀgoraǃgâsa nî ǂhaiǂhaihes kōse. 6 ǁNā Tsēs ai i ge mâ-i hoa-e ǁî-i di sîsengu ǃoa nî mādawa-amhe. 7 ǁNān hîa ǃnūǃnâxasib ǀkha ǃgâidīgu ǃnâ ǂkhaisib, ǃgôasib tsî kā ǁoa ûib tsîna ra ôa-amn ge ǀamo ûiba ǁîb xa nî māhe, 8 xawe ǁnān, ǁîǁâsensa xu amaba ǂhara tsî ǂhanuoǃnâsiba ra ǁnâuǀnamn aib ge Elob di ǁaib tsî ǀkhaoba nî hâ. 9 ǂKhababa ra dī-i hoa-i ge ǂōǂōsib tsî tsūǀkhāb tsîna mādawa-ams ase nî hō; ǂgurosa Jodeǁîn tsî ǁnās khaoǃgâ Grikeǁîna. 10 Xawe ǂkhaisib, ǃgôasib tsî ǂkhîb tsîna, ǃgâise ra dī-i hoa-i ǂama, ǂgurosa Jodeǁî-i tsî ǁnās khaoǃgâ Grikeǁî-i ǂama. 11 Elob tawa i ǀkhāǁhûi-e ǀkhai xui-ao.

12 ǂHanub ose gere ǁoren ge nî kāǁō ǂHanuban ga ǂan tama i xawe, tsî ǁnān ǂHanuba ǂanse ra ǁoren ge ǂHanub ǀkha nî ǀgoraǃgâhe. 13 ǂHanuba ǁnâus ǀkhas ose, xawe ǁî-i di sîsenga xu ǀgui i ge khoe-e Elob ǀkha a ǂhanu-ai kaihe ǁkhā. 14 Jodeǁî taman* ga ǂHanuba ūhâ tamaǃâ, khoesi ǂūsiba xu ǂHanub di ǂgaoǀkhāde dī, on ge ǁîn ǂûna ǂHanub khami ī, ǂHanuban ūhâ tama hâ xawe. 15 ǁÎn di tanisens ǀkhan ge ǂHanub di ǂgaoǀkhādi ǁîn di ǂgaogu ai a xoasa ǃkhaisa ra ǁgau. ǁÎn di ǂgaoǂans tsîn ge ra ǃkhō-am, ǂâidi ân ra ǁîǃnābe ǂnoagu tamas ka io ǃhoa-oregu ǃkhaisa. 16 Tsî ǁnā Tsēs aib ge Eloba ti ǃGâiǂhôas ǃoa, khoen di ǂganǃgâsa xūna Xristub* Jesub ǃnâ-u nî ǀgoraǃgâ.

Jodeǁîn tsî Moseb ǂhanub*

17 Sats kom Jodeǁîts a ti ǂgaisen tsî ǁnās ǀkha a ǂnīsao; ǂHanuba ǂgomǃgâ tsî Elob di ôats a ǃkhais ǃnâ ra koaseno. 18 ǂHanub ǃnâts ge ǁgauǃnâhe amagats ge ǁîb di ǂâisa a ǂan tsî ǁnā-amaga ǂhanun tsî tsūn ǃnâ hâ ǃkharagagusiba a mî ǁkhā. 19 Sats ge a ǂgīn di ǂgaeǂgui-ao tsî ǃkhaenab ǃnâ hân di ǃnâ, 20 gâren di ǁgauǃnâ-ao tsî noxopa ǁkhāǁkhāsa ūhâ taman di ǁkhāǁkhā-aots a ǃkhaisa ǃgâise a ǂan. Sats a ǀoasa ǃkhōǂgāb ǂans tsî amab dib tsînats ǂHanub ǃnâ ūhâ ǃkhaisa a ǂan xui-ao. 21 Naunats ra ǁkhāǁkhā hîats kha ǁî-aitsama ǁkhāǁkhāsen tama hâ? “ǃNarits ge tide” tits ra aoǁnâ hîats ra ǃnari? 22 “ǃGamebats ge khôa tide” tits ra mî hîats ra ǃgamekhôa? ǁGôa-elonats ge ra ǂhara, xawe ǁîn di tempelga xu ǃnari tamats hâ? 23 Sats hîa Elob ǂhanub ǃnâ ra koasentsa, ǁîba khôas ǀkhats Eloba ǃgôaoǃnâ kai tama hâ? 24 Xoamâihe hâ khami: “Sadu Jodeǁîdu ǃaromas ge Elob di ǀons ra Jodeǁî taman xa ǃkhāǃkhāhesa.”

25 ǃGaos* ge harebesa ūhâ Moseb ǂhanubats ga ǃkhōǀgaipe, xawets ga ǂHanub di ǃûǂamao, os ge sa ǃgaohesa harebeoǃnâ. 26 ǃGaohe tama Jodeǁî tama-i ga ǂHanub di ǁguiǂamde ǁnâuǀnamo, o i kha ǁî-e amab ǃnâ ǃgaohe hâse ra ǃgapaǀîhe? 27 ǁNāti ī ǃgaohe tama khoe-i ge xoaǁguisa ǁgaraga ūhâ tsîts ga ǃgaohe hâ xawe satsa nî ǀgoraǃgâ, ǂHanubats ga ǃûǂamo. 28 ǃAugasi īsi tamab ge ama Jodeǁîse ra dī tsiba tsî ǃgaohes ge ǃaugasi soros ǀkha dīxū-e ūhâ tama hâ. 29 Xawe ǂganaga hâ amab ge ra ama Jodeǁî kai tsi tsî ǃgaohes ǂgaob ǃnâ ge dīhes ge Gagab ǃnâ-u ǂganagab ǀkha a dīxūxa. ǁÎs ge a gagasi tsî xoaǁguisa ǂHanub xa hâ tama hâ. ǁNāti ī khoe-i ge khoe-e xu tama tsî Eloba xu hâ koasa ra ǃkhōǃoa.