Romeǁîn 14 - Khoekhoegowab New Translation 2020 (KKG20)

Tā ǀgoraǃgâgu

1 ǁNā-i ǂgoms ǃnâ a ǂkhabusa-e ǁkhoreǁhare, ǁî-e ǀgoraǃgâs ose. 2 ǀGui-i ge hoa xūna i a ǂû ǁkhā ti ra ǂgom, xawe ǂgoms ǃnâ a ǂkhabusa-i ge ǃhanaǂûn ǀguina ra ǂû. 3 ǁNān hoa xūna ra ǂûna an tā naun ǃhanaǂûn ǀguina ra ǂûna ǀgoraǃgâ în ǁnān ǃhanaǂûna ra ǂûna tā ǁnān hoa xūna ra ǂûna ǀgoraǃgâ, Elob xan ǃkhōǃoahe hâ amaga. 4 Taritsa ots ǀnî khoe-i di ǃgā-e ra ǀgoraǃgâ? ǁÎ-i di ǃKhūb ge nî mîǁgui tari-i ra ǃgâi sîsenna dī tamas ka io dī tamasa. ǁÎ-i di ǃKhūb ǁî-e ǀgapiǀgapisa a ǁkhā xui-ao.

5 ǀGui khoe-i ge ǀgui tsēsa nau tsēs ǂamai ra ǃgôa, nau-i hoa tsēde ǀguiti-īse ra ǃgôa hîa. Mâ-i hoa-i ge ǁî-i di ǂâis ǃnâ nî ǂanǁapo. 6 ǁNān ǂanǂansa tsēsa ǀgapise ra ǃgapaǀî-i ge ǁîsa ǃKhūb di ǃgôasib ǃoa ra dī. Hoana ra ǂûn ge ǃKhūb di ǃgôasib ǃoa ra dī, Eloban ra gangan amaga. Tsî hoa xūna ǂû taman ge ǃKhūb di ǃgôasib ǃoa ra dī tsîn ge Eloba ra gangan. 7 Sada xa i ǀgui-i tsîna ǁî-aitsama ûibasen tama tsî ǀgui-i tsîna ǁî-aitsama ǁōbasen tama hâ xui-ao. 8 Ûi da karao, o da kom ǃKhūba ra ûibao tsî ǁō da karao, o da kom ǃKhūba ra ǁōbao. Ûi da kas, ǁō da kas hoasa da ge a ǃKhūb di. 9 Nēs ǃaromab ge Xristuba* ǁkhāti ǁō tsî ge ûi, ǁō hân tsî ûitsaman di ǃKhūb nîse. 10 Tsî satsa tarexats sa ǃgâsaba ra ǀgoraǃgâ? Tamas ka io tarexats sa ǃgâsaba ra ǃharaxū? Hoada ge Elob di ǀgoraǃgâǃnaos aiǃâ nî mâ. 11 Xoas ra mî xui-ao:

“Tita ûi hâs kōse,

i ge mâ-i hoa-e ti aiǃâ nî ǃhon

tsî mâ nam-i hoa-i ge

tita a Elo ǃkhaisa nî ǁguiǁnâ, tib ra ǃKhūba mî.”

12 Mâ-i hoa-i ge aitsama Elob tawa nî ǃereambasen.

Tā ǁîǃnābe ǃnôa-aiǃnaose ībagu

13 Tā-i nē-e nau-e ǀgoraǃgâ, xawe tā sa ǃgâsa-i daob ǃnâ ǃnôa-aiǃnao-i tamas ka io ǂhanixū-e ǁgui. 14 Tita ge ǃKhūb Jesub ǃnâ ǂan tsî a mîdansa, xū-i xare-i ǁî-i ǃnâ ǃanuoǃnâ tama ǃkhaisa, xawe i ge ǁnā khoe-i hîa ǁî-i a ǃanuoǃnâ ti ra ǂâi i ǃaroma a ǃanuoǃnâ. 15 Sats ra ǂû xū-i xa i ga sa ǃgâsa-e tsūbahe, ots ge ǃaruǀî ǀnammi ǃnâ ûi tama hâ. Tā-i sats ra ǂû ǂû-e Xristub ge ǁōba khoe-i di hîkākās ase ī. 16 ǁNā-amaga tā i sats ǃgâi-i ase ra ǃgapaǀî xū-e tsū ǀonsa hō. 17 Elob Gaosib ge ǂûs tsî ās ti ǂâibasen tama hâ, xawe ǂhanu-aisib, ǂkhîb tsî ǃgâiaǂgaob ǃAnu Gagaba xu hâb xa. 18 Nēs ǃnâs Xristuba ǃoabasa Elob di ǃgâiǃgâibasens ǃoa hâ tsî khoen xa ra ūǃoahe xui-ao.

19 ǁNā-amaga a da ǂkhîba dīs tsî omkhâigusa ǁgūba. 20 Tā ǂû-i ǃaroma Elob di sîsenna hîkākā. Hoa xūn ge amase a ǃanu, xawe i ge ǂkhaba ǀnî khoe-i di ǃnôasa nî ǃaromaba xū-e ǂûsa. 21 ǂHanu tama i ge hâ sa ǃgâsa-i di ǃnôas ǃaromats ǁgan-e ǂû tamas ka io ǂauxûi-e nî āsa. 22 Sats ūhâ ǂgomsa sats tsî Elob tsîn ǁaegu ūhâ. ǀKhaehe i ge hâ ǁnā khoe-i ǁî-i ra ūǃoa xū-i ǃnâ ǀgoraǃgâsen tama-e. 23 Xawe ǁnā-i îganǀgē ra-i ge ǀgoraǃgâhe hâ ǂû-i kao, ǂgomsa xu i ǁnāsa dī tama amaga. Tsî ǂgomsa xu hâ tama xū-i hoa-i ge a ǁore.