ǀHommi ǃnâ hâ ǃoabas
1 Nēn khaoǃgâ ta ge ǁkhowa-amsa dao-amsa ǀhommi ǃnâ ge mû. Tsîb ge ǁnā dommi xâiǁnâs khami ra ǀōb, ǀnai ge ǃhoa-ū te hâ iba, tita ǃoa ge mî: “Nēpa ǃapa hā re, o ta ge nēn khaoǃgâ nî īna nî ǁgau tsi.” 2 Tsî ta ge ǁnātimîsi Gagab ǃnâ ge hâ. Tsî mû, tita ge tron-i ǀhommi ǃnâ hâ-i, khoe-i xa ǂnôa-aihe-e ge mû. 3 Tsî ǁnāpa ge ǂnôa ib di ais ge jaspis tsî sardiu ǀuira di ǂkhaiba ge ūhâ i tsî trons ǂnamipeb ge emeraldǀûba ūhâ ǀapiǃhanaba ge hâ i. 4 Tsî trons ǂnamipe di ge ǀgamdisihakaǀa tronde ge hâ i tsî gu ge ǀgamdisihakaǀa ǂnomdomgu,* ǃuri sarana ǂgaeǂgā tsî ǃhuniǀuri kronde danadi âgu ai ūhâga ǁîdi ai ge ǂnôa i. 5 Tronsa xub ge napagu tsî ǃgurub di ǀōb tsîna gere ǂoaxa tsî gu ge trons aiǃâ hû ǃamǀaega gere khau, ǁnāgu ge hû gagagu Elob diga. 6 ǁKhāti i ge trons aiǃâ xlāhurib ase ī xū-i, ǃgāsa ǁgamǁgamsa īsiba ūhâ-e ge hâ i.
Hoa ǀkhākha trons dikha ǂnamipe gu ge haka ûitsama kurusabega* ge mâ i, aisǀkhāb tsî ǃgâbǀkhāb ai ge mûdi xa ǀoa hâ iga. 7 ǂGuro ûitsama kurusabeb ge xammi khami ge ī i, ǀgamǁîba tsâub khami, ǃnonaǁîb ge khoe-aisa ge ūhâ i tsî hakaǁî kurusabeb ge ǁkhana ra ǃariǃkhās khami ge ī i. 8 ǁÎgu ge mâb hoaba ǃnani ǁgabogu, ǃnakab tsî ǀgapikab tsîkha ai mûdi xa ǀoa hâga ge ūhâ i. ǁÎgu ge tsēb tsî tsuxuba ǀû tamase nēti gere ǁnae:
“ǃAnu, ǃanu, ǃanub ge ǃKhūb Elob, Hoaǀgaixab,
hâ ge ib, hâ ab tsî hā nîba.”
9 Tsî gu ge nē ûitsama kurusabega ǂkhaisib, ǃgôasib tsî gangantsanade ǁnāb, trons ai ǂnôaba gere ǁnaeba, ǁîb ǀamosib kōse ûi hâba. 10 O gu ge ǀgamdisihakaǀa ǂnomdomga ǁnāb, trons ai ǂnôab aiǃâ ǁnāǁgoe tsî ǁîb, ǀamosib kōse ûi hâba ge ǀgoreǀî. ǁÎgu di kronde trons aiǃâ ǂnûi tsî gu ge ge mî:
11 “Sida ǃKhū tsî Elotse! Sats ge anu
ǂkhaisib, ǃgôasib tsî ǀgaib tsîna ǃkhōǃoasa.
Sats ge hoaraga xūna kuru xui-ao,
tsî sa ǂâisa xun ge ge kuruhe tsî hâ.”
© Khoekhoegowab Elobmîs © Bible Society in Namibia, 2020.
