Elob, ǀgapi gao-aob
(1 Kroniks 16:23-33)1 ǀAsa am-e ǁnaeba re ǃKhūba!
ǁNaeba re ǃKhūba, ǃhūbaits hoatse!
2 ǁNaeba re ǃKhūba, ǀons âba kare re.
ǁÎb ores di ǂhôasa tsēsa xu tsēs ǁga tani re.
3 ǂAnǂan re ǁîb di ǃgôasiba ǃhaodi hoade,
ǁîb di ǀgaisa dīga ǁaedi hoade.
4 ǃKhūb ge a kai tsî koahesa anu;
ǁîb ge nau elon hoan ǃgâ-ai ǃaoǃgâhesa anu.
5 Nau ǁaedi elogu hoagu ge a ǁgôa-elo,
xawe ǃKhūb ge ǀhomma ge kuru.
6 ǂKhaisib tsî ǃgôasib tsîkha ge ǁîb aiǃâ hâ,
ǀgaib tsî anusib tsîkha ge ǁîb hâǃkhaib ǃnâ hâ.
7 Koa re ǃKhūba ǁaeso hoaso,
koa re ǁîb ǂkhaisib tsî ǀgaib tsîkha.
8 Mā re ǃKhūba ǁîb ǀons di ǂkhaisiba
ǁguibasa ūkhâi, î ǁîb ai-omgu ǃoa hā re.
9 ǃKhūba ǀgoreǀî re ǁîb ǃanusib di ǂkhaisib ǃnâ,
ǀkhū re ǁîb aiǃâ, ǃhūbaits hoatse!
10 ǁAede mîba re “ǃKhūb ge ra gaosîsen!
ǃHūbaib ge ǁaposase ǃgaoǃgaohe hâ tsî ǁnobeǁnobehe tide;
ǁîb ge ǁaede ǂhanu-aisib ǀkha nî ǀgoraǃgâ.”
11 A gu ǀhomga dâ re, ab ǃhūbaiba ǃgâiaǂgao re
an hurib tsî ǁîba ra ǀoaǀoana ǃguru re.
12 Ab ǃaub tsî ǁîb ǃnâ hân hoana ǃgâiaǂgao;
an ǃgarob di hain hoana ǃgâiaǂgaob xa ǂgaiǂui;
13 ǃKhūb di ais aiǃâ, ǁîb ra hā
ǁîb ra hā, ǃhūbaiba nî ǀgoraǃgâse xuige;
ǁîb ge ǃhūbaiba ǂhanu-aisib ǃnâ nî ǀgoraǃgâ
tsî ǁaede ǂgomǂgomsasib âb ǀkha.
© Khoekhoegowab Elobmîs © Bible Society in Namibia, 2020.
