Elob ǃoa ǁîb ǂhanu-aisib ǃaroma hâ gangans
ǁNaeǃnans ǂgaeǂgui-aob ǃoa: Alumot-Labens ǃoa
Davidi Psalms
1 ǃKhūtse ti ǂgaob hoab ǀkha ta ge nî kare tsi.
Sats ge dī buruxa xūn xa ta ge nî ǃhoa.
2 ǃGâiaǂgaob ǀkha ta ge sats ǃaroma nî ǁnae;
sats, Hoan xa ǀGapitsa ta ge nî koaǁnaeba.
3 Ti khākhoen ge dabasenn kao
ǃnôa tsî sa aiǃâ ra ǁō.
4 ǀGoraǃgâ-aosets ge trons ai ǂnû,
tsî ǂhanu-aise ti ǃgâib ǃoa ge ǀgoraǃgâ.
5 ǀŪbena ǀgoraǃgâ,
tsîts ge ǂkhabadī-aona ge hîkākā
ǀamosib kōsen ǂâihōhe tidese.
6 Sida khākhoen ge ge toa,
ǁîn ǃādets ge ge hîkākā
tsîn ge ǁîna hoaragase ra ǀuruhe.
7 Xaweb ge ǃKhūba ǀamose nî gaosîsen,
trons âbab ge ǀgoraǃgâs ǃaroma ǁapoǁapo hâ.
8 ǁÎb ge ǃhūbaiba ǂhanu-aisib ǀkha ǀgoraǃgâ,
tsî khoena ǂhauǃnâse nî ǀgoraǃgâ.
9 ǃKhūb ge ǁgâiǀāhe rana ǁhaiǁhâǃkhaise ība;
sâuǃkhaise ǁnān ǂōǂōsib ǃnâ hâna.
10 ǃKhūtse ǁnān sa ǀonsa ǂann ge sats ǃnâ ǂgomǃgâba ūhâ;
tsîts ge satsa ra ôana ǁnāǃgâ tama hâ.
11 Koaǁnaeba re ǃKhūb, Sionni ai ǁan hâba!
Hoaraga ǁaede tare-eb ge dī ǃkhaisa mîba re!
12 Elob ge ǀhapion xa ǂâi tsî ǁîna ra ǀkhaoba,
tsî ǁîn di āsa ǀuru tama hâ.
13 ǀKhomxa te re ǃKhūtse!
Ti khākhoen ra tsâ kai te tsûba kōǀî,
îts ǁōba xu huiǂui te re.
14 Sa koasa ta Sions ǀgôas di dao-amdi tawa ǁgae
tsî sa ores ǃnâ nî ǃgâiaǂgaose.
15 ǀŪben ge aitsaman ge khao ādi ǃnâ ge ǁnā;
ǂaidi ân ge gaugaun ge hâ i ǃnuidi ǃnâ ge dā.
16 ǃKhūb ge ǁî-aitsama ǂhaiǂhaisen
tsî ǂhanu-aisib âba ge dī.
ǂKhabadī-aon ge ǁîn ǃomgu di sîsenni xa aitsama ge ǂhaohe.
17 Hoaraga ǂkhabadī-aon,
Eloba ǀuru hân ǃaromab ge ǁŌhân Hâǃkhaib ǂhomisa.
18 ǂHâsib ǃnâ hâ khoen ge hoaǁae ǀuruhe tide,
tsî ǀgâsan di ǃâubasensa tātsēs tsîna kā kaihe tide.
19 Khâi re ǃKhūtse, tāb khoesiba dansa hō.
An ǀūbena sa mûǁae ǀgoraǃgâhe.
20 ǁÎna ǃaoǃao re ǃKhūtse,
î ǁō nî xūsen ī ǃkhaisa ǁîna ǂanǂan.
© Khoekhoegowab Elobmîs © Bible Society in Namibia, 2020.
