Israeli di ǀasaǀasahes ǃaroma hâ ǀgores
ǁNaeǃnans ǂgaeǂgui-aob ǃoa, Sosanims ǁnaedaob ai
ǃKhō-ams psalms Asafi dis
1 Israelǁîn di ǃûi-aotse, ǁnâu re sats Josefi ǃhaosa gūn khami ge ǂgaeǂguitse
sats, xerugu ǁaegu ǀgapise ǂnôatse, aiǃâb ǃoa ǂkhai re.
2 Efraimmi, Benjaminni tsî Manaseb ǃhaos aiǃâ sa ǀgaiba ǂkhaiǂkhaikhâi re,
î sida di ores ǃoa hā re.
3 Elotse, ǁkhawa ǀasaǀasa da re,
î ais âtsa ǃnâ kai, î da sâuhe re.
4 ǃKhū Elo Hoaǀgaixatse
mâs kōsets kha sa khoen di ǀgoredi ǃoagu ra ǁaixa?
5 Sats ge ǁîna ǁgamrona ǂûxūse ge mā
tsîts ge ǁîna ǃnonaǁîǃâb di ǀnōb kōse ǁgamron ǀkha ge āsi.
6 Sats ge sida sida ǁanǁare-aon di ǂnoaguxūse ge dī
tsîn ge sida khākhoena ge âiǂui da.
7 Hoaǀgaixa Elotse, ǀasaǀasa da re,
î ais âtsa ǃnâ kai,
î da sâuhe re.
8 Egipteb ǃnâts ge draibehaiba ge ūǂui;
ǁAede sauruǂui tsîts ge ǁîba nēpa hā ge ǃhana.
9 Sats ge ǁîba ǃkhai-e ge ǂhomiba
tsîb ge ǁîba ǃnomaǃkhō tsî ǃhūba ge ǀoaǀoa.
10 ǁÎb di sommi ge ǃhomga ge ǃgū-ai
tsî ǁnâugu âba Elob di sederde.
11 ǁNâugu âbab ge hurib kōse ge ǀhōǂui
ǂkham ǂhonagu âba ǃāb kōse.
12 Tare-i ǃaromats ǁîb di ǂnubiǂgoaba ge khôaǁnâ
tsîn ǁnāpa-u ra ǃkharun hoana ǁîb ǂûna ra ǃora?
13 ǃGarob di hāgūn ge ǁîba ra hîkākā
tsîn ge ǃhanagu ǃnâ ra ǃgûmana ǁîba ra ǃû.
14 Hoaǀgaixa Elotse sida ǃoa ǂnan re;
ǀhomma xu kōǁnâ î mû re.
Nē draibehaiba kōǀî re,
15 tsî ǃnomagu sa amǀkhāb ǁôab ge ǃhanaga,
ǂhonab aitsamats ge ǀgaiǀgaibasenna.
16 ǁÎb ge ǀaes ǀkha khauǃkhūhe hâ, ǁîb ge ǁhāǁnâhe hâ,
sa ǂgōǀaus xan ge khoena nî kāǁō.
17 Ab sa ǃomma sa amǀkhāb ǃomma ai hâ khoeb ai hâ
khoen ôab ǁîbats ǀgaiǀgaibasen hâba.
18 Satsa xu da ge dabasen tide;
ǁkhawa ûi-ûi da re, o da ge sa ǀonsa nî ǂgaiǀî.
19 ǃKhū, Elo Hoaǀgaixatse, ǀasaǀasa da re,
î ais âtsa ǃnâ kai,
î da sâuhe re.
© Khoekhoegowab Elobmîs © Bible Society in Namibia, 2020.
