ǀHūsasib ǃnâ hâ ǁkhaeǂgaob
ǁNaeǃnans ǂgaeǂgui-aob ǃoa
Jedutunni ǃaroma
Asafi Psalms. ǁNaetsanas
1 Elob ǃoa ta ge huib ǃaroma ra ǂgai
Elob ǃoa ta ge ra ǂgai tsîb ge ǁîba nî ǁnâu-am te.
2 ǂŌǂōsib tsēs ai ta ge Eloba ge ôa;
ti ǃommi ge tsuxuba ǀhōǂuihe hâ tsau tamase,
tsîs ge ti ǀomsa ǁkhaeǂgaohesa ra ǂkhā.
3 Elotse satsa ǂâihō tsî ta ge ra ǃgae,
ǂâiǂâisen ta ge ra tsîs ge ti gagasa ra ǂkhabu.
4 Sats ge ǂkhaikari ra hâ kai te;
kaise ta ge a sâoǃnâ, ǃhoa ǁoa ta as kōse.
5 ǃKharu ge tsēdi xa ta ge ra ǂâi,
ǃgôa-ī ge kurigu xa.
6 Ti ǁnaetsanas xa ta ge tsuxuba ra ǂâi
ti ǂgaob ǃnâ ta ge ra ǂâiǂâisen
tsî ti gagas ǃnâ ra ôaǃnâsen:
7 “Ob kha ǃKhūba ǀamose nî ǂhara?
ǁKhawas tsînab kha ǀkhomxa tide?
8 ǁÎb di hâhâ ra ǀnamma kha ǀamose go toa?
ǁÎb mîs ǃhaosa xu ǃhaos kōseb gere māsa kha ge toa?
9 Eloba kha ge ǀuru ǀkhomxaǃnâsa?
ǁÎb ǁaiba kha tsâbaǁhaoxasib âba ge gaoǂam?”
10 O ta ge ge mî: “Nēb ge ti tsûaǂgaoba: Hoan xa ǀGapib di amǀkhāb ǃommi ge ge ǀkhara.”
11 ǂÂihō ta ge nî ǃKhūb di dīga;
sa sîsengu ǃgôa-ī ge ǁaeb diga ta ge nî ǃhoa.
12 Sa sîsenni hoab xa ta ge nî ǂâi,
tsî sa buruxa dīgu xa nî ǂâiǂâisen.
13 Elotse sa daogu ge a ǃanu.
Mâ elo-e sida kai Elob khami a kai?
14 Sats ge ǁnā Elots buruxa sîsenga ra dītsa;
sa ǀgaibats ge ǁaedi ǃnâ ge ǂanǂan.
15 Sa ǁôab ǀkhats ge ǁaede ge ore
Jakob tsî Josef hâkha di ôana.
16 ǁGamgu ge sats Elotsa ge mû
ǁgamgu ge satsa mû tsî ge ǃao
ǃgam ǁgamgu ge ge ǀkhū.
17 ǃÂudi ge ǀnanuba ge ǁhōǂui,
ǀhommi ge ǃguruba ge ūǀkhī,
ǁkhāti gu ge sa ǂāga ge ǁkhâusīhe.
18 Sa ǃgurub di ǀōb ge sares ǃnâ ge hâ i.
Napagu ge ǃhūbaiba ge ǃnâǃnâ
tsîb ge ǃhūbaiba ge ǀkhū.
19 Sa ǃgûdaob ge hurib ǃnâ-u ge hâ i,
sa ǃgûǂgaroba ǀgaisa ǁgamgu ǃnâ,
xawe di ge dāǃharodi âtsa ge mûsa tama hâ i.
20 Sa khoenats ge gūn khami ge ǂgaeǂgui,
Moseb tsî Aron hâkha di ǃommi ǀkha.
© Khoekhoegowab Elobmîs © Bible Society in Namibia, 2020.
