Ores di ǀgores
Asafi di Maskils
1 Elotse tare-i ǃaromats kha sida ǀamosib kōse ge ǂhara?
Tare-i ǃaromab kha sa ǁaixasiba sa ǃû-ais di gūn ǃoagu nî ǀan?
2 ǂÂis ǃnâ ūhâ re sa ǀhaohâb gaxu ǁaeb ǃkharu hâsets ge hōbasenna ǂâis ǃnâ ūhâ re,
sats ge ǃnoraǃnoraba, sa ǀumis di ǁaesen nî īse,
tsî ǁkhāti Sionǃhommi ǁîb aits ge ǁan hâ iba.
3 Sa ǂaira ūkhâi re ǀamo hîǀhurus ǃoa
khākhoeb ge hoaraga xūn Tempeli dina ge hîkākā.
4 Sa mâǃoasaben ge sa Tempeli ǃnâ ge ǃgō
tsî ǃkhaugu âna ra ǂgaekhâi.
5 Khoe-i haina ǃōs ǀkha ǁhā hâ ǃkhais khami i ge ge ī i.
6 ǁÎb di hoaraga haiǃgaoǂgāxūnan ge
ǃōs tsî hamers ǀkha ra khôa.
7 ǁÎn ge sa ǃanusiba ge ǂhubi
ǃhūb kōsen ge sa ǀons ǁanǃnâ hâ ǃkhaiba ge ǀuriǀuri.
8 ǁÎn ge ǂgaob ân ǃnâ ge mî:
“ǀKhī, î da hoana ǁgâiǀā!”
ǁÎn ge hoaraga ǃkhaigu ǃhūb ǃnâ hâgu, Elob ra ǃoabaǃnâhega ge ǂhubi.
9 Sida saode da ge mû tama hâ
ǃaruǀî i kēbo-ao-e ǀkhai xui-ao.
10 Elotse, mâ ǁaeb kōseb kha mâǃoasabeba nî ǃhō
khākhoeba sa ǀonsa ǀamose nî mîǁgaiǁgai?
11 Tare-i ǃaromats sa ǃommi, sa amǀkhāb ǃomma ra ūdawa?
ǁÎba sarab di xamiba xu ūǂui,
îts hîkākā.
12 Elob ge a ti Gao-ao, hugasa xu
ǃhūbaib ai ǃgâiǃōsiba ra hā-ūba.
13 Sa ǀgaib ǀkhats ge huriba ge ǀgora
drakgu di danadets ge hurib ai ra khôaǂkhū.
14 Sats ge Leviatanni danade ge ǂkhūǂkhū;
tsî ǂûxūse ǃgaroǃhūǁanaona ge mā.
15 Sats ge ǀaus tsî ǃāb tsîra ge khôaǁkhowa-am;
sats ge hoaǁae ra dâu ǃāga ge ǂnâ kai.
16 Tsēs ge a sa, ǁkhāti tsuxub ona;
sats ge sores tsî ǁkhâba ge ǂnubi.
17 Sats ge ǃhūbaib di ǀkharigu hoaga ge ǂnubi;
ǁkhunab tsî saobats ge satsa ge ǂnûiǂgā.
18 ǃKhūtse, ǂâihō re mâtib ge khākhoeba ǃhō tsisa;
gâ khoen ge ǀons âtsa ge ǃkhāǃkhā.
19 Tā sa ǂnais di ûiba ǀguruna mā re;
tā sa ǀkhomǀkhomsa khoena ǀuru ǀamosib kōse.
20 ǃGaeǀhaos di mîmâide ǂâis ǃnâ ūhâ re
ǃhūb di ǃkhae ǃkhaigu ǁgâiǀāb xa ǀoa hâ xuige.
21 ǁGâiǀāhe hâ-e-i tā taob xa oa
a-i ǀgâsa-i tsî ǂhâb ǃnâ hâ-e sa ǀonsa koa.
22 Khâimâ re Elotse, sa ǃkhaisa ǂnoaguba re;
ǂâihō re mâtin gâ khoena gere ǃhō tsisa.
23 Tā sa mâǃoasaben di domma ǀuru re
ǂkhupib sa khākhoen dib ǀam-e ūhâ tamaba.
© Khoekhoegowab Elobmîs © Bible Society in Namibia, 2020.
