Gao-aob ǃaroma hâ ǀgores
Salomoba xu
1 Elotse sa ǂhanuba gao-aoba mā re;
sa ǂhanu-aisiba gao-aob ôaba.
2 Îb sa khoena ǂhanu-aisib ǀkha ǂgaeǂgui
tsî sa ǀgâsana ǂhanub ǀkha.
3 ǃHomgu ge ǁaesa ǂkhîba nî hā-ūba;
tsî ǃnâuga ǂhanu-aisiba.
4 Ab gao-aoba ǀgâsana ǀgoraǃgâ,
ǁnān ǂhâb ǃnâ hâna ore
tsî ǁgâiǀā-aoba ǂkhūǂkhū.
5 Khoen ge satsa nî ǃao sores hâs kōse
ǁkhâb hâs kōse, ǃhaosa xu ǃhaos kōse.
6 Ab gao-aoba ǀnanub hîa ǃgaosa ǀgâb ai ra ǁnāb khami ī,
ǀnanub hîa ǃhūbaiba ra ǀâǃganu kaib khami.
7 ǁÎb di tsēdi ǃnân ge ǂhanu-aina nî ǀomkhâi
tsî ǃgâi ûib di ǃnāǂamsasiba, ǁkhâb nî bēs kōse.
8 Ab ǁîba huriba xu hurib kōse gaosîsen
tsî Eufratǃāba xu ǃhūbaib di ǀkhâuǀamdi kōse.
9 ǃGaroǃhūb ǃnâ ǁan hân ge ǁîb aiǃâ nî ǃhon
tsî khākhoen âb ge tsaraba nî tsākhâi.
10 Gao-aogu Tarsis ǃnāǃnuidi digu ge ǀkhaexūna nî hā-ū
gao-aogu Skebas tsî Sebab digu ge ǃnarexūna nî ūhā.
11 ǁÎgu ge ǁîb aiǃâ nî ǃhon,
tsî di ge hoa ǁaede ǁîba nî ǃoaba.
12 ǁÎb ge ǂhâb ǃnâ hân, tsî ǀgâsan huib ǃaroma ra ǂgain tsîna nî hui
ǁnān hui-ao-e ūhâ tamana.
13 ǁÎb ge ǀgâsan tsî ǂhâb ǃnâ hâna ǀkhom
tsî ǂhâb ǃnâ hân di ûiga ra sâu.
14 ǁGâiǀāb tsî ǂkhabadība xub ge ǁîn ûiba nî ǃnoraǃnora
tsîb ge ǀaob âna ǁîb mûǁae nî ǃgomǀgausa.
15 Ab ǁîba ǂomxase ûi re!
An khoena ǁîba Skebab ǃhuniǀurib xa mā re
în ǁîba hoa tsēsa ǀgoreba tsî ǀkhae.
16 Ab ǃhoroba ǃnāǂamsase ǃhūb ǃnâ hâ;
ab ǃhomgu ai hâ.
Ab ǂûtanib âba Libanonni khami ī
în khoena ǃās ǃnâ ǃgarob di ǀgân khami ǁhare.
17 As gao-aob ǀonsa ǀamose hâ re;
as sores hâs kōse ǀons âba aiǃgû.
Hoa ǁaedi ge ǁîb ǃnâ nî ǀkhaehe
tsîb ge ǁîba nî karehe.
18 ǃKhūb Elob, Israels Elobab karehe
ǁîb ǀguib buruxana ra dība.
19 ǁÎb di ǂkhaisa ǀonsa as ǀamose koahe;
îb ǁîb di ǂkhaisiba hoaraga ǃhūbaiba ǀoaǀoa re. Amen, Amen.
20 Isaib ôab Davidi ǀgoredi ge nēpa ra ǀuni.
© Khoekhoegowab Elobmîs © Bible Society in Namibia, 2020.
