ǂHanu-aisib di ǀgores
Davidi di Sigajons ǃKhūbab ge Kusi, Benjaminǁîb di mîdi ai ǁnaebas
1 ǃKhūtse, ti Elotse, sa ǃoa ta ge ra ǁhaiǁhâ;
ti ǃgôaǃgonaon hoana xu sâu, î ore te re,
2 ǁnā tamas ka i, on ge xam-i khami
khoe-i xa ta huiǂuihe ǁoaǀî ī-ū te
tsî ǁnāpa ǃârodi ǃnâ nî ǀkhauǃā te.
3-4 ǃKhū, ti Elotse, khoe-i ǃoagu ta ga tsūdī hâo,
ti ǃomkha ga ǀaoxa hâ,
tamas ka io ta ga ti khākhoe-e ǂkhabab ǀkha ǀkhao hâo;
tamas ka io ti mâǃoa-ao-e ǃnariǀgâǀgâ hâo,
5 o an ti khākhoena ǃgôaǃgon tsî ǃkhō te,
an ǃhūb ǃnâ dāǂgā tsî ǃgam te
tsî ǃgôaose ti ǁōsa sorosa tsarab ǀkha ana.
6 ǃKhūtse sa ǁaixasib ǃnâ hā re
î ti khākhoen ǁaiba mâǃoa;
ti ǃKhūtse, khâimâ, îts hui te re!
Sats ge ǂhanu-ai ǀgoraǃgâsa mîmâi hâ.
7 Hoaraga ǁaedi khoena sa ǂnamipe ǀhaoǀhao,
î ǁîna ǀgapiseba xu gaoǂam.
8 Sats ge hoaraga khoesiba ra ǀgoraǃgâ,
xuige ti ǃgâib ǃoa ǀgoraǃgâ re ǃKhūtse
ǀhapio ta a ǃkhaisats a ǂan xuige.
9 Sats ge ǂhanu-ai Elots,
sida ǂâidi tsî turaga ra ǀgoraǃgâtsa.
Toxopa, ab ǂkhabadī-aon di ǂkhabasiba toa,
î ǃgâidī rana mādawa-am re.
10 Elob ge a ti ǁkhaukhō;
ǁîb ge ǁnān hîa ǂgaogu ân ǃnâ ǂhanu-aina ra sâu.
11 Elob ge a ǂhanu-ai ǀgoraǃgâ-ao
tsî hoaǁae tsūdī-aona ra ǁkhara.
12 ǁÎn di ûigan ga ǀkharaǀkhara tama i
ob ge Eloba gôab âba nî ǀāǀā.
ǁÎb ge khās âba nî aiǂhomi;
13 ǁîb di ǁōǁōsa ǁâtanina ūkhâi tsîb ge
ǁîb di khau ra ǁhâigôab ra ǂhomi.
14 Mû mâtin ǂkhaba khoena ǂkhabab xa ǃgom;
ǀhôagao ǀapedi xa ǀgamǀkhā tsî ǂhumiba ra ǁora ǃkhaisa.
15 Xawen ge ǁkhā ādi nau khoenan ra khaobadi ǃnâ,
ǁîn ǂûna ra ǁnāǂgâ.
16 ǁÎn ǂhunuma ǂkhabab ge ǁîn ǂûn tsūǃgâb ase ra ī
tsî ǁîn di ǂhunuma ǂkhabadīb ge ǁîn ǂûn danade ra hîkākā.
17 ǃKhūba ta ge ǂhanu-aisib âb ǃaroma ra gangan,,
ǃKhūb, Hoan xa ǀGapiba ta ge ra koaǁnaeba.
© Khoekhoegowab Elobmîs © Bible Society in Namibia, 2020.
