Huib ǃaroma hâ ǀgores
ǁNaeǃnans ǂgaeǂgui-aob ǃoa Altasets ǃoa
Davidi ǀgaipetsanas, Sauli aiǃâb ge ǁhoas ǃnâ ǃkhoeniǂgâ ǁaeb ǃnâ
1 ǀKhomxa te re Elotse;
ǀkhomxa te re, ti ǀoms sats ai ra ǂgomaiǂnûi xuige.
Sa ǁgabogu di sommi ǃoa ta ge nî ǁhaiǁhâ,
hîkākās nî ǃkharus kōse.
2 Elob, Hoan xa ǀGapibǀî ta ge ra ǂgai;
Elob, ǁîb ǂâibasensa tita ra dīǀoaǀoababa.
3 ǁÎb ge ǀhomma sî tsî tita nî ore
tsîb ge ǁnān tita ra dāǂkhū ǂgaona nî taotao.
Elob ge ǁîb di hâhâ ra ǀnammi tsî ǀkhomxaǂgaosiba nî sî.
4 Xamn ǁaegu ta ge ǁgoe,
ǁnān hîa khoen ôana ra ǀkhauǃāna.
ǁGûgu ân ge ǂā tsî a ǁhâigôa
tsîs ge nams âna a ǀā gôa.
5 ǀHomgu ǂamai ǀgapiǀgapihe re Elotse,
ab sa ǂkhaisiba hoaraga ǃhūbaib ai hâ re.
6 ǁNoa-en ge ti ǂaira ǃaroma ge ǂhomi
tsî ta ge ge gama.
Ti aiǃân ge ā-e ge khao
tsî aitsama ǁî-i ǃnâ ge ǁnāǂgâ.
7 Ti ǂgaob ge a ǂhomisen hâ Elotse,
ti ǂgaob ge ǂhomisen hâ.
ǁNae ta ge nî,
satsa ta ge nî koaǁnaeba.
8 ǂKhai re ti ǀomse;
ǂkhai re harps tsî ǀkhōxūse.
ǃNauǁgoagasa ta ge ra ǂkhaiǂkhai.
9 ǁAedi ǁaegu ta ge ra gangan tsi ǂgao,
khoen ǁaegu ta ge ra koaǁnaeba tsi ǂgao ǃKhūtse.
10 ǀHommi kōseb ge sa hâhâ ra ǀnamma a kai;
ǂgomǂgomsasib âts ge ǃāǂuisab kōse ra sī.
11 ǀHomgu ǂamai ǀgapiǀgapihe re Elotse,
ab sa ǂkhaisiba hoaraga ǃhūbaib ai hâ re.
© Khoekhoegowab Elobmîs © Bible Society in Namibia, 2020.
