ǀHōsa-i xa ge ǀapexūhe khoe-i di ǀgores
ǁNaeǃnans ǂgaeǂgui-aob ǃoa: ǁApaxa ǀkhōxūn ǀkha, Davidi maskils
1 ǁNâu re ti ǀgoresa Elotse,
î tā ti ǀkhomabasensa xu dabasen re.
2 ǃGaoǃgâxase ǃgâ, î ǃeream te re;
ti ǃgomsigu ǃnâ ta ge a sâoǃnâ,
tsî ta ge ra ǂâiǂhansen;
3 khākhoeb di dommi xa;
ǂkhaba khoen di ǁgâiǀāb xa.
Tita ain ǂkhababa hā-ū
tsî ǁaixasib ân ǃnâ ra ǁkhan te xuige.
4 Ti ǂgaob ge ti ǃnākhoesib ǃnâ ra ǃgubu
tsîb ge ǁōb di ǃaoba ra hāǂam te.
5 ǃAob tsî ǀkhūb ra hā-ai te
tsî ta ge ra ǃnabibi.
6 O ta ge ra mî: ǁGabokha ta ga ūhâ, ǂnabu-i axase;
o ta ge ǁkhanabē tsî ti ǁanǃkhaisa ra ūhâ ǂgao.
7 Mû, ǃnūse ǁkhanabē
tsî ta ga sī ǃgaroǃhūb ǃnâ ǁan.
8 ǃHaese ta ge ti gauǃkhais tawa ra sī ǂgao,
ǂoab hîa ǁgaoǂoas ase ra ǃgomma xu.
9 ǁÎn di namsa hîkākā re ǃKhūtse,
ǂkhabab tsî khâikhâisensa ta ra ǃās ǃnâ mû xuige.
10 Tsēa tsî tsuxuba gu ge ǁîs di ǂnubiǂgoagu ai ra ǃgûǂnami,
ǂkhabasib tsî ǂhanuoǃnâsib ge ǁnāpa hâ.
11 Hîkākās ge ǁîs ǁaegub ǃnâ hâ;
ǂkhabab tsî gāxaǃnâsib ge ǁîs di ǂhaisa ǀhaoǃkhaiba xu bē tama hâ.
12 Khākhoe tamab ge ǁgoaǂui te raba,
ǁnās ka io ta ga tani hâ.
ǁNā-i ǁkhan te hâ tama-i ge, tita ǃoagu ra koasen-e;
ǁnās ka io, o ta ga ǁî-e xu gaugausen hâ.
13 Xawets ge a sa, tita ǁkhāta khami aore khoets,
ti ǂhunuma horesats, tita xa ǂanhetsa.
14 Sakhom ge ǀguipa gere ǁgamūgu
tsî khom ge Elob ommi ǃnâ ǂnubis ǃnâ gere ǃgû.
15 Ab ǁōba ǁîna hîkākā!
An ǁîna ûitsamase ǁŌhân Hâǃkhaiba ǃoa ǁgôa
ǂkhabasib ge ǁîn di hâǃkhain tsî ǁîn di ǃnākhoesib ǃnâ hâ.
16 Tita ge Eloba ra ǂgaiǀî
tsîb ge ǃKhūba nî ore te.
17 ǃUis, ǁgoas tsî tsēǃgâǁaeb ai ta ge nî ǃgae
ǀhâi ta ge nî, tsîb ge ǁîba ti domma nî ǁnâu.
18 ǂKhîb ǀkhab ra ti ûiba ǃkhamsa xu ǃnoraǃnora
tsîn ǂguina ǁîs ǃnâ tita ǃoagu hâ.
19 Tsîb ge Eloba ǁîna ǁnâu tsî nî ǃgamǃgam
ǁîb hîa hugasa xu ra gaosîsenna.
ǁÎn tawas ǀkharaǀkharasensa ǀkhai
tsîn ge Eloba ǃao tama hâ.
20 ǁÎb ge ǃomkha âba ǁnān ǁîb ǀkha ǂkhîba ūhân ǃoa ge ǀhōǂui;
ǃgaeǀhaosa âbab ge ge khôa.
21 ǁÎb ams di mîdi ge ǁnui-i kōse a ǂkhanu,
xawe ǂgaob âb ǃnâb ge toroba hâ.
22 ǃKhūb ai sa ǃgomga ǃnao
ǁîb nî ǂhansenba tsi xuige.
ǁÎb ge tātsēs tsîna mā-am tide
ǂhanu-ai-i nî ǁnobe ǃkhaisa.
23 Tsî sats Elots ge ǁîna kāǁōsib āb ǃnâ nî ǁgôa kai;
ǃgamaon tsî ǀhôagaon ge ûib di ǃkhareb tsîna sīǃnâ tide,
xawe ta ge tita sats ai ra ǂgomaiǂnûi.
© Khoekhoegowab Elobmîs © Bible Society in Namibia, 2020.
