Sâub ǃaroma hâ ǀgores
ǁNaeǃnans ǂgaeǂgui-aob ǃoa, ǂnunigu ǀkha.
Davidi Psalms
1 Ti mîde toxopa ǃgâ re ǃKhūtse;
î ti ǀhâimâinǀomsa ǃgâ re.
2 Ti ǂgaidomma ǃgâ re
ti Gao-ao tsî Elotse,
sats ǃoa ta ra ǀgore xuige.
3 ǃKhūtse, ǁgoagats ge ti domma ra ǁnâu;
ǁgoaga ǀgore
tsî ta ge sa ǃereamsa ra ǃâu.
4 Sats ge ǂkhabasib ǃnâ ra ǃgâiǃgâisen Elo tamatsa;
ǂkhabab ge sa tawa hâǃkhai-e ūhâ tama hâ.
5 ǀGapiǂâixan ge sa mûǁae mâ ǁkhā tide;
sats ge ǂkhaba-aon hoana ǁkhan hâ.
6 Hoaraga ǂhumi-aona hîkākā
tsîts ge ǃgamaon tsî gāxaǃnâ-aona ra ǃharaxū.
7 Xawe ta ge sa hâhâ ra ǀnammi ǃaroma
sa ommi ǃnâ nî ǂgâxa.
Sa ǃanu Tempeli ǃnâ ǃhonǁgoa
tsî ta ge ǃgôasib ǃnâ nî ǃoaba tsi.
8 ǃKhūtse ti khākhoen ǃaroma
sa ǂhanu-aisib ǃnâ ǂgaeǂgui te re;
î sa daoba ǂhauǂhauba te re.
9 ǁÎna xu i ge ama-e ǂoaxa tama hâ;
tsî ǂgaob ân ge hîkākās xa ǀoa hâ.
ǁÎn di domgu ge a ǁkhowa-amsa ǀhoba
tsî nams ân ge a ǃgāxa.
10 An ǁîn di ǀhapisa tani re Elotse;
în ǁîn di ǂhunuma ǀapedi ǃnâ ǁnā.
ǁÎn di ǂgui ǁoren ǃaroma ǁîna saurubē
sats ǃoagun ra khâikhâisen xuige.
11 Xawen ge hoan hîa sats ǃoa ra ǁhaiǁhâna,
dâxase ǁnae tsî nî ǃgâiaǂgao.
ǁNān hîa ǀnam tsina sâu,
în sa ǀons ǃnâ ǃgâiaǂgao re.
12 ǃKhūtse sats ge ǂhanu-aina ra ǀkhae
tsîb ge sa ǀnamma ǁîna ǁkhaukhōs ǀkhas khami ra sâu.
© Khoekhoegowab Elobmîs © Bible Society in Namibia, 2020.
