ǃGameǁâus di ǁnaetsanas
ǁNaeǃnans ǂgaeǂgui-aob ǃoa. Lelis ǁnaeǀgaub ai. Koraxi ôagu di Maskils; ǀnammi ǁnaetsanas
1 Ti ǂgaob ge ǃgâi mîdi xa ra dâuǂamhe,
ti sîsenga ta ge gao-aoba ra mîba.
Ti nammi ge xoa-ūxūb,
ǂansa ūhâ xoa-aob diba.
2 Khoesib di ôagu hoagu ǃgâ-aits ge a îsa;
Sa amǁgaukha aib ge ǀkhomma ǂnâǂuihe hâ
ǁnā-amagab ge Eloba satsa ǀamose ge ǀkhae.
3 Sa gôaba kamanab âts ai ǃgae ǀgaisatse,
sa ǂkhaisib tsî kaisib âts ǃnâ.
4 Sa ǂkhaisib ǃnâ dans ǃoa ǃgapi;
amab tsî ǂhanu-aisib ǃkhams ase
ob ge sa amǀkhāb ǃomma ǃaoǃaosa xūna nî ǁkhāǁkhā tsi.
5 Sa ǂāgu ge ge ǀā
tsî gu ge gao-aob di khākhoen ǂgaoga nî ǃkhāǃganu,
tsî di ge ǁaede ǁîb ǂai-am nî ǁnā.
6 Elotse sa trons ge ǀamose hâ
tsî gaohais sa gaosib dis ge a ǂhanu-aisib di.
7 Sats ge ǂhanu-aisiba ǀnam tsî ǂkhababa ǁkhan hâ.
ǁNā-amagab ge Elob, sa Eloba
satsa ǃgâisib oli-i ǀkha ge ǀnau,
sa ǀkha hân ǃgâ-ai.
8 Miren, aukoren tsî kasian ǁamab ge sa saran ai hâ.
ǂKhoaǁgû gao-omga xuts ǁapaxa ǀkhōxūn ǀkha ra ǃgâiaǂgao kaihe.
9 Sa ǃgôasa tarekhoedi ǁaegu di ge gaoǀgôade hâ
tsîs ge sa amǀkhāb ai gaos, Ofiri di ǃhuniǀurib ǀkha anisen hâsa mâ.
10 ǁNâu re ǀgôase, ǃgaoǃgâ, î ǂgaes âsa ǂō re.
Sa khoen tsî sa aboxab ǃhūba ǀuru re.
11 Ob ge gao-aoba sa anusib xa nî ǃgâibahe;
sa ǀhonkhoeb ge, xuige ǁîb aiǃâ ǃhon.
12 Tirus khoen ge sa aisa nî ǀkhoma;
ǀkhaexūnan ge ǁaes di ǃkhū hâna nî hā-ūba si.
ǃKharagaǃnâgu ǃkhūsigu ân ǀkha.
13 Gaoǀgôas ge ǁîs ǃnā-oms ǃnâ,
ǃhuniǀurib ǀkha ǂgāǃnâhe hâ saran ǀkha anisen hâ.
14 ǁÎs di ǀgapiǀgau anaǂamsarab ǃnâs ge gao-aob tawa ra hā-ūhe
tsî di ge oaxaede ǁîsa ra sao.
15 ǃGâiaǂgaob tsî dâb ǀkha di ge ra hā-ūhe,
gao-aob di gao-ommi ǃnâ di ge ra ǂgâxa.
16 Sa aboxagu di ǃās ǃnâ gu ge sa ôaga nî hâ
tsîts ge satsa ǁîga hoaraga ǃhūb ǃnâ gaoǀgôase nî dī.
17 Sa ǀons nî ǃhaosa xu ǃhaos kōse ǂâis ǃnâ ūhâhese ta ge nî dī,
ǁnā-amagan ge khoena ǀamosib kōse satsa nî koa.
© Khoekhoegowab Elobmîs © Bible Society in Namibia, 2020.
