Koaǁnaetsanas
ǁNaeǃnans ǂgaeǂgui-aob ǃoa
Davidi Psalms
1 ǃKhūba ta ge ǂomxase ge ǃâu,
ob ge ǁîba tiǀî ǂnan
tsî ti ǂgaisa ge ǁnâu.
2 ǁÎb ge tita tsausa xu,
ǂgoaba xu ūǂui
tsî ǁaposa ǃhaob ai ge mâ kai.
3 Ti amǃnâb ge ǀasa ǁnaetsanasa ǂgā,
Elob ǃoa hâ karetsanasa.
ǂGuin nî mû tsî ǃao
tsî ǂgomǃgâs âna ǃKhūb ai mâi.
4 ǀKhaehe-i ge hâ ǁnā khoe-i
ǃKhūb ai ra ǂgomaiǂnûi-i,
ǀgapiǂâixanǀî kō tama-i
tsî ǁgôa-elona ǃoaba tama-e.
5 ǂGui xūnats ge ge dī,
ti ǃKhū tsî Elotse.
Sats sida ǀapeǁguiba hân
ge khoe-i xare-i xa a ǀgopeǀnōhe ǁoa.
Tita ge ǂanǂan tsî nî ǃhoa
ǃgôas ǃaroman a ǂgui ǃkhaisa.
6 ǁGuibadi tsî ǂāǁguibadets ge tura tama hâ,
xawets ge ti ǁnâuǃāba ge ǁkhowa-am;
khauǁguibadi tsî ǁoreǁguibadi,
ǁîdets ge satsa ǂgao tama hâ.
7 O ta ge ge mî: “Nē ta ge hâ,
hā ta ge go;
tita xas ge ǂkhanis ǃnâ xoahe hâsa.
8 Sa ǂâisa ta nî dīse ti Elotse,
sa ǂhanub ge ti ǂgaob ai hâ.”
9 Kai ǀhaos ǃnâ ta ge ǂhanu-aisiba ra aoǁnâ;
ǃKhūtse sats ge a ǂan
ti amǁgaukha ta ǂganam tama ǃkhaisa.
10 Sa ǂhanu-aisiba ta ge ti ǂgaob ǃnâ gaugau tama hâ;
sa ǂgomǂgomsasib tsî ores xa ta ge ra ǃhoa.
Sa hâhâ ra ǀnammi tsî ǂgomǂgomsasib tsîna ta ge
kai ǀhaosa xu gaugau tama hâ.
11 Tā sa ǀkhomxaǂgaosiba tita xu ūbē re ǃKhūtse;
ab sa hâhâ ra ǀnammi tsî ǂgomǂgomsasib tsîna hoaǁae sâu te re.
Huib ǃaroma hâ ǀgores
(Psalm 70)12 ǃGôaheǁoasa ǃgomsigu ge tita ǃnamiǂgā hâ
ti ǃûǂamdi ge ǃkhōǃnami te hâ tsî ta ge a mû ǁoa.
ǁÎdi ge ti danaǀûn xa a ǃnāsa
tsîb ge ti ǂgaoba ra ǁnāxū te.
13 ǃKhūtse, ǁnātikōse ǃgâi î ore te re;
ǃKhūtse ǃhaese hā, î hui te re.
14 An hoan hîa tita ǃgam nîse ra ôana
ū-oahe tsî taotaohe
în ǁnān hîa ti ǁnāǁgôasa ra turan hoana
taob ǀkha ūdawahe.
15 An ǁnān hîa tita ǃoa “Aha, aha!” ti ra mîna
taotaohe.
16 Xawe an hoan hîa satsa ra ôana
sats ǃnâ ǃgâiaǂgao tsî dâ.
An ǁnān hîa sa oresa ǀnamna hoaǁae
“Ab ǃKhūba ǃgôahe” ti mî.
17 Tita ge ǀgâsa tsî ǂhâb ǃnâ hâ
ab ǃKhūba tita xa ǂâi re.
Sats ge ti hui tsî ore-ao
ti Elotse, tā ǀhabe re.
© Khoekhoegowab Elobmîs © Bible Society in Namibia, 2020.
